HABAKKUK 3 - PATHIEN LEKHABU THIENGTHO (BSI)

Habakkuk Pauchamna

¹ Ziehi thiemgau Habakkuk Shigion-not a a pauchamna ahi:

² Aw Lalpa, na thilhihte chuh ka na heta a, maksakna’n ka dim tai. Thil lopi takte na hih sek kha, zie kum haw hun sung hinle hih kit in. Na lungnat inle, ka chungu ah zahngai tei in.

³ Pathien chuh Teman gama pat in hungkit intin, Pathien thiengtho chuh Paran tânga pat in hung ding ahi. Selah. A lopina’n vante khu a tuom suok a, a pahchakna’n lei chung cheng a dim hi!

⁴ Kawlphe tawbanga vakin a hung a, A khuta pat in vak a kikhawh dawk zawt zawt a, a thilhih theihna selgûk a umna mun apat ngêi chun.

⁵ A masanga chun hipite a sawl a; a nung achun kêk a kie zung zung a.

⁶ Amah chuh a ding a, lei pumpi chuh a teh tuok a, Chun, a en viel a, namte chuh a nawhzak a; tichun, kumlekhuo a tâng ana umte chuh a thehdalh a, kumsawt apat ana um zing muol leh tângte chuh a tum suk u a; A lampite chuh kumsawt apat ahi.

⁷ Kushan gama mite chuh gimtheih thuokin ka mu a, Midian gama mite chuh a kithing u a.

⁸ Aw Lalpa, luipite chunga hi lungna a, tuipite chung ahih lungkim lo na him? Ahihloh leh tuisuohgiet chunga lung-awi lo na him? Ziehaw zieka chuh na sakawlte chunga hung chu a, na gâl zawhna kangtalai chunga hung chu sek na him?

⁹ Na thalpite guot zawhsa diem in na kawih a, Namte a dingin kitiemna na sudet a. Selah Lei hi luipite a na khenzak ahi.

¹⁰ Tang liente chun nang a hun mu u a, a kithing sieu a; tuipi chuh a kifawn a, a kinawk zela, tui thuk te chun aw a suoh u a, chunglam ah aban a zak tai.

¹¹ Nisa leh thapi chuh a ding zing ui, amau umna mun ah, na thal chang leng dawk leh na tiengcha mûk val liu lieute vaka chun.

¹² Thangtawm takin lei chung hi na hawhpai a, lungna takin namte na chilgawp a;

¹³ Na mite hukdam dingin na pawtdawk a, na thau nuh lengte hukdawk dingin. Minunsiete luchang chuh na sunel a, a nungzuite pum in na sumangthai vek ta a. Selah

¹⁴ A gukcha a mi chagahte ne mang a, mi ki-uongte bang leh, chinpei banga ei sudalh dinga a hung lai in, Na thalchang chun a sepaih lawiupau chu a sunlet a.

¹⁵ Tuipi kinawk gi lul lulte chuh na sakawl chun na pal a, tuipi nasatak chuh a phuon bum bum a.

¹⁶ Ziehaw cheng hi ka zak in, ka kithing a; lau in ka kha a kitat hiel tai! Ka guh ahin muotna a lut a, Ka kalsuonte chuh a hâwi ta a! Ei dote chunga gawtna tung ding chuh thipkêi in ngak ing ka.

¹⁷ Theipi thing paklun lo in, grep gui inle gahsuoh kihen la, olive thing le gah lo in, Lo haw chun le nek ding suoh kiu henla; Huong apat in gan guolte thi zo in; gan In ah gancha te um kimahleh,

¹⁸ Lalpa achun kipâk zel ing ka ting ka hukdamna Pathien achun kipâk takin um zel ing ka.

¹⁹ Lalpa Pathien chuh ka hatna ahi a, ka keng hi sazuk keng guolin a siem a; tichun, ka mun sang haw a chun bit takin ei lên sak sek hi.