HABAKKUK 2 - PATHIEN LEKHABU THIENGTHO (BSI)

Lalpa ’n Habakkuk a Dawnna

¹ Ka gâlven insang achun kalto ing ka ting, kulh In sang achun um ing ka ting, Lalpa’n gen ding bang ei hilh em tih leh ka phunna chungchanga hin dawnna bang ei nei em tih ngak in um ing ka.

² Tichun, Lalpa’n ei dâwng a: “Kilâkna chuh zik in la, taih kawm ale sim theih dingin, kichien takin suongpek chungah zik in.

³ Zie kilâkna chuh hun guot sung a ding chauh ahih ziekin, a tâwp chuh tung pai ding ahi a, thâwn puo’n a. Chanchûm tak guolin kilang mahleh, ngak in, hungtung ngêi ngêi ding ahi a, sawt hal ta puo’n a.

⁴ Ngaitie, kuole amah a thagau diklo chuh lawhsam in tin, himahleh, mi diktat chuh ginna’n hing ina.”

Mi diktat lote Tawpna ding chuh

⁵ Ahi, zielo chun le, uain heh chuh thepna ahi a; mi chapo leh kideihtawkte le a masang achun pang zo puo’n au; A utchakna chuh Sheol guolin a hawng lien a, thihna tawbang ahi a; suk tai theih ahi puoh a, a kawmah namtin a puikhawm a; Mi cheng cheng a samkhawm sek hi.

⁶ Ziehaw chengcheng hin êngho leh deusawnna thuching chawm, “Amah a hilo a kisuhausa a, kilieukhamna thil a kitimukte chung chuh a gik hi! Bang chan phet bata la a, kiningting taka kawih ding ahim,” ti’n gen lo ding ahiu em?

⁷ Na thil batnate chuh thakhat a hung kipan in, amau chun kithing hiela hun nawh lo ding ahiu hi? Zie tieng chuleh, nang chuh hun chawmgam ding ahiu hi.

⁸ Nam tamtak laka mite na suom a, himahleh, tuhin, a hing nalaite chun nang hun suom ding ahi tau! Mi tampi na that a, khawvel muntin ah, khawpi a mite chunga chuh thagum na na suoh ziekin.

⁹ Migilo apat bit theihna ding leh, sang taka bu a seh theih na dinga a In a ding a diklo taka lawkna la te chung chuh a gik hi!

¹⁰ Himahleh, na thil guonggalhte chuh na inkuon sunga dingin, zahchâkna tun chauh ahi ta a, nam tamtak sumangthai in, nangmah chung ngeia sietna kitun chauh na hi tai!

¹¹ Suong chuh bang apat chun hung kiko dawk un tin, chun, inkam a kimang thing zawl te chun dâwng un au.

¹² Thisan a khawpi tungdawk a, manlohna a khawpi dindawktu chung chuh a gik hi!

¹³ Ngaitiem u, mipite chun mei kâktum ding phetin a sem u a, namte chuh bangmahlo mai in a kisuchawl u a. Zie chuh Bangakai hihthei Lalpa a kipan ahi ngâl a.

¹⁴ Himahleh, tuipi a tui a dim bangin, Lalpa lopi zie hetna chun leichung hi luoh dim vek ding ahi.

¹⁵ A invengte kawma zu dâwn ding pie a, a sangawn zahmawh uh a muh theihna dinga gu hel a dâwn kham sakte chung chuh a gik hi!

¹⁶ Lopina hilo in zahchâkna’n a hun khuh a, nang ngêi inle hun dâwn in na tin, chun, na sangawnna chuh kilang ina. Lalpa khut changlam a khawn chuh nang lam ah hung kihei intin; tichun, na chungah zahchâkna hungtung ina.

¹⁷ Lebanon chunga na hiemngam na chun hun khuhkhum in tin, a sunga gamsate na sukbeihna achun lînglau takin hun siem ina; mihing thisan na suoh ziek leh gamte, khawpite leh a sunga chêngte thagum a na bawl ziek in.

¹⁸ Milim pathien hih bang phatchuomna ahi? A siemtu chun a lim a siem ahi a; dangkati te sulsul a kisung; lepchieh sinsak mai ahi a; A siempa chun a thilsiem chuh aleh-ginchak a, milim pau theilo ahi ngâla.

¹⁹ Thing bawng kawma, “Tho ah,” ti a, suongtum kawma, “kipan dawk ah,” tite chung chuh a gik hi! Milim pathien chun na kawmah phuon a nei ta’m? Ngaitie, sana leh dangkaguo a zut zawl ahi a, amah a chun hinna a um puoh ngâl a.

²⁰ Himahleh, Lalpa chuh vang a Mun thiengtho ah a um a, a masang achun leisiet pumpi hi thipkêi in um hen!