GALATI 4 - PATHIEN LEKHABU THIENGTHO (BSI)

Ginna zâla Pathien Cha Hihna

¹ Himahlele, hiti hin ka tih ahi: Goluoh ding pa chuh, bang cheng chunga lal himahlele, chapang a na hih sung cheng chuh, suok tawh bangmah a kidang chuom diek puoi.

² A pa hun tiem tun masang sieh, a dawnpa leh a vengte nuoia um zaw ahi.

³ Khutibang mah chun, eihaw le chapang I hih lai u khan, zie vannuoi lehkhazem bul nuoi haw ahin suok in I um sek uh ahi.

⁴ Himahlele, a hunbi a hungtun khan, cha hihna I muh theih na dingun.

⁵ Dan nuoia umte chuh tan dingin, Pathien in a chapa, numei hinthak in, Dan nuoia hung pieng in, a sawldawk ta a.

⁶ Chun, cha na hih tâk ziekun Pathien in a chapa Thagau chuh, “Abba, He pa!” ti a kiko in, I lunggil u ah a hun sawl ta a.

⁷ Khutichun, suok na hi ta puou a, cha na hi zaw tau hi: chun, cha na hih tak u chun, Pathien zâla goluoh ding chuh na hi tau.

Paul in Galati Mite a Veina

⁸ Malai khan nangun, Pathien na na he puou a, pathien hilo mawng mawngte suok in na na um him uh ahi.

⁹ Tu a Pathien na hun het nung u hin hilo, Pathien mi het na hung hih nung u hin, tih ding ahi zawi; Lehkhazem bul dengdel leh zawngkhal, a suok a um kit na utna lam uh achun, bangti dana kinunghei kit na hiu hi?

¹⁰ Ni bang, tha bang, kum kihei bang, kum bang na nit sek ui.

¹¹ Nang haw ka hun lungkhampih mah mah hi! Nang haw dinga ka sepna chengcheng hi, a thâwn ahi kha dem tih ka lauthawng mah mah hi.

¹² Suohpihte, kei tawbanga um dingin ka hun nget na hiu hi, keile nanguh tawbang in ka um ngâl a. Ka chungah bangmah na hih gilo ngei puou hi.

¹³ Chanchin Pha na kawm u a ka gen masak tum khan, ka taksa zawngkhal sa sa a hung ka hi tih na he ngâl u a.

¹⁴ Himahlele, ka phehlevo a nang haw dinga thepna um chuh na musit puou a, thet le na the puou hi. Van apat a vânsâwlchâk hung bang leh, Krista Isu na lawp ding bang tak un nei lawp zawu ahi kha.

¹⁵ Vangpha na kisak nau kha khawia um ahi ta leh? Hithei bawn leh, na mitteu kheuhdawk a, kei ei piek na nawp hiel danteu kha keimah mawng inle ka he ngâl a.

¹⁶ A leh, thudik ka hun hilh ziekin, na melmau ka na hi ta leh?

¹⁷ A pha lam a ngaihtuoh hi sam lo in, mi dang tamtak chuh, nang haw lam ah a phachuomngai mah mah sek ui. A thiltup u chuh nang haw chuh kei apat a khen dawk a, nang haw chunga phatchuom a ngaih guola, amah lama le phachuom na ngaih theihna dinguh a, hun mat guo a hi ngâl u a.

¹⁸ Tupna diktak a hih phawt chun, bangtik lai inle, khutibang phatchuom ngaihna neih chuh a pha’n a dik zing zing ahi, na kawmuh a ka um pet chauh hilo in.

¹⁹ Ka naute haw! Krista chuh nangmau a siempitin a a um masang sieh chuh, nauhanata na bangin, ka hun natpih na hiu hi.

²⁰ A hi, tulai hin, na kawm u a um a, ka aw suklamdan ka nawp zie chuh; na chungchang u ah ka lunggim mah mah ngâl a.

Hagar leh Sarah Etsakna

²¹ Dan nuoia um nuomte haw, nei hilh un: Dan in a gen chuh na ngaitha sek puou maw? Hiti hin zik ahi ngâl a:

²² “Abraham in chapa nih a nei a, khat chuh a suoknu tawh, chun, khat chuh a zipi tawh.

²³ Himahlele, a suoknu tawh a neih u chuh, phehlevo dân in a pieng a, a zipi tawh a neih uh vang chuh, Pathien thutiem zieka pieng ahi,” tih hi.

²⁴ Zie thu haw chuh tehkalna ahi a, zie numeite nih chuh thugawlh nih te chuh ahiu hi. Chun, suok a um laia cha hing nu chuh Hagar ahi a, zie chuh, Sinai tânga thugawlh etsakna ahi.

²⁵ Hagar hi Arabia gama Sinai tâng chuh ahi a, tulai a Jerusalem khawpi leh a sunga mipi chengcheng te, sala a um lai uh tawbang ahi.

²⁶ Himahleh, chunglam Jerusalem vang chuh suok ahi puoh a, zie mawng chuh ei uh nu ahi ngâl a.

²⁷ Pathien Lehkhabu a chun, “Nang chîng, cha nei khalo, lawp ah, Nang, nauhanat khalo, kiko dawk ah; Pasal neinu sang chun, thawmhau nu chun chalenau a nei tam zawi,” tih zik ahi ngâl a.

²⁸ Tichun, suohpihte haw, ei uh hi, Isak banga Pathien thutiem chate I hiu hi.

²⁹ Himahlele, zie laia phehlevo dana hung pieng khan thagau dana hung pieng khah a bawl gimtheih bang khan, tuhin le, khutibang mah chuh ahi.

³⁰ Himahlele, Pathien Lehkhabu’n bangti’n a a gen? “Suoknu chuh, a chapa tawh delh dawk ah; suoknu chapa chun, zipi chapa chuh go luohpih ding ahi puoh ngâl a,” ti’n a gen ahi.

³¹ Zieziekchun, suohpihte haw, suoknu tawh cha I hi puou a, zipi tawh a chate I hi zawu hi.