EZRA 9 - PATHIEN LEKHABU THIENGTHO (BSI)

Nam dang tawh Kichêngte Hetdawkna

¹ Chun, ziehaw zawh chun leng chate ka kawmah a hung u a, hiti hin a hung gen u a, “Israel mipite, thiempute leh Levi chite chuh zie gam mite laka hin a kikiengkawih diek puou a, Kanaan mite. Hit mite, Periz mite, Jebus mite, Amon mite, Moab mite, Aigupta mite leh Amor mite thilhih kihdak-um tak chuh amau inle a hih tau hi.

² Zie gam mite chuh suon pawlhcheh suong dingin a chanu teu zi’n a nei u a, a chapa teu chuh zi’n a neih sak u a; khutichun, nam thiengtho chuh a subuok zo tau hi. Ahi a milien teu leh vaihawm te chuh zie tawbang thil gilo bawlna achun a makai pên in a pang u a,” ti’n ei hung hilh u a.

³ Zie thu chuh ka het phetin ka silhlechen ka bawtthêk a, ka luchang a ka sam leh ka khabemul ka bawttha a, lungkham in ka chu tha a.

⁴ Khutichun, saltângte gitlohna zieka Israel Pathien kamsuok lau a kilîng taphawt chuh. ka kawmah a hung tai khawm u a; tichun, nitâk lam kithawih hun tieng chun maksa takin ka chu tha ta a.

⁵ Chun, nitâk lam kithawih hun chun ka lungkham na apat chun ka puonâk leh ka puonsilh sie chuh silh kawm in ka kipan dawka; chun, khupdin a Lalpa Pathien lam nga’n ka bân ka zak a.

⁶ Aw ka Pathien, nang lam hung ngat hi ka zakcha a, ka mai hi a san hut hut hi. Aw Pathien, ka. mantheihlohna teu chuh ka lu chung uh chup hiel in a pung a; ka gitloh na teu chule van suhiel in a sang hi.

⁷ Ka pileputeu hun apat a tuni tieng hin ka gitloh nau chuh a nasa mah mah hi. Ka gitloh ziek un ka leng teu leh ka thiemputeu pum in gamdang mite khuta piek ka hiu a, chemzâma satlup leh sala puih leh gâllâk a lak leh zahhuoi na ka tuok tau hi, tunia ka um bang u hin.

⁸ Chun, tuhin hun chawmkhat sunga dingin Lalpa ka Pathien u apat lungsiet na a hung kilang a, suokcha dinga nutsieh ding in ka Pathien un ka mit uh ei hun sukvak saka, ka saltannau apat a halhthakna ka chan theih na dingun.

⁹ Saltâng chu vang ka hiu a, himahleh, ka Pathien u chun sala ka tân sung un le ei thahtham diek puoi. Khutichun, Persia leng mitmuh a lainatna ei pie a, halhthakna ei pie ding leh ka Pathien uh In ding sak kit ding thu leh Juda leh Jerusalem kulhbang ei pie kit dingin.

¹⁰ “Aw ka Pathien uh, tuhin bang ka gen ta ding u?

¹¹ Na thupiek ka nungngat ta ngâl u a. Na suok thiemgaute manga na thugen, ‘Luoh dinga na zawt uh gam chuh a sunga cheng te ziekin a buok zo ta a; na thil phalo bawl u chun gam chuh a mawng khat apat in a langkhat chanin a luoh suok tai.

¹² Zieziekchun, na chanu teu chuh a chapateu neih sak kiu inla, a chanu teu chule na chapa teu zi a na neih sak loh dinguh ahi a. Bangtik lai inle, a vangphat nau leh a hauhsak nau na hawl dinguh ahi puoi; khutichun, hung hât un na tin, zie gama thilpha chuh na nek ding uh ahi a; kumlekhuo a dinga na chateu goluoh dinga na nutsieh theih na dingun,’ ti’n thu a pie ta ngâla.

¹³ Chun, ka thilhihkhelh ziek u leh ka thil phalo hih ziek u a ka chung u a hiti bang thil a hung tun a, nang ka Pathien uh, ka gitlohna teu sanga nêp zaw a ei gawt a, zie tawbanga nei suohchak sak ziek hin,

¹⁴ Na thupiek te chuh ka bawhsie kit un, zie tawbang thil kihdak-um hihte hi tawh kizawp kit ding ka hiu em? Nutsieh umlo khawp leh a suokcha ding um talo khawp hiel a na lungnat khum masang sieh ka chung u ah lungna zing lo ding na him?

¹⁵ Aw Lalpa Israel Pathien, nang na diktat ngâla, a um nalaite leh a suokcha te ka hiu a, tuni a na muh guol hin. Ngaitie, ka gitlohnau kipuok zingin na masang ah ka um u a, zieziek hin na masang ah kuomah ding thei lo ding ahi ngâla,” ka ti a.