EZRA 8 - PATHIEN LEKHABU THIENGTHO (BSI)

Saltâng Vaikitte

¹ Ziehaw hi leng Artazerzias vaihawm laia Babulon apat a ka kawma hung te laka inkuon a lawiupa leh a suonteu min chuh ahi.

² Phinehas suonte lak ah Gershom, Ithmar suonte lak ah Daniel; David suonte lak ah Hattush, Shekania chapa,

³ Shekania suonte lak ah Parosh suonte lak ah Zekaria, amau nam a pasal zakhat leh sawmnga tawh (a pileputeu tiem teh na bu a guol in).

⁴ Pahath-moab suonte lak ah Zerahiah chapa Eliehoenai leh pasal zanih tawh.

⁵ Shekania suonte lak ah Jahaziel chapa Zattu suon te mi zathum tawh.

⁶ Adin suon a Jonathan chapa Ebed, pasal sawmnga tawh.

⁷ Elam suonte laka Athalia chapa Jeshai leh pasal sawm sagih tawh.

⁸ Shephatia suonte laka Mikael chapa Zebadiah, pasal sawmgiet tawh.

⁹ Joab suonte laka Jehiel chapa Obadia, pasal zanih le sawmgiet tawh.

¹⁰ Bani suonte laka Josipia chapa Shelomith, pasal zakhat le sawmgup tawh.

¹¹ Bebai suonte laka Bebai chapa Zekaria, pasal sawmnih le giet tawh.

¹² Azgad suonte laka Hakkatan chapa Johanan, pasal zakhat le sawmkhat tawh.

¹³ Adonikam suonte laka Eliphelet, Jeuel leh Shemaiah, pasal sawmgup tawh.

¹⁴ Bigvai suonte laka Uthai leh Zabbud tawh pasal sawm sagih ahiu hi.

Levi te leh Nethinim te a Sapna

¹⁵ Chun, Ahava lui a chun ka puikhawm a, zie chun puon bûk ah ni thum ka um u a, chun, thiempute leh mite chuh ka vak enviel a, mahleh Levi suonte khat cha le ka mu puoh a.

¹⁶ Khutichun, Eliezer te, Ariel te, Shemaiah te, Elnathan te, Jarib te, Nathan te, Zekaria te, Meshullam te chuh ka thuthak a, thilchin he Joiarib

¹⁷ leh Elnathan tawh. Khutichun, Kasiphia muna hotu Iddo kawmah ka sawl a, Pathien In a nasem ding hun pui ding in Kasiphia a Iddo leh a suohpihte Nethinim te kawmah ka hilh a.

¹⁸ Chun, Pathien ei lungsiet ziekin, Mahli suonte laka Israel suon a Levi chi Sherebia chuh a chate leh a suohpih sawmlegiet tawh ei hun sawl sak tau a.

¹⁹ Hashabia leh Merari suonte laka Jeshai a suohpih te tawh a chate sawmlenih tawh a hun sawl u a.

²⁰ Ho-In nasemte Nethinim te, David leh a milien te’n Levi chite panpih dinga a guot uh zanih le sawmnih tawh ei hun puih sak u a. Abawn u a min zik chiet ahi.

Ezra Lawi a Mipite Anngawlhna

²¹ Khutichun, ka Pathien uh masang a kingaihniem ding thu ka phuong a, kei u leh ka chateu leh ka thuomphuo teu tawh lamzang taka ka chieh theih na dingun, Ahava lui a chun anngawlh ding thu ka phuong ta a.

²² Ka Pathien deihsakna chuh amah hawlte chungah a phatna dingun a kilang zela; a thilhih theihna leh a lungnat na vang chuh amah nungngatte chungah a chu sek hi tih leng kawm a ka gen tâk ziekun; lampi a ka melma teu laka ei panpih dinga sepaih leh sakawl chung chuong te leng kawma nget chuh zahchâk um ka sa ngâla.

²³ Khutichun, an ka ngawl u a, ei vengbit dingin Pathien ka sam u a; khutichun ka ngetnau chuh ei ngaihthak sak a.

Ho-In sakna ding Thilpiek

²⁴ Khutichun, thiempute laka lawiupa deuh deuh sawmlenih Sherebia, Hashabia leh mi dang sawm ka teldawk a.

²⁵ Khutichun, dangka leh sanate, ûmlebel, leng leh a siehmang te leh Israel mipite’n Pathien In a matchâk dinga a piekkhawm u chuh a masang u a chun ka bûk a, thiempute kawm achun ka pie ta a.

²⁶ Dangkaguo talent zagup leh sawmnga leh dangkaguo ûmlebel talent zakhat leh sana talent zakhat ka bûk dawk a.

²⁷ Chun, sana belhbu sawmnih darik sangkhat chiet, chuleh, sumeng hawih chi sana guola lul bel nih tawh ahi.

²⁸ Chun, a kawm u ah, “Lalpa a dinga kawih thiengtho na hiu a; ûmlebel haw hile a thiengtho tau hi. Chun, dangka leh sana haw hi na pilepu teu Pathien a dinga thilpiek kipie khawm ahiu hi,” ti’n a kawm u ah ka gena.

²⁹ Pathien In na tun masang sieh u chuh phatak in veng unla, Lalpa In pindan a na bûk masang sieh u chuh veng unla, enkawl un. Chun, thiempute masanga na bûk zawh tieng u leh Jerusalem a Israel chate inkuon hotu leh thiempu lien te leh Levi te kawmah pieu in, ka ti a.

³⁰ Khutichun, thiempute leh Levi chite chun dangka leh sana ûmlebel matchâk bûk zawhsa haw chuh Jerusalem a ka Pathien uh In a puok dingin a la tau a.

Jerusalem a Vaihkitna

³¹ Khutichun, Jerusalem a chieh dingin, tha khatna, ni sawm leh ni nih ni chun Ahava lui a kipatin ka kipan dawk u a; chun, ka Pathien u khut chuh ka chung u ah a um a, melmate khut leh lamkal a ei chânggute lak achun ei veng bit ta a.

³² Chun, Jerusalem ka tung u a, tichun ni thum ka um tau a.

³³ Chun, a ni li ni chun dangka leh sana ûmlebel haw chuh Pathien In a thiempu Uria chapa Meremoth khut ah ka bûk u a; a kawma chun Phinehas chapa Eleazar a um a, chuleh Jeshua chapa Johazabad leh Binnui chapa Noadiah leh Levi chite chule a kieng u a chun a um u a.

³⁴ A zat leh a gikdan chuh bûk vek ahi a, zie chun a gikdan haw chuh zik vek ahi.

³⁵ Saltâng vaikit Israel chate chun Pathien kawmah hâlmang thilpiek a pieu a, Israel chate cheng a dingin bâwngchal sawmlenih, belamchal sawmkuo leh gup, belamno sawmsagih leh sagih leh gitloh thawihna kêlchal sawmlenih a lân u a. Ziehaw cheng chuh Lalpa kawma hâlmang thilpiek vek ahi.

³⁶ Chun, leng lemguot haw chuh vaihawmte leh luigal leh lama lawiupate a hilh u a. Chun, amau chun mipite chuh panpih in Pathien in chuh a sak pih tau hi.