EZRA 5 - PATHIEN LEKHABU THIENGTHO (BSI)

Ho-In Sakpatkitna

¹ Zie hun lai chun thiemgau Haggai leh Iddo chapa Zekaria chun Juda gam leh Jerusalem a um Judate kawmah Israel Pathien min in thu a gen u a.

² Khutichun, Sheltiel chapa Zerubabel leh Jozadak chapa Jeshua chun Jerusalem a Pathien In chuh a hun sa pan kit u a; chun, a kawm u ah amau haw panpih in Pathien thiemgaute chuh a um u a.

³ Ziephet chun, Luigal langkhat a vaihawm Tatenai leh Shetharbozenai leh a lawiteu chuh a kawm u ah a chieh u a; a kawm u ah hiti hin a gen u a, “Zie In sakit ding leh zie kulh sazo ding hin kuo a thu hun pie?” a tiu a.

⁴ Chun, hiti bang hin a kawm u ah, “Zie insate hi amin uh bang ahi?” a tiu a.

⁵ Himahlele, Juda upate chung a chun Pathien mit a chu ta a, a thu chuh Daria kawm a hung tunga, zie thu a dawnna chuh a hung tun kit masang chun a nasep u chuh a hai diek puou hi.

⁶ Luigal leh lama vaihawm Tatenai leh Shetharbozenai leh a lawite, Luigal leh lama um Apharsak mite chun leng Daria chuh lehkha a thâk tau a.

⁷ A kawma lehkha a thâk u chuh hiti ahi kizik ahi a, “Leng Daria kawmah lungmuonna bukim um hen.

⁸ Zie hi leng in a na za hen: Juda gama Pathien lopitak In haw chuh sak ahi tai, a bang thing a kisa, thanuom tak leh lamzang taka a sak nau a chun ka chieh u a.

⁹ “Khutichun, zie In sa ding leh zie kulhbang sazo ding hin kuo a thu hun pie? ti’n upate ka dawng u a.

¹⁰ A lawiupa teu min haw chuh ka zik u a, ka hun hêtchet sak theih na dingin a min hawu le ka dawng u a.

¹¹ “Chun, amau chun hiti hin ei dâwng u a, ‘Lei leh van Pathien suok te ka hiua, tumasang kum tamtak a Israel leng lopi tak te’n in a na sak uh tung ding kit ding te chuh ka hiu hi,’ a tiu a.

¹² Himahlele, ka pileputeu in van Pathien a suklungnat ziekun Kaldai mi Babulon leng Nebuknezar khut ah a pie a, amah chun zie in hi a susie a, a mipite chuh Babulon ah a puimang ta a.

¹³ Himahlele, Babulon leng Kura vaihawm pat kum in, leng Kura chun zie Pathien in sa ding hin thu ei piei.

¹⁴ Chun, Pathien in sana leh dangkaguo a siem, ûmlebel Jerusalem a Pathien in a Nebuknezar in a lâkdawk, Babulon a a kawihte chuh leng Kura’n a ladawk a, mi khat Shesbazar gam awp dinga a siempa kieng achun a pie dawk a.

¹⁵ Chun, a kawmah zie a ûmlebel haw hi lân la, chieh inla, Jerusalem a Ho-In ah kawih inla, amun ngei mah akhan Ho-In chuh tun din kit hi hen, a ti a.

¹⁶ Khutichun, Shesbazar chuh a chieh a, Jerusalem Ho-In suongphum chuh a phum a; zie apat chun tuni tieng hin a sa zing tau a, himahleh zawh ahi nai puoi.

¹⁷ “Zieziekchun, leng in pha a sak chun, Babulon a leng in lehkhazik haw kikawihna in hawl henla, Jerusalem a Pathien In sak na dinga lal Kura’n thupiek a bawlna leh zie thu chuh leng in a deih dân dân in ei hun hilh hen,” ti’n.