EZRA 3 - PATHIEN LEKHABU THIENGTHO (BSI)

Jerusalem a Pathien Ho Patna

¹ Chun, tha sagih a hung hita a, Israel te chuh khawpi haw a chun a cheng u a; tichun, abawn u chun Jerusalem ah mi khat bang mai in a kikhawm u a.

² Khutichun, Jozadak chapa Jeshua leh a suohpih thiempute leh Shealtiel chapa Zerubabel leh a suohpih te chuh a kipan u a, Mosi dân guol takin Pathien a dingin hâlmang kithawih na maichâm a siem u a.

³ Chun, maichâm chuh amun ngei mah ah a siem u a; zie gama mite chuh a lau ten ngâl u a. Chun, maichâm a chun Lalpa a dingin zingkal leh nitâk in hâlmang thillat a pie zing u a.

⁴ Chun, a kizik bang takin bâwkcha kut a bawl u a, maichâm a chun Lalpa masang ah hâlmang thilpiekte a pieu a; dân dungzui in nicheng a hâlmang thilpiek a piek ding u chuh zing le nitâk in a lân tau a.

⁵ Chun, zie nung chun hâlmang thilpiekte, tha thak thilpiekte Lalpa a dinga an-sieh a kawih teu tawh, Lalpa a dinga a kiphal dungzui un nicheng in thilpiek a pie zing u a.

⁶ Tha sagih na, ni khat ni akipat chun Lalpa dinga hâlmang thilpiek chuh a lân pan u a; himahlele, Lalpa Ho-In suongphum chuh a phum nai puou hi.

Ho-In Sakkitna

⁷ Suong sêkte leh khutthiemte kawm achun paisa a pieu a, chun, Persia leng Kura phalna dungzui in sidar thing Lebanon apat tuisuohgiet pang Joppa tienga la dingin Zidon mite leh Tura mite chuh nek ding leh dâwn ding te, sathau te a pieu a.

⁸ Chun, Jerusalem a Pathien Ho-In a tun kit nung uh, kum nih na, tha nih na a chun Shealtiel chapa Zerubabel leh Jozadak chapa Jeshua leh a suohpih thiempu leh Levi chi dangte leh Saltâng vaikit Jerusalem a hung tung chengcheng te chuh tawh a kipan u a; Levi chite kum sawmnih apat a chunglam chuh Lalpa in sakna a hotu dingin a guot u a.

⁹ Khutichun, Jeshua chuh a chapate tawh a suohpihte, Kadmiel leh a suohpih te tawh Juda chapate chun Pathien in sak na a chun ma a pui u a, Henadad chapate, a chapateu leh a suohpih uh Levi chite tawh.

¹⁰ Chun, insate chun Lalpa Ho-In suongphum a phum lai u chun thiempute chun pengkun chawiin, thiempu van a kivan in, Asaph chate Levi chite chuh dakkhutbet tawh, Israel leng David in a guot banga Lalpa pakcha dingin a dinsak u a.

¹¹ “Amah chuh a pha ngâla, a zahngaihna chuh Israel mite chungah kumlekhuo a um ding ahi,” ti a Lalpa pakcha leh, a kawma kipâk thugen in, ngeih tak in a kiko u a; Lalpa in suongphum a phum tâk ziekun Lalpa a pakchau a; mipite chuh ngeih tak in a kiko chiet u a.

¹² Thiempu leh Levi chite leh inkuon lawiupa tamtak, Ho-In masa a na mu teksie te chuh, zie suongphum chuh a muh un ngeih tak in a kiko u a.

¹³ Khutichun, kipâk zieka kiko thawm leh kah thawm chuh kuoma’n a he khen thei puou a, a kiko u chuh a ngeih bêk ziekin a thawm u chuh gamla taka pat in le zak theih hiel ahi.