EZRA 1 - PATHIEN LEKHABU THIENGTHO (BSI)

Judate kawma Kura Thupiek

¹ Persia leng Kura vaihawm kum khatna ah Jeremia kama Lalpa thugen chuh a guitun theih na dingin a gamsung a phuonzak ding leh zik thawh ding in Lalpa’n Persia leng Kura lungthim chuh a chawktho a.

² Persia leng Kura chun hiti hin a tii: “Khawvel gam cheng hi Lalpa van Pathien chun ei pie ta a; chuleh Juda gama Jerusalem achun A In sa dingin thu ei pie tai.

³ Na lak u ah amah mite kuo a um em? Na lak u a Amah mite kieng achun Lalpa um hen! Tichun, Juda gama Jerusalem ah chieh to hen la, Jerusalem achun Lalpa Israel Pathien In ding sa hen. Amah chuh Pathien ahi ngâla.

⁴ Chun, kuole khawitak muna um hileh, a umna muna mite chun Jerusalem a Pathien In sak na ding a amah kiphal na a a piek chauh hilo in, dangka leh dangka guote, sana leh thuomphuo leh gancha te’n a na panpih u hen,” ti’n.

⁵ Khutichun, Juda leh Benjamin inkuon a papen leh thiempute, Levi te leh Pathien Thagau in a lungthim uh a chawhtho chengcheng chuh a kipan u a; Jerusalem a Lalpa In sa dingin a kipan tau a.

⁶ Tichun a kimvel u a chêngte chun ûmlebel leh sumeng leh sana leh thuomphuo leh ganchate, amau in phal taka a piek bân u a chun a pie tau a, tichun a khut uh a sukhat sak chiet a.

⁷ Leng Kura’n Lalpa In a ûmlebel haw Nebuknezar in Jerusalem apat a a puok dawk, a pathien In a a kawih chengcheng chuh a ladawk a.

⁸ Ziehaw nasan chuh Persia leng Kura chun sumkawlpa Mithredath a lâkdawk saka, Juda leng Shesbazar âng a chun a sim a.

⁹ Chun, zie hi a zat chuh ahi: sumeng kuong sawmthum, dangkaguo kuong sangkhat, gimlim hâlna kuong sawmnih le kuo.

¹⁰ Sana khawn sawmthum, dangkaguo khawn chidang zali leh sawmkhat, chun, ûmlebel dang sangkhat tawh.

¹¹ Sana leh dangkaguo ûmlebel chengcheng chuh sangnga leh zali ahi. Babulon a kipata saltâng Jerusalem a a puih toh lai u khan Shesbazar in ziehaw chengcheng hi a puok dawk khawm vek ahi.