EPHESI 6 - PATHIEN LEKHABU THIENGTHO (BSI)

Chate leh Nu le Pate

¹ Chapanghaw, Lalpa achun na nu leh na pateu thu zawp un; zie chuh thil dik ahi ngâl a.

² “Na nu leh na Pa limbawl ah,” zie chuh thupiek, tiem nei masapen ahi:

³ “khutichun, nang dingin pha’n tin, lei chung ahin le dam sawt inla.”

⁴ Chun, nanguh pate haw, na chateu sulungna kiu inla, Lalpa thununna a leh, a hilhna achun seilet sak zawu in.

Suokte leh a Pute

⁵ Suokte haw, Krista thu zawp bangin, lau leh kilîng kawmin; lunggil taka hih in na puteu thu zawp un.

⁶ Mihiem sukipak maia mit na sem lo in, Krista suok bangin, Pathien deihlam hih un.

⁷ Mihiemte nasem mai bang hilo in, Lalpa nasem banga um zaw’n, kipâk kawm takin sem zawu in.

⁸ Lalpa chun mitin, suok hi leh, suok lo hi leh, a thilhih bang zel u a kipahman pie ding ahi tih, hezing un.

⁹ Chun, nanguh, lawiupate haw, khutibang mah chun, amau haw leh nangmau haw lawiupa chuh van ah a um tih leh, amah chun deihsak chuom a nei puoi tih he’n, hutum a vau lo in, a chungu ah hih thuk un.

Pathien Gâlvan Bukim

¹⁰ A chaihna kêi in, Lalpa leh a thahatna thagui a chun, thilhih theihna nei in a na um un.

¹¹ Diabol lungthimbawlna chuh na do zawh theihna dingun Pathien gâlvan bukim in kivan un.

¹² I kibuonpih hawu hih sapum leh thisan a hi puoh a; lalna haw leh, thuneihna haw, leh zie khawthim chunga vannuoi vaihawm haw leh, van mun haw a thagau phalo um haw ahi zawu hi.

¹³ Zieziekchun, ni phalo chuh a hungtun phat leh, na do zawhna dingun leh, na hih zawh suok kêi nung u ale, na din theihna dingun, Pathien gâlvan bukim chuh kilak un.

¹⁴ Khutichun, na kâwng u chuh thutaka gâk in, diktatna awmphaw chuh ki-âk in;

¹⁵ kichamna Chanchin Pha kiguonkhawlna chuh na keng u a kibuh in dingun.

¹⁶ Ziehaw lo chule, taksanna phaw kilak unla, zie chun, migilo thal kuong thei chengcheng chuh sumit thei un lau.

¹⁷ Chun, hukdamna lukhuk leh Thagau chemzâm, Pathien Thu chuh kilak unla;

¹⁸ ziehaw chuh, bang hun ale, Pathien kawmah paucham in ngên zawu in. Hun tin ah, thagau in a hun puih bang zelin paucham un. Zie ziek tak hin, kivêng phau inla, Pathien mite dingin paucham zingun.

¹⁹ Chun, keile, thugen dinga ka kiguot zawh phat leh, Pathien in ka thugen ding ei piek theihna dingin ei paucham pih zing un, ti a chuh hangsan taka Chanchin Pha thuguk chuh ka hetsak theihna dingin.

²⁰ Zie Chanchin Pha palai thikkhau but hi ka hi ngâl a, tuhin suongkul ah um mah lengle. Chanchin Pha chuh, hangsan taka ka phuon dawk ding bang taka, ka phuon dawk theihna dingin, nei paucham sak zing un.

Thu tawpna

²¹ Himahlele, nang un le bangti’n a ka um, tih na het theihna dingun, Tukika, Lalpa a suohpih deihtak leh zenvielpa taksanum tak hin, bangakai hun hetsak ina.

²² Zieziek tak hin, amah chuh na kawm u a ka hun sawl ahi, ka chanchin uh na het theihna dingu leh, amah hin na lunggil uh a sukbih theihna dingin.

²³ Pa Pathien leh Lalpa Isu Krista kawm apat, kichamna leh taksanna tel, hehpihna chuh suohpihte kawma khan um hen.

²⁴ I Lalpau leh Isu Krista tuoi lo a hehpihte cheng kawma chun lungsietna um hen.