EPHESI 3 - PATHIEN LEKHABU THIENGTHO (BSI)

Jentel te Dinga Paul Nasep

¹ Zie ziek tak hin, kei Paul, nang haw Jentel te a ding Krista Isu suongkul lut pa hin, Pathien kawmah ka paucham hi.

² Nang haw phatna dingin, Pathien in a lungsietna ziekin zie nasep hi ei piek ahi tih na he tau a.

³ Pathien in a thil guonggalh gûk chuh phuong dawkin, ei hetsak ahi tai. Zie thu chuh chawmcha’n ka hun zik a;

⁴ zie chuh na sim u chun, Krista thuguk te ka hetdan chuh he thei un lau.

⁵ Malai khan zie thuguk chuh mihiemte kawma gen ahi puoh a, himahlele, tuhin, Pathien in a sawlchak thiengthote leh thiemgaute kawm achun, thagau in a phuong dawk tai.

⁶ Zie thuguk chuh ziehi ahi: Chanchin Pha ziekin, Krista achun Jentel te chuh go luohpihte ahiu a; sapum ka pihte leh, thutiem chanpihte ahi tau hi.

⁷ Chanchin Pha zenviela ka panna hi, Pathien thilpiek chuom ahi a, zie chuh a thilhih theihna nasep bang zela ei piek ahi.

⁸ Jentel te kawma Krista neihzawhna hawldawk zawh loh haw chanchin gen ding leh,

⁹ tuonatâng apat a thuguk Pathien bangakai siempa a selgûk a um chuh bang ahi, tih mi chengcheng muh sak dingin, kei mi thiengtho chengcheng laka neupente sanga neuzaw kawma hin zie lungsietna chuh piek ahi.

¹⁰ Khutichun, I Lalpau Krista Isu a hih a guot, a kumsawt lungtup bang zela, tu laia van mun haw a khun le, letna leh thuneihna

¹¹ neite kawma khun le, Pathien chitna tincheng chuh, sapchuom haw ziekin hetsak in um thei ina.

¹² Krista tawh pumkhata um in, amah I taksanna ziek u chun, nelna leh ngam tak a Pathien kawma lut theihna chuh I nei tau hi.

¹³ Zieziekchun, nang haw zieka sukgimtheih ka thawk zieka hih lungkie lo dingin ka hun nget na hiu hi, ziehaw chuh na lopina dinguh ahi.

Krista Hehpihna

¹⁴ Zieziek hin Pa, van leh leia inkuon tinin, min diktak a muhna pau masang achun,

¹⁵ ka khupdin sek ahi. Pathien kawm achun, a lopina neihzawh zie bang zela,

¹⁶ A Thagau zâla mihiem sungnung lama chuh a thilhih theihna a sukhat a na um theihna dingun ka ngên sek a,

¹⁷ chun, Krista chuh taksanna zieka na lunggil u a a chen theihna dingin le, ka ngên sek hi. Chun, hehpihna a zung khawh leh bul nei a um a,

¹⁸ nangmau haw leh Pathien mite chengcheng in, Krista hehpihna vai let zie, a sau zie haw, a sânzie haw, a thuk zie haw chuh na hetchil theihna dingun ka paucham sek hi.

¹⁹ Ahi, a bukima het zawh sen hilo mahleh, a lungsietna na hung chan u a, Pathien lunglam bang pua na hung dim theihna dingun ka tih ahi.

²⁰ Chun, I ngetnau leh ngaihtuohnau sanga thilhih-theihna tawh eihaw laka nasem thei:

²¹ Pathien kawm mawng achun, kumkhuotuong in, a khang a khang in, sapchuom haw leh Krista Isu achun lopina um hen. Amen