EPHESI 2 - PATHIEN LEKHABU THIENGTHO (BSI)

Thihna apat Hinna

¹ Malai khan nang haw le, na sukkhelh u leh na gitloh ziek u a thi na hih lai u khan, a hun sukhin na hiu hi;

² Zie hun lai khan khawvel gitlohna lampite hawh in; vanthamzawl a thuneihna leng, tu a Pathien thu awilo chate chunga vaihawmpa thagau chuh na zawp zawu hi.

³ Zie, awilo chate tawbang mah khan, eihaw le, makhan phehlevo leh lungthim nawpna lam bawl in, I phehlevo utchaknau bangin I um vek uh a. I hihnau mâwnga le lungnatak cha mi dangte tawbang mah in, Pathien lungnatna thuok dinga guotsa him I hiu hi.

⁴ Himahlele. Pathien chun khuotuohna a hau a, a mi hehpihna nasatak ziek khan,

⁵ I sukkhelhna hawu zieka thi I hih nasan un le. Krista tawh thakhat in ei na suhing ta a. hehpihna ziekin hukdam na hi tau hi.

⁶ Krista Isu achun ziek u chun, amah tawh thakhat a ei kaitho khawm in, van mun haw a khun, a kawmah ei chut khawm sak ta a.

⁷ Khutichun, hun hungtung zel dinga le, a hehpihna lopi dân, Krista a ei lungsietna ei uh ei etsak theihna dingin, zie chuh a hih ta ngâla.

⁸ Taksanna zieka, lungsietna a hukdam na hi tau hi; zie chule nangmau a pawt ahi puoh a, Pathien thilpiek ahi;

⁹ thilhih ziek ahi puoi, khutilochun, mi’n kisuonpih kha’n au.

¹⁰ Thilpha hih dinga Krista Isu a siem a um in, amah khutsuok I hi ngâl u a; zie thilpha bawl chuh I umna dinguh a Pathien in a guonggalh khawl ahi.

Krista a Kipumkhatna

¹¹ Zieziekchun, nanguh, pienphunga Jentel te, phehlevo a zek tan a, amau leh amau Zektan, kiti Judate’n, “Zektan loh” a hun tih teu haw, na malai umdan teu kha hezing un.

¹² Zie lai khan Krista lo in, Israel khuoletui tawh kitimat lo in na um u a, khawvel a kinepna bei leh Pathien neilo in, Pathien in a mite kawma a thutiem, thugawlh laka le chan na neih loh u leh Pathien beia na umteu kha hezing un.

¹³ Himahlele, tuhin, Krista Isu achun, nanguh gamla taka umte khah, Krista thisan chun hih naih in na hung um tau hi.

¹⁴ Chun, Krista mawng chun, chamna hun siem in, Juda leh Jentel te chuh pumkhat in a hun siem ta a. Amah sapum mawng chun, a kal u a daidanna leh kimelmakna chuh a hun suchim tai.

¹⁵ Judate Dana Thupiek leh dante chuh sumang in, lawinih te chuh mihiem thak pumkhata siem in, kichamna a siem ta a.

¹⁶ Kross a a thihna chun, Krista chun kimelmakna chuh a sumangthai ta a; kross chuh mang in, mi nih te chuh sapum khata gawm in, Pathien lam ah a puikit tai.

¹⁷ Khutichun, Krista chuh hung in, nanguh Jentel te, Pathien apat a gamla taka umte leh, amah naih taka um, Judate kawm achun, chamna Chanchin Pha chuh a hung gen tai.

¹⁸ Chun, Krista ziek mai in ahi, I bawn u a, Juda le, Jentel le, Thagau munkhata Pa kawma lut theihna I neih chiet tak uh hi.

¹⁹ Khutichun, tuhin, malzin leh khawpem mai na hi ta puou a; mi thiengthote chu tawh tuolkhat leh, Pathien inkawte na hung hi zaw tau hi.

²⁰ Krista Isu mawng chuh, a ning a suongphuh pawimawh pên ana hi’n, a chunga sawlchakte leh thiemgaute suongphuh chunga chuh sak na hiu hi.

²¹ Amah chuh, suongphuh chuom chuom kituok taka suktuoh a, Lalpa dinga Ho-In thiengtho hi dinga khan sakpa chuh ahi.

²² Nang haw le, amah tawh kipumkhatna zalin, Thagau a Pathien chênna dinga, mi dangte tawh sak khawm na hi tau hi.