DAN NIHNA 8 - PATHIEN LEKHABU THIENGTHO (BSI)

Gam Tiem Luoh ding

¹ Hing leh dama na um u a, na hung pun zel u a, na pileputeu kawma piek dinga Lalpa’n a haksiel gam chuh na va luoh theihna dingun, thupiek tunia ka hun piek hi zui dinga na chittheih dinguh ahi.

² Chun, a thupiek haw chuh zui ding na hiu em na hi puou em, na lungthim uh hetna dinga hun patep ding leh hun sugimthei dinga gamthip a kum sawmli a hun puihna lampi chengcheng kha hezing un.

³ Mihing hi chângthâk maia hing ahi puou a, himahleh, Lalpa kama thu pawt tin cheng in a hing zawu ahi tih a hun hetsak theihna dingin a hun sugimthei a, na kiel uh a phal a, na hêtkhâk loh uh, na pileputeu inle a hêtkhâk diek loh uh manna chun a hun chawma.

⁴ Zie kum sawmli sung hin na silhlechen, hawu chuh na silh chul puou a, na keng hawu le avum puoh a.

⁵ Chun, mi’n cha a thunun sek guolin Lalpa na Pathien u chun a hun thunun sek na hiu hi tih hi na lunggil u a na ngaihtuoh dinguh ahi.

⁶ Chun, a lampi hawh ding leh amah chuh lau dingin Lalpa na Pathien u thupiek chuh na zuih dinguh ahi.

⁷ Lalpa na Pathien u chun gam phatak guom leh tâng apat a hung pawt lui tui haw, tui thuk leh tui thuk tak umna gam,

⁸ Buh leh buhmanpawl haw, theipi leh grep, vaimimthei haw umna gam, sathau te leh khuoizu umna gam,

⁹ Tasam lo a an na nekna dinguh gam, bangmah na tâksap lohna dinguh, a suonghaw chuh kahpathik, a tâng haw chuh dakguo laihdawk theihna gam phatak achun hun puilut ding ahi ngâla.

¹⁰ Na nek u a na tai tiengu leh, gam phatak a hun piek ziek chun Lalpa na Pathien u chuh pakcha’n lau.

Lalpa Hezing un

¹¹ Tunia ka hun piek, a thupiek haw, a dân haw leh a thutanna haw hi zui lo in, Lalpa na Pathien u chuh hengilh kha’n lau, chingthei un;

¹² Khutilochun, na nêk u a, na tai u a, In pha tak tak na sak u a na luoh tiengu leh,

¹³ Na bâwng hawn teu, na belam hawn teu a hung pun a, na dangkaguo teu, na sanateu a hung pun a, na thil neih chengcheng teu a hung pun tieng leh,

¹⁴ Na lunggil teu hung chapo in, Aigupta apat, suok a tânna gam apat hun puidawkpa, Lalpa na Pathien u chuh hengilh mai in lau;

¹⁵ Amah chun gamthip za tak leh lauh-um tak, gûlgu hat chi leh aikawmte umna, tui um lohna gamgaw ah ahun pui pai a, meisuong suongpi apat tui a hun luon dawk saka,

¹⁶ Na pileputeu het khâk loh manna’n a hun vaka, atawpa na hun phat lawh theihna dingu a hun sugimthei a hun patep, Lalpa na Pathien u chuh hun hengilh kha’n lau.

¹⁷ Na lungthim un, “Ka thilhih theihna leh ka khut thahatna zieka zie hauhsakna hi ka neih ahi,” hun ti kha’n lau, chingthei un.

¹⁸ Tu a a det guola na pileputeu kawma kihâksiela thuthun chuh a sukdetna dingin, Lalpa na Pathien u chuh hezing un, hauhsak na hun pie thei chuh amah chuh ahi ngâla.

¹⁹ Chun, hiti hi hi’n tin, Lalpa na Pathien chuh na hetngilh u a, pathien dang haw na zuih u a, a nau na sep u a, na ho himhim u chun mangthai ngêi ngêi ding na hiu hi tih tuni hin ka hun hetsak na hiu hi.

²⁰ Na masang u a nam dang haw a sukmangthai guolin nang u le mangthai inlau, Lalpa na Pathien u aw chuh ngaitha nuom lo na hih ding ziek un.