DAN NIHNA 7 - PATHIEN LEKHABU THIENGTHO (BSI)

Lalpa Chanvo Nam

¹ “Lalpa na Pathien un va luoh dinga na chiehnau gam chuh a hun puih tunga, nam tamtak, Hit te, Girgash te, Amor te, Kanaan te, Periz te, Hiv te leh Jebus te, nang u sanga thupi zaw leh thilhih thei zaw nam sagihte chuh na masang u a a nawhdawk tieng leh;

² Lalpa na Pathien un amau chuh na khut u a a hun pieka na zawh tiengu leh na sukmangthai suok kêi dinguh ahi; amau haw chuh tawh thu na thun dinguh ahi puoh a, a chungu ale na zahngaih dinguh ahi puoi;

³ Zi leh pasal ale na kineih dinguh ahi puoh a, na chanuteu chuh a chapateu na neihsak dinguh ahi puoh a, a chanuteu chule na chapateu na neihsak dinguh ahi diek puoi.

⁴ Khutilochun, na chapateu haw hi ei zuihnau apat in pathien dang haw hona lam ah pui kawi intin un; chun, Lalpa lungnatna chuh na chunguh a hung kuong in thakhat in hun sumangthai kha khâna.

⁵ Himahleh, a chungu a hiti a hi na hih zawk dinguh ahi; a maichâm hawu chuh suchim unla, a suong zek hawu chuh khen gawp unla, a pathien uh Asher pathien lim khuom haw chuh phuk unla, a milim siemkawm hawu chuh na hâltum vek dinguh ahi.

⁶ Lalpa na Pathien uh a dinga nam thiengtho na hi ngâl u a; lei chunga nam chengcheng laka amah a ding chuom a Lalpa na Pathien un a hun têl na hi ngâl u a.

⁷ “Nam dang haw sanga na tamzawk ziek u a Lalpa’n na chung u a a hehpihna a chuksak a, a hun tel na hi puou a; nam chengcheng laka a tawm pên na hi ngâl u a;

⁸ Lalpa’n a hun hehpih ziek leh na pileputeu kawma a na kihâksielna chuh sukpitin a nawp ziekin ahi zaw a puo Lalpa’n Aigupta lengpa Pharao khut apat khut hattak a suok apat a hun tatdawk chuh.

⁹ Zieziekchun, Lalpa na Pathien u maicha hi Pathien chuh ahi tih heu in; Pathien ginum, amah hehpih a, a thu zuite chunga khang sang chana thuthun leh lungsietna sulang zing seka,

¹⁰ Amah hawte sumangthai dinga amau chung ngeia dinthuk sek chuh ahi; amah hawte chung achun chanchûm puo’n tin, a muh theih ngêi dingun dinthuk ina.

¹¹ Zieziekchun, thupiek haw, dân haw leh thutanna haw tunia thu ka hun piek haw hi phachuomngai taka na zuih dinguh ahi.

Thu-awih na gah Vangsakna

¹² “Chun, hiti hi hi’n tin, zie thutanna haw hi na ngaihsak u a, na zuih u a, na hih u chun na pileputeu kawma Lalpa na Pathien un kihâksiel a a thuthun leh lungsietna chuh na chungu ah nga’n tin;

¹³ Hun hehpih intin, hun vangsak intin, hun supung intin; piek dinga na pileputeu kawma a na kihâksiel gam achun na gil uh a gah leh na lei gah hawu buh leh uain leh sathau haw, na bâwngno u leh na belamno hawu le.

¹⁴ Nam dang cheng sanga vangsakna mu tam pên hin na tin un; na laku ah numei hileh pasal hileh a chîng himhim um puo’n lau, na ganchateu le.

¹⁵ Chun, Lalpa’n hilegau chengcheng hun sukkieng sak intin, na hetsau Aigupta gam hilegau haw chuh na chungu ah lênsak puo’n tin, nanguh hun hawte chungah lênsak zaw’n a.

¹⁶ Chun, Lalpa na Pathien un a hun piek ding nam chengcheng te chuh na sukmangthai vek dinguh ahi; na lungsiet dinguh ahi puoh a, a pathienteu na le na sep dinguh ahi puoi; zie chuh nang u dingin thâng hi ding ahi ngâla.

¹⁷ “Na lungthim u a, Zie nam haw hi ei u sangin a tamzaw ngâl u a, bangtia nawhdawk thei ding I hiu em?” na tih u chun,

¹⁸ Amau chuh lau kiu inla; Lalpa na Pathien un Pharaoh leh Aigupta mite chengcheng chunga a thilhih haw kha heu in,

¹⁹ Patepna nasatak na mit ngêi u a na muh hawu, melchikna haw, thilmak haw, khut hattak haw leh bân zaka Lalpa na Pathien un a hun puihdawkna kha; Lalpa na Pathien un na mi lauhteu chung achun zie guol khan hih zel ina.

²⁰ Lalpa na Pathien un a laku ah khuoingal sawl nalaiset intin, a suokcha sun, na laku a kisel haw nasan le a beihmang suok kêi chan un.

²¹ Amau chuh na lauh dinguh ahi puoi; Lalpa na Pathien uh, Pathien lauh-um tak leh thupi tak chuh na laku ah a um ngâla.

²² Lalpa na Pathien u chun zie nam haw chuh awl awlin hun nawhdawk sak intin; thakhat a a bawnu a na sukmangthai zieng dinguh ahi puoi, khutilochun gamsa haw chuh nang u dinga pawi khawih khawp in hung tam kha’n au.

²³ Himahleh, a manthai masangsieh un Lalpa na Pathien un na khut u ah hun pie’n tin, nasa takin chawkbuoi ina.

²⁴ A lengteu chuh na khut u ah pien tin, a min u chuh vannuoi apat hi na nawihmang dinguh ahi; na sukmangthai suok kêi chan un nanguh hun tu ding kuomah um hiel puo’n au.

²⁵ A pathienteu lim a siemkawm hawu chuh meia na hâltum dinguh ahi; milim chunga dangkaguo ahim sana ahim chuh na utchak dinguh ahi puoh a, nanguh dinga na kilak loh hiel dinguh ahi, khutilochun âwk kha kha’n lau; Lalpa na Pathien u ngaih in thil tenum ahi ngâl a:

²⁶ Na In sung u a thil tenum hun puo lut in, zie thil guola chuh hansiedawl a na kisiem dinguh ahi puoi; ten takzet a na ten dinguh ahi a, na kihdak dinguh ahi, hansie dawl thil ahi ngâla.