DAN NIHNA 6 - PATHIEN LEKHABU THIENGTHO (BSI)

Thupiek Lopi

¹ “Chun, luoh dinga na chiehnau gama chuh na zuih theihna ding u a nang u hun hilh dinga Lalpa na Pathien thu ei piek thupiek haw leh danhaw leh thutanna haw chuh ziehaw hi ahiu:

² Nang u leh na chateu leh na tuteu in na damsung cheng u a Lalpa na Pathien u kihchak dân na thiem u a, a dân leh a thupiek haw leh thu ka hun piek hi na zuih u a, zie gama chuh na damsawt theihna dingun.

³ Zieziekchun, Aw Israel mite haw, na hung lamzan u a, na pileputeu Lalpa Pathien in a hun na tiem guola khuoizu leh bâwngnawi luonna gama chuh nasa taka na hung pun theihna dingun ngaithau inla, gunchuh taka zui dingin chingthei un.

⁴ “Aw Israel mite haw, ngaitiem u, Lalpa I Pathien chauh u hi ahi Pathien chuh;

⁵ Lalpa na Pathien u chuh na lungthim chengcheng u a, na lunggil chengcheng u a, na hatna chengcheng u a na hehpih dinguh ahi.

⁶ Tunia thu ka hun piek, zie thupiek haw hi na lungthim u ah châm zing intin;

⁷ Phachuomngai takin na chateu sinsak un la, In a na chut lai un le, lampi a na chieh pet un le, na kuol tieng u lele, na thawh tieng u lele na gen gen sek dinguh ahi.

⁸ Chun, melchikna dingin na bân u ah khitdên unla, na mit kikal uh na chalpâng u ah tât un.

⁹ Chun, na kulh kawt hawu leh na kawt bieng hawu a le na zik dinguh ahi.

Thupiek Zuih loh Lauh-um zie

¹⁰ “Chun, hiti hi hi’n tin, Lalpa na Pathien un na pileputeu, Abraham leh Isak leh Jakob, kawma kihâksiela a tiem gama chuh a hun puih luta, nanguh tundin hilo khawpi thupi taktak leh hawih taktak haw a hun pieka,

¹¹ Nanguh sundim hilo, thilpha tincheng a dim, In haw leh nanguh laih hilo, tuikhuk laihsa haw leh nanguh phuh hilo grep huon haw leh olive-thingbil haw umna a a hun puih luta, na nek u a, na hung tai ten tieng u leh,

¹² Chingthei takin um un, khutilochun, Aigupta suok apat hun puidawk Lalpa chuh hengilh zieng kha’n lau.

¹³ Lalpa na Pathien u chuh na lauh u a, a na chuh na sep u a, amah min sama na kihâksiel dinguh ahi.

¹⁴ Pathien dang, na kim na vel u a um mite pathien haw chuh na ho dinguh ahi puoi,

¹⁵ Na lak u a um zing, Lalpa na Pathien u chuh Pathien thikthusie ahi ngâl a; khutilochun, Lalpa na Pathien uh lungnatna chun mei guolin hun kâng intin, lei chung apat hin hun sumangthai kha’na.

¹⁶ “Massah a na patep guol u a khah Lalpa na Pathien u chuh na patep dinguh ahi puoi.

¹⁷ Lalpa na Pathien un thu a hun piek, a thupiek haw, a thu hetsak haw, a dân haw hi chingthei taka na zuih dinguh ahi.

¹⁸ Lalpa mitmuha dik leh pha chuh na hih zel dinguh ahi, khutichun; nang u dingin pha’n tin, na pileputeu kawma kihâksiela a tiem gam phatak a chuh lut in luoh thei inlau.

¹⁹ Lalpa’n a gensa guolin, na masang u apat in na melmateu nawhdawk zel inlau.

²⁰ “Chun, tunung leh na chateu in, ‘Lalpa I Pathien un thu hetsak haw, dân haw, thutanna haw hi zui dinga bang zieka thu ei na pieka?’ ti a a hun dawt tiengu leh,

²¹ Nangun na chateu kawmah, ‘Aigupta gam ah Pharaoh suok ka na hiu a, Lalpa’n Aigupta gam apat chun khut hât takin ei na puidawk a;

²² Chun, Lalpa’n ka mitmuh ngêi un Aigupta mite chung leh Pharaoh chung leh a miliente chengcheng chung achun melchikna leh thilmak nasatak tak leh lungzîn-um taktak haw a latsak a;

²³ Kei haw vang chuh I pileputeu kawma kihâksiela a na tiem gama hi ei puilut a ei pie dingin zie apat chun ei na puidawk a.

²⁴ Khutichun, zie dân haw chengcheng hi I phat zing na ding u a zui ding leh Lalpa I Pathien u chuh lau dingin Lalpa chun thu ei na pie a, tunia guola hi hing leh dama ei hinhawih theihna dingin.

²⁵ Thu ei piek guola Lalpa I Pathien uh masanga zie dân haw cheng hi zui dinga I chittheih u chun, ei u dingin kitûpna hi ding ahi,’ na tih dinguh ahi.