DAN NIHNA 34 - PATHIEN LEKHABU THIENGTHO (BSI)

Mosi Thihna

¹ Chun, Mosi chuh Moab phai apat in Jerikoh gala Nebo tânga Pisgah tâng sip achun a chieh to a. Chun, Lalpa’n Gilead gam chengcheng, Dan tiengin a etsak a;

² Naphtali leh Ephraim gam chengcheng, Manasseh leh Juda gam chengcheng, tumlam a tuipi chanin;

³ Simlam chuh tum khawpi Jerikoh phaicham cheng, Zoar chanin.

⁴ Chun, Lalpa’n a kawmah, “Zie gam hi ahi Abraham leh Isak leh Jakob kawma, ‘Na suonteu pie’ng ka’, ti a kihâksiela ka na tiem kha; muh chuh ka hun muhsak ta a, hilele, zie chun chieh lo ding na hi,” a ti a.

⁵ Khutichun, Lalpa suok Mosi chuh Lalpa thu guolin Moab gam achun a thi ta a.

⁶ Chun, Beth peor zawna Moab gama guom ah a vui a; ahihziekin a thân chuh tu chan hin kuoma’n a he puou hi.

⁷ Mosi chuh a thih chun kum za leh kum sawmnih ahi a; ahih ziekin, a mit a thim puoh a, a tha le a kai diek puoi.

⁸ Chun, Israel suonte chun Mosi chuh Moab phai achun ni sawmthum a sûn u a; khutichun, Mosi a sûnnau leh a kahna niteu chuh a hung tâwp ta a.

⁹ Chun, Nun chapa Joshua chuh chitna thagau in a dima; Mosi’n a chunga a khut a ngak ziekin; chun, Israel suonte chun a thu a zui u a, Lalpa’n Mosi thu a piek guol khan a hih u a.

¹⁰ Chun, zie apat chun Israel te lak ah Mosi guola Lalpa’n kimaichangtuoh zet a a hopih thiemgau himhim a um ta puou hi;

¹¹ Melchiknate chengcheng leh thilmak chengcheng te, Pharaoh leh a suokte chengcheng kawm leh Aigupta gam cheng a etsak a;

¹² Khut hattak leh thil lauh-um thupi taktak Israel mite chengcheng muh a Mosi’n a hih haw kha kuoma’n a hih ta puou hi.