DAN NIHNA 32 - PATHIEN LEKHABU THIENGTHO (BSI)

Mosi La

¹ “Bil hun dawh un, Aw vante haw, gen ding ka hi; ka pau kamsuok lei in ngai hen;

² Guohtui bangin ka thu zu’na, dâitui bangin ka thugen chuh vatha hen; Ham hing dip dep chunga guoh bang leh, nah hing chunga guohmal phi’n bang in.

³ Lalpa min phuong ding ka hi, Lopina I Pathien uh pieu in.

⁴ “Amah suongpi chuh, a thilhih a phabukim; A umdan chengcheng a dik: Pathien ginum, adiklo hih lo, Thudik leh pha Amah ahi.

⁵ A chungah phalo takin ahih u a; A chate ahi puou hi, a dem umna ziekun, Khang ngaihnabei leh lungkawi ahiu.

⁶ Aw, mingawl leh chinglote haw, khutichun maw Lalpa chuh na ditthuk dinguh? Ahun hing na pa hilo maw, a hun siem, Nam khata hun siema, hun phutdet chuh?

⁷ “Tuona tânga nite chuh hezing inla, khang liemsa haw chuh ngaihtuoh in. Na pa dawng in, hun hilh intin, Na upahawu le dawng in, hun hilhchien in au.

⁸ Chungnung pên pa’n namte laka gam a hawp laia, mihiem chate a khenzak lai khan, Israel suonte zah in, Nam tin gamgi ding a zam a.

⁹ Lalpa chanvo chuh a mite ahiu; Jakob suonte chuh a gochan ahiu.

¹⁰ “Gamthip gam ah amah chuh a mu a, Gamthip chai tieltuol leh mau hulhul achun; ûmkimvel in a enkawla, A mitnaucha bangin a veng.

¹¹ Mupi’n a bu a a note chuh a chawktho a, tichun, a la a a lenpih a, A note chunga a tha a zap a, a tha a zak palh a, a lak toh a, A tha chunga a puok sek guolin,

¹² Lalpa chauh in a pui seka, Gamdang pathien hilo in.

¹³ Lei mun sang haw chungah a chuon sak a, Lo thai gah in a vak seka; Suongpi khikek kal a khuoizu a dâwn saka, Mei suong apat sathau inle a chawm a;

¹⁴ Bâwngnawi khal leh belam nawitui in le a vak, Belamno thau in tawh, Bashan gam belamchal leh kelpite, Buh lim pên chi haw’n le; Grep tui san chîk le na dâwn sek.

¹⁵ Ahihziekin, Jeshurun te chuh a hung thau u a, ahi lawk lawk u a; Na hung thau a, na hung mûm a, na hung zawl ta a; Khutichun, a siempa Pathien chuh a nusieh ta a, A hukdamna suongpi chuh a ngaidau hi.

¹⁶ Gam dang pathiente’n a mitthîpna a chawktho u a; A milim tenum hawu in a châwk lungnau hi.

¹⁷ Pathien hilo thitha haw kawmah, a kithawi ui, a het khâk loh uh pathien te kawmah, Tu naicha a hung um chauh pathien thak, Na pileputeu lauh khâk loh haw kawmah,

¹⁸ A hun hingtu Suongpi chuh na limsak puoi, A hun siempa Pathien chuh na hengilh tai.

¹⁹ “Lalpa’n zie chuh a muh phetin, A nawlh tai amau chuh, A chanu a chapate’n a chawh lungnat ziekun.

²⁰ ‘Kiselmangsan ing ka, Bang a hung suok um, en ka,’ a tii. Khang ngaihnabei, ginumlo chate ahiu.

²¹ Pathien hilo thil in ei chawk thikthusieu a, A milim pannabei hawu in ei chawk lungnau hi. Nam le ting lote mang in a thikthuu susie’ng ka ting; Nam ngawl tak mang in chawk lungna’ng ka.

²² Ka lungnat mei guolin a kuong dawka, Sheol kawdawn chan in a kâng hi; Lei leh a gahsuoh cheng tawh a kang zo hi, Tang kingaknate haw chanin a kang hi.

²³ “A chung u ah sietna tieng khawm ing ka ting, A chungu ah thal thah ing ka,

²⁴ Gilkiel in gawp sîtsiet in au, meipi leh hipi namailo in thawigawt in au, gamsa haw peh sak ka ting, Leivui laka vak gûl gu haw le.

²⁵ Pawlam ah chemzâm in thi’n tin un; In sung ah tizatna’n. Nungak tangval mangthai in au, nausen nawichep laite leh sam kangte tiengin.

²⁶ ‘Nawhzak vek ing ka ting, Mihing laka amau hetzingna subei kêi ding ka hi,’ ti mai ding hi veng,

²⁷ Melma ênghona thatdahum sa kileng chuh, a melma teu in hekhiel in, ‘I khut uh dawp sangin a um tai; Ziehaw cheng hi Lalpa hih ahi puoi’, a tih khâk dinguh.

²⁸ “Chitna neilo nam ahiu a, Amau ah hetthiemna him a um puoi.

²⁹ Ching u henla hile chuh zie hi hethiem u ding un tin, A tunung thu dinguh ngaihtuoh ding hiveu in!

³⁰ Bangti’n e mi khatin sang khat a delh a, Mi nih in sing a taihsiet sak dinguh, A Suongpiu in a nutsieh a, Lalpa’n a piekdawk ahih loh ngâl chun?

³¹ A Suongpiu chuh ei uh suongpi tawbang ahi puoh ngâla, I melmateu ngêi in le khutichun a ngai ngâl u a.

³² A grepgui u chuh Sodom grepgui leh Gomorra gama hung kipan ahi: A grep gah u chuh gu a dim ahi a, A gah bawk haw chuh khatna’n a dim a.

³³ A uain tui u chuh gûl gu leh khuoingal gu hattak ahi.

³⁴ “Zie chuh ka khawlkhawm leh ka go bawma kichâl khum hilo ahim?

³⁵ Phubalak leh ditthuk chuh Kei hih ding ahi; a kalbiu ateu tieng leh, A sietna ding niu chuh a nai tai, Thil hung tung ding haw chuh a chung u ah tung pai ta’n a.

³⁶ Lalpa chun a mite vaihawm intin, A suokte chungah lungsietna nei ina, A thilhih theihnau a beih a, um himhim um talo a a muh tieng.

³⁷ ‘A pathienteu khawia um ahiu a, A kiselnau suongpi, a dâwn dinguh thillat uain dawnte chuh?

³⁸ A kithawihna thau teu ne a, A dâwn ding thilpiek uh greptui dâwn sekte chuh? A hun panpih dingin kipan tau hen la! Hun liehkhuh tau hen la! ti’n a.

³⁹ Kei, Keimah ngêi hi, Amah chuh ka hi, he tau in, Kei tihloh pathien dang a um puoi; Ka sulum seka, ka suhing sek; Ka suliem seka, ka sudam sek; Ka thilhih ei dal thei kuomah a um puoi.

⁴⁰ Van lama ka khut tungto hielin ka kihâksiel a, Kumsawt a hing zing ka hih guol ngêi in,

⁴¹ Ka chemzâm te zawlzawl ka tathiem a, vaihawmna ka khut in a tuk tieng, Ka melmate chungah phuba la’ng ka ting, ei hawte chuh din thuk ing ka.

⁴² Ka thal haw chuh thisan in sukham ka ting, Ka chemzâm in a taksa ne zo ina; Thahte leh galhing a matte thisan tawh melma lawiupate luchang apat in,’ ka tii, ti’n.

⁴³ “Aw, nanguh namtin te haw, a mite tawh kipâk un; A suokte thisan phuba chuh la ding ahi ngâla; Amah dote chungah phuba la ding ahi, A gam leh a mite dingin kichamna bukim siem ina.”

Mosi Thuvaithak Nunung pên

⁴⁴ Khutichun, Mosi chuh Nun chapa Joshua tawh a hunga, mipite hetna ah zie la thu chengcheng chuh a va gena;

⁴⁵ Chun, zie thu chengcheng chuh Israel mi chengcheng kawma Mosi’n a gen zawh phet chun,

⁴⁶ A kawm u ah, “Tuni a na kawm u a thu ka hun hetsak a hin na lungthim uh ngachak kei unla, zie dân thu cheng chengte hi chingthei taka zui dingin na chateu thu pieu in.

⁴⁷ Nang u dingin thu maimai ahi puoh a, na hinnau ahi ngâla; chun, zie thu haw hi zui in na va luoh dinga Jordan na kannau gam achun dam sawt inlau,” a ti a.

⁴⁸ Zie ni mah chun Lalpa’n Mosi a hopih a,

⁴⁹ “Moab gama Jerikoh gala Abarim tâng dunga Nebo tâng achun va kalto inla, Israel suonte luoh dinga ka piek Kanaan gam chuh va gal thil in;

⁵⁰ Tichun, na suohpihpa Aron kha Hor tânga a thih a, a chipihte kawma puih ahih guol khan na kaltohna tâng achun thi’n na tin, na chipihte kawma puih hi ta’n la;

⁵¹ Zin gamthip a, Kadesh a Meribah tuia Israel suonte laka ka chunga na gitloh ziek khan leh Israel suonte laka nei limbawl loh ziek khan.

⁵² Na ma a gam chuh va gal muh in na tin, ahih ziekin, Israel suonte ka piek gam achun lut puo’n la,” ti’n a gena.