DAN NIHNA 3 - PATHIEN LEKHABU THIENGTHO (BSI)

Leng Og zawhna

¹ Khutichun, I kilehhei u a, Bashan lampi ah I chieh to u a: Bashan lengpa Og leh a mite chengcheng chuh Eidrei mun ah ei uh ei do dingin a hung kipan u a.

² Chun, Lalpa’n ka kawmah, “Amah chuh lau ki’n, amah leh a mite chengcheng leh a gam chuh na khuta hun pie ding ka hi; Heshbon a um Amor te lengpa Sihon chunga na hih guol khan amah chunga hin le hih in,” a ti a.

³ Khutichun, Lalpa I Pathien u chun Bashan lengpa Og leh a mite chengcheng tawh I khut u ah a pie a: khutichun, khatchale hinghawih lo in I that vek tau a.

⁴ Zie chung khan a khuo chengcheng khaw sawmgup, Bashan a Og lalgam, Argob gamkaih chengcheng chuh I la suok kei u a; I lâksak loh uh khuo khatchale a um puoi.

⁵ Zie khuo haw chengcheng hi kulh sang taktak, kawtpi leh a kamna det taktak nei vek ahiu a, kulh neilo khuo tamtak simtel loh in le.

⁶ Heshbon lengpa Sihon chunga I hih guol u khan I sumangthai vek u a, numei leh naupang haw pum in.

⁷ Ahihziekin, gancha chengcheng leh khuo a thuomphuo I lak hawu chuh I chan dingun I kilak tau a.

⁸ Zie chung chun Jordan gâl lama um Amor lengte nih khut apat chun Amon phai guom apat Hermon tâng chanin gam I lâksak u a;

⁹ (Zie Hermon chuh Zidon te chun Sirion a tiu a. Amor te chun Senir a tiu ahi);

¹⁰ phaigam khuo chengcheng leh Gilead gam chengcheng leh Bashan gam chengcheng tawh Bashan a Og gamsung a um Salekah leh Edrei khuo te nih chanin.

¹¹ (Rephah te laka um nalai sun chuh Bashan lengpa Og chauh hi ahi ta a; ngaitie, a zâlkhun chuh kahpathik ahi; Amon suonte khuo Rabbah achun a um nalai hilo ahim? Mihing teh dana teh in, a dunglam chuh tawng kuo ahi a, a vailam chuh tawng li ahi).

Jordan Suohlam a Chengdente

¹² Zie chung khan zie gam chuh I luoh u a; Amon phai guom panga Aroer mâllam gam cheng chuh, Gilead tânggam kimkhat leh a sunga khawpi chengcheng pum in, Reuben suonte leh Gad suonte chuh ka pie a;

¹³ chun, Gilead gam um nalai cheng leh Bashan gama Og gam cheng chuh Manasseh phung kimkhatte kawma chun ka pie a, Argob gamkaih cheng chuh; (Bashan gama Argob gamkaih cheng chuh miliente gam ti a het ahi.

¹⁴ Manasseh chapa Jair chun Argob gamkaih chengcheng, Geshur te leh Maakah te gamgi chanin, a la a, zie gam chuh amah min a lawh sak a, khutichun, tuni tieng hin Bashan gam chuh Havoth-jair ti a het ahi zing hi).

¹⁵ Chun, Gilead chuh Makir ka pie a.

¹⁶ Reuben te leh Gad te vang chuh Gilead apat a Amon guom lama kikhawh suk gamkaih cheng chuh ka pie a, Ammon te gamgi Jabok lui chan in, guom lailung tak chuh gamgi hi ding in;

¹⁷ Chun, a gam u chuh tumlampang ah Jordan lui chan ahi a, mâllam a Kinereth dîl apat in simlam a Tuipi Al chan ahi a, chun suohlam ah Pisgah tângbul ken lak chan ahi.

¹⁸ Chun, zielai chun, “Lalpa na Pathien un zie gam hi na chan dingun a hun pie a, tuhin, na galkap miteu chengcheng chun kigalvan in na unauteu Israel te masanga chieh in a makai un pang u hen.

¹⁹ Ahihziekin, na zi na chateu leh na ganchateu chengcheng chuh nang u ka hun piek khuo haw ahin a na um u hen (gancha na hau ui tih ka he ngâla);

²⁰ Lalpa na Pathien un Jordan tumlam a amau gam a piek chuh a luoh det masangsieh u leh Lalpa’n zie muna hi nang uh thamuong taka a hun chensak guola amau le zie a chuh a chensak masangsieh vang chuh, na unau dangteu Israel te chuh va panpih un; zie zawh chuleh nang u ka hun piek zie gam ahin hungkit chiet na’n lau,” ti’n thu ka hun pie a,

²¹ Chun, zielai mah khan Joshua chuh, “Zie leng nih te chunga Lalpa na Pathien un a hih chengcheng kha na mit ngêi un na mu tau a; na chiehna ding lam u a gam haw chule Lalpa’n khutimah a khah hih ding ahi.

²² Amau chuh lau kiu in; Lalpa na Pathien un, amah ngêi in, hun dopih ding ahi ngâla,” ti’n thu ka pie a.

Pisgah Tang a Mosi

²³ Chun, zielai mah khan, Lalpa kawmah ka na ngên tûntûn ta a,

²⁴ “Aw Lalpa Pathien, na suok hi na lopina leh na khut hât chuh na muhsak pan ta a; lei leh van a le, na thilhih haw tawbang leh na thilhih thupi tak tawbang hih thei bang pathien a um?

²⁵ Ei galkaih sak ngâl ngâl inla Jordan khel lama gam phatak leh, zie tâng hawihtak leh Lebanon ngêi chuh ei muhsak teitei uo,” ti’n.

²⁶ Himahleh, nang haw ziekin ka chung ah Lalpa chuh a lungna mah mah a, ka thu chuh a pawm nuom ta puoh a; khutichun, Lalpa chun, “A hun tai, zie thu hin ei hopih kit ta ki’n;

²⁷ Pisgah tângsip ah chieh to zawn la, tumlam leh mâllam, simlam leh suohlamte va thîl viel in la; na mit ngêi in gam chuh va enviel zaw mai in; zie Jordan hi vang chuh kân lo ding na hi ngâla.

²⁸ Ahih ziekin, Joshua hi thu pie’n la, tîlkhoh in la, suhat in; zie mipite hi puikai in tin, na va muh ding gam chuh luoh sak ding ahi,” ei ti ta a.

²⁹ Khutichun, Bethpeor gala phaicham akhan I um zing tau ahi kha.