DAN NIHNA 23 - PATHIEN LEKHABU THIENGTHO (BSI)

Israel te laka Tel sak Loh dingte

¹ “Mi, a tilchang kek leh a zahmawh kitan haw chuh Lalpa mite kikhawpnaa a tel loh dinguh ahi.

² “Zaucha leh a suonte chuh khang sawmna chana Lalpa mite kikhawpnaa simtel loh dinguh ahi.

³ “Amon te leh Moab te leh a suonteu chuh khang sawmna chana Lalpa mite kikhawpnaa a tel loh dingu ahi;

⁴ Aigupta gam apat na hung pawt lai u a an leh tui a hun piek nawp loh ziekun leh Mesopotamia gama Pethor khuo a um, Beor chapa, Balaam chuh nang u hun gausap dinga a gawih ziek u khan.

⁵ Ahih ziekin, Lalpa na Pathien un Balaam thu chuh a limsak puoh a, Lalpa na Pathien u chun a hun hehpih ziekin gâusapna chuh nang u dinga vangsakna Lalpa na Pathien u chun a chansak zaw ta ahi kha.

⁶ Nam khata na din lai chan un amau tawh kichamna ding leh a lamzanna dinguh bangmah na ngaihtuoh dinguh ahi puoi.

⁷ “Edom mite chuh na pawng ten dinguh ahi puoi, na unauteu ahi ngâl u a; Aigupta mite le na pawng ten dinguh ahi diek puou hi, a gam u ah na va malzin ta ngâl u a.

⁸ A suonteu chuh khang thumna apat in Lalpa mite kikhawpnaa chuh a tel dinguh ahi.

Kidona Giehmun Thiengtho

⁹ “Gâl do a na giehnau a chuh zeklechan thila hun subuok thei chengcheng lak apat na kikawih kieng dinguh ahi.

¹⁰ Na lak u a kuole mang siet zieka zan kal a amah a thil pawt zieka buok a um chun, giehmun pawlama a chieh dawka, a hung um den phawt ding ahi; giehmun a chuh a lut kit ding ahi puoi;

¹¹ Ahih ziekin, hiti hi hi’n tin, nitâk lam a hunghih tak leh kisil intin, ni a tum tak leh giehmun a chuh a lut kit chauh ding ahi.

¹² “Chun, giehmun pawlam ah mun guot chuom unla, zie a chuh zun leh ek na va thak sek dinguh ahi;

¹³ Na gâlvan lak u ah suohdul le keng tel in na tin un; chun, hiti hi hi’n tin, pawlama na dailen ding tak u leh zie chuh lei laihkuokna a na mat u a, chun, na vuk kit dinguh ahi;

¹⁴ Lalpa na Pathien u chun nang u hun vengbit ding leh na melmateu na khut u a hun pie dingin na giehmun vel uh achun a vakviel sek ngâla; zieziekchun, na giehmun chuh a thientho ding ahi; khutilochun, na lak u ah thil buok mu’n tin, hun kiheimangsan kha’n a.

Dan Chuom chuom

¹⁵ “Mi suok a um, a pu hun taihsana nang u hung bel a um chun, a pu na piek kit dinguh ahi puoi:

¹⁶ Na khuo lak u a a utna pên a tel a chuh na chensak zieng dinguh ahi; na nuoisieh dinguh ahi puoi.

¹⁷ “Israel chate lak ah nawhchizuok a um loh ding ahi, Israel chapate lak ale Sodom mi a um loh ding ahi

¹⁸ Nawhchi man ahim, uicha man ahim chuh kitiemna sukpitin na dinga Lalpa Pathien In a na hun chawih ding ahi puoi; a khawi zaw chule Lalpa na Pathien u a ding a thil tenum ahi.

¹⁹ “A pung delh a na unaute thil na palâksak ding ahi puoi; paisa hitaleh, buh leh bâl hitaleh, bangmah a pung um himhim a na palâksak loh ding ahi:

²⁰ Gam chuom mite chuh a pung um dingin palâksak thei in na tin un; ahihziekin, na unauteu chuh a pung delhna a na palâksak dinguh ahi puoi; khutichun, na valuoh dingu gam achun na khutsuok ta phawt uh Lalpa na Pathien u chun hun vangsak ding ahi.

²¹ “Lalpa na Pathien u kawma thu na tiem tieng u leh khawngai-khawngai lo a na piek pai zieng dinguh ahi; Lalpa na Pathien u chun na kitiemnau chuh hun nawhsie tei ding ahi ngâla; chun, kitiemna sukpitin loh chuh gitlohna ahi.

²² Ahih ziekin, kitiemna neilo a na um chun, nang dingin gitlohna hi puo’n a.

²³ Na kam u a pawt taphawt chuh na zuih u a na hih dinguh ahi; Lalpa na Pathien kawma, nang thu a, na kam ngeia, kitiem na hih ziekin.

²⁴ “Na invengte grep huon a na chieh tieng u leh na duh zahzah uh ne thei inlau, ahih ziekin, seng sunga na siem dinguh ahi puoi.

²⁵ Na invengte buh lo a na chieh u chun, buh vui chuh na khut in sik thei in na tin un; ahih ziekin, kawite vang na pat gunsêt dinguh ahi puoi.