DAN NIHNA 18 - PATHIEN LEKHABU THIENGTHO (BSI)

Thiempute Chanvo

¹ “Thiempu chi Levi te, Levi phung chengcheng chun, Israel te laka gam chan leh luoh a neih dinguh ahi puoh a; Lalpa kawma thillat meia hâl haw chuh a nek dinguh ahi zawi, zie chuh amau gochan diktak ahi ngâla.

² A unauteu lak ah gochan a neih dinguh ahi puoi; a kawm uh a a tiem guol khan, Lalpa chuh a gochan uh ahi ngâla.

³ “Mipite’n kithawihna a bâwngchal ahim belam ahim a pieknau a thiempute chan ding chuh ziehi ahi; a dâk leh a kha te nih leh a bupi chuh thiempute a piek dinguh ahi.

⁴ Na buh u leh na uain u leh na sathau uh leh na belam mul met masak pên uh chuh amau na piek dinguh ahi.

⁵ Lalpa na Pathien un na phung chengcheng lak u a Lalpa min a nasem a um kumkhuo dingin amau leh a suonteu chuh a tel ahi ngâl u a.

⁶ “Levi mi kuole, Israel gama a chênna, na khuou khawipen chuh hitaleh,

⁷ pawtdawksan a, a lungthima thalawp taka Lalpa maa um sek a suohpihte, a Levi chanpihte tawbang mah a Lalpa a Pathien min a na a sep ding ahi.

⁸ A pa go a khawtna a a muh bân ah, thiempu dangte chan zahzah nek ding amah le a chan ding ahi.

Ginglote apat Kivenna Ding

⁹ “Lalpa na Pathien un a hun piek gam chuh na tun tieng u leh zie muna chuh ana um nam dang haw thil chîn tenum haw chuh na chîn loh dinguh ahi.

¹⁰ Na lak u a kuole, a chapa ahim, a chanu ahim kithawihna a meia hâllup chîngte, aisân chîngte, phunsân chîngte,

¹¹ zawldeih-âi a mi dawih chîngte, thitha zawlte, mitvaidawi thiemte, mithi thagau hopih chîngte himhim a um dinguh ahi puoi.

¹² Zie thil haw hih chîng taphawtte chuh Lalpa ngaih in mi tenum ahi ngâl u a: chun, zie thil tenum haw a chîn ziek u a chuh Lalpa na Pathien un na mau a a nawhdawk ahiu hi.

¹³ Lalpa na Pathien mau a na phat bukim dinguh ahi.”

Thiemgau Sawl Ding Thutiem

¹⁴ “Zie na va luoh dingu gama ana cheng nam haw chun phunsân chîngte leh âi et chîngte thu chuh a ngaikhawk sek u a: nang haw’n vang zie guola na hih dingu chuh Lalpa na Pathien un a phal lo ahi.

¹⁵ Lalpa na Pathien un na lak u apat ngêi in kei tawbang thiemgau hun siem sak intin; a thu chuh na ngaihkhawk dinguh ahi;

¹⁶ “Lalpa I Pathien awu chuh ei hetsak ta ki’n la, zie mei nasatak hi ei muhsak kit ta ki’n; dân leh thi kha’ng kau, ti a Horeb tânga kikhawpkhawm ni a Lalpa na Pathien u kawma na nget guol ngêi u khan.

¹⁷ Ziephet chun, Lalpa’n ka kawmah, ‘A thil gen u hi aphai.

¹⁸ A suohpihteu lak apat ngêi in amau dingin nang tawbang thiemgau tungdawk ing ka ting; a kam ah ka thu haw chuh kawih ing ka ting, a kawma thu ka piek cheng chuh a kawm u ah gen ina.

¹⁹ Chun, hiti hi hi’n tin, ka min a ka thu a gen ngaikhawk lo taphawt chuh a chungchâng chuh keimah ngêi in ngaihtuoh ing ka.

²⁰ Ahih ziekin, a gen dinga thu ka piek hilo ka min a gen thiemgau taphawt chuh suklup ding ahi.’

²¹ “Chun, na lungthim u a, Thu chuh Lalpa gen ahi puoi tih bangti’n I he thei dingu? na tih u chun,

²² Thiemgau in Lalpa min a thu a gena, a thugen chuh a hung tun loh a a lawhtin loh chun, zie chuh ahi Lalpa gen loh thu chuh; thiemgau chun thu chuh a ginchak thu a gen maimai ahi zawi, amah chuh lau kiu in, a ti a.