DAN NIHNA 16 - PATHIEN LEKHABU THIENGTHO (BSI)

Chiehkân Kut

¹ Abib tha chuh umnit unla, Lalpa na Pathien u dingin Chiehkân Kut chuh lawm un: Abib tha hin ahi Lalpa na Pathien un Aigupta gam apat a hun puih dawk chuh.

² Lalpa’n a Min umna dinga a tel ding mun achun Lalpa na Pathien u kawmah Chiehkân kithawihna dingin na ganchau, belam ahim, bâwng ahim pieu in.

³ Chângthâk chawl kisawh tawh na nek dinguh ahi puoi; ni sagih sung chângthâk chawl sawhloh, gimtheihna chângthâk, chuh na nek dinguh ahi zawi, kinlebuong a Aigupta na nutsieh lai u a na nek u tawbang kha; khutia chuh na damsung cheng u a Aigupta na nutsieh niu kha na hetzing theihna dingun.

⁴ Ni sagih sung chuh na gamsung u a chawl himhim a um loh ding ahi; chun, ni khat ni nitâk lama na kithawihnau sa chuh zankhuo a zingkal chana a um ding ahi puoi.

⁵ Lalpa na Pathien un a hun piek na khuou khawimah ah Chiehkân kithawihna chuh nei thei puo’n lau;

⁶ Lalpa na Pathien un a Min umna a guot ding mun chauh achun hi zawna; zie muna chuh Aigupta apat na hung pawt niu champha leh nitâk lam in, nisa tum nung in, Chiehkân kithawihna gancha chuh na thah dinguh ahi.

⁷ Em min thawh in na tin un, Lalpa’n mun a guot ding achun nen na tin un, chun; a zing chuleh na puon-In chiet u a na chieh dinguh ahi.

⁸ Zie zawh ni gup sung chuh chângthâk chawl sawhloh na nek dinguh ahi; a ni sagih ni chuleh Lalpa na Pathien u a ding a kikhawppi thiengtho hi’n tin, zie ni chuleh na himhim na sep loh dinguh ahi.

Pawltâk Kut

⁹ Hapta sagih sim in na tin un; na buh ât pat niu apat in hapta sagih chuh na sim dawk dinguh ahi.

¹⁰ Lalpa na Pathien un a hun vangsak dân dungzui zelin, na sepgah lak u a na ngamtawk thilpiek hawu chuh pie’n, Lalpa na Pathien u dinga Hapta Kut chuh na mat dinguh ahi;

¹¹ Lalpa na Pathien un a Min umna dinga a tel ding mun achun nang u leh na chapateu leh na chanuteu tawh, na suokpateu leh na suoknu teu tawh, na khuou a um Levi te tawh, chun, na lak u a um gam chuom mite leh nauchagahte leh meithaite tawh Lalpa na Pathien u maa chuh kipâk taka na um dinguh ahi.

¹² Aigupta gama khan suok na hiu hi tih na hetzing dinguh ahi a; chun, zie dân haw hi chingthei taka na zuih dinguh ahi.

Bâwkcha Kut

¹³ Na phuol u apat leh na greptui thawkna khuk u apat a pawt chengcheng na lâkkhâwm zawh tiengu leh ni sagih sung chuh Bâwkcha Kut na mat dinguh ahi;

¹⁴ Na kut nau a chuh, nang u leh na chapateu leh na chanuteu tawh, na suokte tawh, na khuou a um Levi mite leh gam chuom mite tawh, nauchagahte leh meithaite tawh, kipâk taka na um dinguh ahi.

¹⁵ Lalpa’n a guot ding muna chuh Lalpa na Pathien dingu a ni sagih sung chuh na kut dinguh ahi; Lalpa na Pathien un na sepgahteu leh na khut nasepteu chengcheng chuh hun vangsak intin, na kipahnau chuh hung bukim ta’n a.

¹⁶ Kum cheng leh na lak u a pasal cheng, a guot ding muna chuh, Lalpa na Pathien mau a thumvei a va kilat chiet dinguh ahi; Chângthâk Chawl sawhloh Kut leh Hapta Kut leh Bawkcha Kut haw ahin; chun, Lalpa maa kuomah khut ngawn a a hung dinguh ahi puoi;

¹⁷ Lalpa na Pathien un a hun vangsak dân dungzui zela mi chengin a theih dân chiet u a thilpiek a hun ken chiet dinguh ahi.

Diktaka Vaihawm Dingdan

¹⁸ Lalpa na Pathien un a hun piek na kulh kawtkhak chengah, na phung cheng u apat in, vaihawm ding leh hotu ding tel unla; amau chun mipite chunga diktaka vai a hawm dinguh ahi.

¹⁹ Thudik heikawi a vai na hawm dinguh ahi puoh a, kuomah panpih chuom na neih dinguh ahi puoi; gawlhgukna na lak loh hiel dinguh ahi; gawlhgukna chun mipilte mit chuh a sudûk seka, mi dikte thu chuh a heikawi sek ngâla.

²⁰ Lalpa na Pathien un a hun piek gam chuh na luoh u a, zie gama chuh na chen zawm zel theihna dingun, thudik chuh na zuih dinguh ahi.

²¹ Lalpa na Pathien u maichâm na siem tiengu leh a sika chuh Aserah pathiennu lim thing khuom na phuh dinguh ahi puoi.

²² Lalpa na Pathien un a hawt, suong zek le na phuh loh hiel dinguh ahi.