DAN NIHNA 14 - PATHIEN LEKHABU THIENGTHO (BSI)

Mithi Sûn dân Diklo

¹ Lalpa na Pathien uh chate na hiu a; mithi sûnna a na ki-ât keh dinguh ahi puoh a, na mit mul u le na met kawlh dinguh ahi puoi;

² Lalpa na Pathien u a dinga nam thiengtho na hi ngâl u a, khawvel a nam chengcheng lak apat amah a ding chuom a a hun teldawk na hih ziekun.

Sa Thieng leh Thienglo

³ Thil tenum himhim na nek loh dinguh ahi.

⁴ Zie sa haw hi ahiu na nek theih ding hawu chuh: bâwngchal haw, kelcha haw,

⁵ Sakhi haw, sangai haw, sakhineute haw, sakel haw, gamkel haw, sakhi hang chi haw, gam belam haw hi.

⁶ Chun, sa taphawt, a tin kika a, a tin kika suok keia, a kha thai thei taphawt chuh ne thei inlau.

⁷ Ahih ziekin, ziehaw hin kha a thai nau a, a tin u le a kika na a, na nek dinguh ahi puoi: sangawngsau haw, sazupi haw, sangawi haw hin a khau chuh a thai nau a, a tin uh a kikak loh ziekin nang u dingin a buok ahi.

⁸ Chun, vawkcha hi a tin chuh a kika na a, khathai lo ahih ziekin nang u dingin a buok ahi; a sa na nek loh dinguh ahi a, a luong le na sukkhak loh dinguh ahi.

⁹ Tui laka cheng lak ah ziehaw hi ne thei inlau: tha leh phulip nei taphawt chuh ne thei in na tin un,

¹⁰ Tha leh phulip neilo taphawt vang chuh na nek loh dinguh ahi, nang u dingin a buok ahi.

¹¹ Vacha thieng chengcheng chuh ne thei inlau.

¹² Ahih ziekin, ziehaw hi chuh na nek dinguh ahi puoi: muvanlai haw, mulukawlh haw, mubuong haw,

¹³ Musîng haw, muthîl haw, mu chi himhim haw;

¹⁴ Va-âk chi himhim haw;

¹⁵ Vacha sang gienguon haw, vabak haw, tuisuohgiet va haw, mu chi himhim haw;

¹⁶ Gitgal haw, simbuchanglit haw, simbupi haw, tui vatawt haw;

¹⁷ Va keng sang haw, luidung mu haw, mu vatawt haw;

¹⁸ Tuizanva haw, tuiva himhim haw, vakhuongthu haw leh bâk haw hi.

¹⁹ Ganhing neu lung leh khaupe chi, tha nei chi himhim haw hi nang u dingin a buok ahi a; na nek dinguh ahi puou hi.

²⁰ Ahih ziekin, ganhing neu tha nei taphawt chuh ne thei inlau.

²¹ Ganhing thikam taphawt chuh na nek loh dinguh ahi; na lak u a cheng gam chuom mite chuh a nek dingun pie thei in na tin un; gam chuom mite kawm achun zuok thei inlau; ahihziekin nang u chuh Lalpa na Pathien ding u a nam thiengtho na hiu hi. Kelno chuh a pi nawitui a na huon loh dinguh ahi.

Sawma-khat

²² Kum cheng leh na lo u a na thawhgah teu chuh sawma-khat na piek ngêi ngêi dinguh ahi.

²³ Lalpa na Pathien uh lauh dân na hetzing theihna dingun na buh teu, na greptui teu, na olive thau teu sawma-khat leh na bâwng hawn u leh na belam hawn lak u a suok masapen haw chuh Lalpa na Pathien masanga, a Min umna dinga a guotna ding muna chuh na nek dinguh ahi.

²⁴ Lalpa na Pathien un hun vangsak ngâla, A min umna dinga a guotna mun chuh a gamlat takluot a na lampiu a sauh takluot zieka na puok theih loh u chun,

²⁵ Sum suoh unla, sum chuh chawi unla, Lalpa na Pathien u mun guotna a chuh na chieh dinguh ahi;

²⁶ Chun, na duh pên uh, bâwngchal ahim, belam ahim, uain ahim, zu hat ahim chawkna’n paisa chuh mang unla, Lalpa na Pathien u ma achun ne’n na tin un, kipâk taka na um dinguh ahi, nang u leh na inkuonteu tawh.

²⁷ Na khuou a cheng Levi te chuh ngaihthah kiu in; na lak u ah chanvo le gochan le a nei puoh ngâl u a.

²⁸ Kum thum a beih cheng leh zie kum a na lo u a na thawhgah hawu sawma-khat chuh puo khawm unla, na khuou a na khawlkhawm dinguh ahi;

²⁹ Na lak u a bangmah chanvo leh gochan neilo Levi te leh gam chuom mite leh nauchagah te leh meithaite chuh a hung u a, a nek u a, a tai theihna dingun; khutia chuh na hih u chun na khut nasepteu chengcheng achun Lalpa na Pathien un hun vangsak ding ahi.