DAN NIHNA 13 - PATHIEN LEKHABU THIENGTHO (BSI)

Pathien Dang Ho

¹ Na lak u a thiemgau ahim, mang leh thei ahim a hung um u a, melchikna ahim thilmak ahim a phuon u a.

² Zie melchikna ahim thilmak ahim chuh a hung guitun a, na het khâk loh uh, “pathien dang zui hiting un, a nau sem hitiu,” na kawm u a a tih u chun,

³ Zie thiemgau ahim mang leh thei ahim thu chuh na pawm dinguh ahi puoi; Lalpa na Pathien u chun na lungthim chengcheng u leh na hinna chengcheng un Lalpa na Pathien u chuh na hehpih u leh na hehpih loh uh hetna dinga a hun patep na hiu hi.

⁴ Lalpa na Pathien u chuh na zuih u a, amah chuh na lauh u a, thupiek haw chuh na zuih u a, a thugen haw chuh na pawm u a, a na na sep u a, amah chuh na tûk det zing dinguh ahi.

⁵ Chun, zie thiemgau ahim, mang leh thei ahim chuh suklup ding ahi. Aigupta gam apat hun puidawk a, suok apat hun tandawk Lalpa na Pathien un hawh ding thu a hun piek lampi apat chuh hun petmang sak dinga Lalpa na Pathien u chunga helna thu a gen ziekin. Zie tawbanga chuh na laku a thil phalo chuh na sukmang dinguh ahi.

⁶ Na suohpih ahim, na chapa ahim, na chanu ahim, na pawmlai na zi ahim, na guol phapen ahim in na pileputeu ho khâk loh pathien dang ho dingin a hun thêm thei u a,

⁷ Na kawm u a chêngte pathien ahim, gam gamla taka chêngte pathien ahim kâwlmawng langkhat a pata langkhat chan mite ho dingin a hun hopih thei u a.

⁸ Ahih ziekin, zie tawbang mi haw chun a hun thep paih dinguh ahi puoh a, a hun thudawt u chuh na ngaihthak dinguh ei puoi. Na lungsiet u a, na selguk u a, na hinhawih ding u le ei puou hi.

⁹ Na suklup teitei dinguh ahi zawi; a sulum dingin nang na khuttha masa’n na tin, zie zawh chuleh mipi chengcheng in tha’n au.

¹⁰ Suong a na sehlup dinguh ahi, Aigupta gam apat a suok a na tânnau apat hun puidawk Lalpa na Pathien u apat hun puih mang a guot ziekin.

¹¹ Khutichun Israel mi chengcheng in he’n tin un, lau intin un, zie tawbang thil phalo himhim chuh na lak u ah kuoma’n hih kit ta puo’n au.

¹² Lalpa na Pathien un na chênna ding u a a hun piek khuo khata chuh,

¹³ Na laku apat Belial chate hung pawt in, “Khawi tiem u, pathien danghaw ho hitiu,” ti a na het khâk loh uh pathien haw ho dinga khuo a mipite chuh a puihmang thuu na het u chun;

¹⁴ dawng viel unla, hawldawk unla, phachuomngai takin dawng kimvel un; chun, ngaitie, thudik ahih a, zie tawbang thil tenum chuh na lak u ah hih ahi tih hetchien ahih chun;

¹⁵ zie khuo a chêngte chengcheng chuh chemzâma na thah teitei dinguh ahi a; a sunga chêngte leh a ganchateu chengcheng chuh chemzâma na thah chimit dinguh ahi.

¹⁶ Chun, gâllâk thil chengcheng chuh khawlai mun âwng ah lakhawm unla, khawpi leh gâllâk thil chengcheng chuh Lalpa na Pathien u a dingin hâlmang thilpiek in mei in hâltum un; kumkhuo’n thilsie’n um intin, tundin kit hita puo’n a.

¹⁷ Zie hansie lawh sa thil haw chuh khat le na khawih loh dinguh ahi; Lalpa chun a lungnatna nasatak chuh haihsan intin, zahngaihna hun muhsak intin, hun lungsiet intin,

¹⁸ Lalpa na Pathien uh mitmuh a thilpha hih ding thupiek chengcheng, tu a ka hun piek hi na zawp phawt u chun hun hih pung ding ahi, na pileputeu kawma a kihâksiel bang khan.