DAN NIHNA 10 - PATHIEN LEKHABU THIENGTHO (BSI)

Thu Sawm Piek Lâk kitna

¹ “Zielai chun Lalpa’n ka kawmah, ‘Suongpek nih tuma a tawbang kha sêk kit inla, tâng achun ka kawmah hung to inla, a bawm dingin thing siem in.

² Chun, suongpek masa na seh phel haw chunga kizik thu haw kha zie suongpek haw chung achun zik ing ka ting, a bawma chuh na kawih ding ahi,’ a ti a.

³ “Khutichun, sittim thing a bawm dingin ka siem a, a ma a haw tawbang in suongpek nih ka seka, zie suongpekte nih chuh chawiin tâng achun ka chieh to ta a.

⁴ Chun suongpekte nih achun a masa haw chunga kizik tawbang, na kipunkhawm niu a tânga mei apat a Lalpa’n na kawm u a a gen Thu sawm piekte chuh a zika, Lalpa chun ei pie a.

⁵ Ziephet chun, tâng apat chun ka hung suka, Lalpa thu ei piek guolin suongpek haw chuh bawm ka siem achun ka kawih a; zie chun a um zing ta a.”

⁶ Chun, Israel suonte chuh Jaakan suonte gam Beeroth tuilaihdawk apat chun Moresah ah a chieh tau a; zie chun Aron chuh a thi a, zie chun a vui u a; chun a chapa Eleazar chun a thatheng in thiempu na a sema.

⁷ Zie apat chun Gudgodah ah a chieh u a; luicha tamna gam, Jotbathah lam achun a chieh zel tau a.

⁸ Zielai chun, tuni chana a hih zing uh, Lalpa thuthun bawm zawna pang ding leh Lalpa maa a na sema, a min pakcha dingin Lalpa’n Levi te chuh a kawih chuom ta a.

⁹ Zieziekchun, Levi mite chun a suohpih teu lak ah chanvo le, gochan le a nei puou a; Lalpa Pathien in na kawm u a a gen guolin, Lalpa chuh a gochan uh ahi zawi.

¹⁰ Chun, a maa tawbang khan tâng achun ni sawmli leh zan sawmli ka va uma; zie chung chun le Lalpa’n ka thu a ngaitha a, Lalpa’n a hun sukmangthai nawp tâk loh ahi kha.

¹¹ Chun, Lalpa’n ka kawmah, “Kipan inla, mipite ma pui ah; amau piek dinga a pileputeu kawma kihâksiela ka tiem gam chuh a luoh dinguh ahi,” a ti a.

Pathien Thilphut haw

¹² Khaile, Israel mite haw, na laku a Lalpa na Pathien un a ngek chuh bangmah dang ahi puoh a, na phatna dingu a Lalpa na Pathien u lau a, a lampi chengcheng chuh hawh a, amah hehpih a, na lungthim chengcheng u leh na lunggil chengcheng u a Lalpa na Pathien na chuh sema,

¹³ Lalpa thupiek haw, a dân haw zuih dinga tu a thu ka hun piek pawm hi ahi.

¹⁴ Ngaitiem u, van leh, vante van leh, lei leh a sunga um chengcheng hi a bawnin Lalpa na Pathien u a ahi.

¹⁵ Ahihziekin, na pileputeu hehpih chuh a thalawpna lam ahi a, a suonteu nang haw hi nam dang chengcheng sanga a nam tel na hi tau hi, tunia guol ngêi hin.

¹⁶ Zieziekchun, na lungthim zek uh tan unla, lochal ta kiu in.

¹⁷ Lalpa na Pathien u hi pathiente Pathien, lalpa te Lalpa, Pathien lopi tak, hât tak, tizat-um tak, deihsak chuom neilo leh gawlhgukna le la khalo ahi ngâla,

¹⁸ Pa neilote leh meithaite chuh diktakin vai a hawm sak seka, gam chuom mite chuh nek ding leh silh ding pien a hehpih sek.

¹⁹ Zieziekchun, gam chuom mite chuh nangun le hehpih un; nang u le Aigupta gama khan gam chuom mi na hiu kha.

²⁰ Lalpa na Pathien chuh na lauh u a, a na nasep u a, amah chuh na tuk det u a, a min a na kihâksiel dinguh ahi.

²¹ Amah chuh na pahchak dinguh ahi a, na mit ngêi u a na muh uh thil thupi tak leh lauh-um tak haw nang u dinga hih na Pathien uh ahi.

²² Na pileputeu chuh Aigupta gam ah sawmsagih a chieh suk u a; tuhin chuh tam lam ah van a aksi zah in Lalpa na Pathien un a hun supung ta ahi.