DANIEL 9 - PATHIEN LEKHABU THIENGTHO (BSI)

A mite dinga Daniel Pauchamna

¹ Ahasuer chapa Darius, Media mi chun Babulon gam chungah vai a hawm a.

² A vaihawm kum khatna achun, lehkhabu thiengtho chuh ka sim a, Lalpa’n thiemgau Jeremia kawma Jerusalem sietna ding tiem hunsung kum zah chuh ka na hethiem ta a, kum sawmsagih chuh!

³ Tichun, an ngawlin, kawlladip puon silh in, vut laka kibuol in, Lalpa Pathien kawm achun phachuomngai takin ka paucham ta a.

⁴ Lalpa ka Pathien kawm achun ka paucham a, ka kiphuong a, “Aw Lalpa Pathien, lopi tak leh lauh um tak, nang hun hehpih a, na thupiek zawp sekte kawma thugawlh sudet in lungsietna na latsak sek a.

⁵ “Na thupiek leh vaihawmte apat chieh pet in ka na gilo tau a, diklo tak leh nunsie takin thil ka na hih u a; ka na hel tau a,

⁶ Na suok thiemgaute’n, ka lengteu leh ka lawiupateu kawm leh nam mipite kawma na min a a thugenteu chu ka na ngaitha ta puou a.

⁷ Aw Lalpa, diktatna chuh nanga ahi a, kei hawn vang keimauhaw chung ngêi ah zahchâkna ka kitut tau ahi. Zie chuh Juda mite leh Jerusalem a chêngte leh Israel na nawhzakte, gamla leh naia umte chunga le a dik hi.

⁸ Aw Lalpa, na chunga ka na gitloh tâk ziekun, keihaw leh ka lengteu, ka milienteu leh ka pateu chun zahchâk um takin thil a na hih tau hi.

⁹ Zaidawhna leh ngaihdamna chuh ka Pathien u chun a nei a; a chungah a na hel ta mahleu hing le,

¹⁰ Na suok thiemgaute manga na dân dung zuia hing dinga nei na hilh na chuh aw Lalpa Pathien, ka ngaitha diek puou ui.

¹¹ Ahi, Israel te chengcheng chun na dante bawhsie’n, na thugente chuh a ngaitha nuom puou ui. Na chungah ka na gilo tau a khutichun, na suok Mosi dana kizik hansiete chuh ka chung u ah na hun tun sak ta a.

¹² Chun, a thu ka chung u a a gen leh ka vaihawm teu, vai ei hawmsakte chunga a gen kha ka chung u a thil phalo nasa tak tunsak in a hih kim ta a: Jerusalem chunga kihih bang chuh vannuoi pumpi ale hih in a um ngei puoi.

¹³ Mosi dana kizik bangin zie thil phalo chengcheng hi ka chung u ah a tung a, himahleh, ka manlohna teu chuh lehngatsan in na thudik hetthiem nate ka neih na dingun Lalpa ka Pathien uh lung-awihna chula ka hawl diek puoh ngâl u a.

¹⁴ Zieziekchun, Lalpa chun thil phalo chuh a en zinga, ka chung u ah a hun tunsak ta a; Lalpa ka Pathien u chuh a thilhih chengcheng ahin a diktat ngâla, a gen ka na ngai talo uh ahi.

¹⁵ “Chun, tuhin, Aw Lalpa ka Pathien uh, Aigupta gam apat a khut hât tak leh thilhih thei taka na mite puidawkpa leh minthanna leh minphatna tuchana kisiempa, ka gilo tau a, nunsie takin thil ka na hih tau hi.

¹⁶ Aw Lalpa, na diktatna chengcheng ziekin na lungnatna leh na lung-awihloh na chuh na khawpi Jerusalem, na tâng thiengtho apat chun kiheimang dingin ka hun ngên hi; ka gitlohnateu ziek leh ka pateu manlohna ziekin Jerusalem leh na mite hi ka kimvel u a mite chengcheng lak ah gensiet a hung hi tai.

¹⁷ Zieziekchun, Aw ka Pathien uh, tuhin na suok pauchamna leh ngetna hi ngaitha’n la, Lalpa ziekin na mun thiengtho hawmsa chung achun na mel hih vakin.

¹⁸ Aw ka Pathien, na bil dawh in la, ngaitha tie; na mit hak inla, ka haksat zieu leh khawpi na min vawh a um hi entie; ka ngetna teu chuh ka diktatnau ziekin na ma a ka lat uh ahi puoh ngâla, na zahngaihna lopi tak ziekin ahi zawi.

¹⁹ Aw Lalpa ngaitha tie, Aw Lalpa ngaidam in, Aw Lalpa, ngaitha’n la hih in. Aw ka Pathien nangmah ziek mah mah in na khawpi leh na mite na min vawh a a um ziek un” ti’n.

Gabriel in Hilhlawkna a Genchetna

²⁰ Chun, keimah gitlohna leh ka mipite gitlohna thupha chawi kawm leh, a Ho-In thiengtho hun tungding kit dinga Lalpa ka Pathien kawma ngên a paucham in ka um zing a.

²¹ Khutia ka paucham lai tak chun, Gabriel, kilâkna masa a ka muh ngêi khan, nitâk lam kithawih hun lai vel tak chun hât taka leng in ei hun zuon a.

²² Chun, hetthiemna ei neih saka, ei hopih a, ka kawmah, “Aw Daniel, hetthiemna ching tak hun neih sak dinga hung pawtdawk ka hi.

²³ Na nget pat tung khan thupiek a pawtdawk ta a, A hun hilh dinga hung ka hi; deihum tak na hi ngâl a; zieziekchun, thil chuh ngaihtuoh in la, kilâkna chuh hethiem in.

²⁴ “Na mite leh na khawpi thiengtho hi gitlohna leh thil gilo apat a zalen taka a umna ding chun hapta sawmsagih hi ding ahi. Zie tieng chu leh gitlohna ngaihdam hi’n tin, vaihawmna dik chuh kumlekhuo a dinga sukdet hi’n tin. khutichun hilhlawkna thu leh kilâkna thu chuh hung tungkim intin; chuleh, Ho-In thiengtho chuh lat thak kit hi ta’n a.

²⁵ Ziehi tiemteh inla, hethiem tei in: Jerusalem tundin kitna ding thupiek a hih apat Pathien in a tel ngêi, leng khat hung um tiengin Hapta sawmsagih bei in a. Zie hun sung chun Jerusalem khawlaite leh kulhte chuh siemphat hi’n tin, zie chuh hapta sawmgup le nih sung ding hi’n tin; himahleh zie hun sung chuh hun buoium lai tak hi’n a.

²⁶ Zie hun chuh a hung tâwp tieng leh, Pathien tel ngêi leng chuh diklo taka thah in um in a. Leng dang thil hihthei tak sepaihte chun hun do untin, khawpi leh Jerusalem chuh suksiet in um in a. A tawpna chuh tuilien bangin hung intin; Pathien in a guonggalhsa, kidona leh sietna chuh hungtung in a.

²⁷ Zie leng, thilhih thei tak chun nam tam takte tawh hapta khat sunga dingin thugawlh dettak siem untin, zie hun kimkhat a beih tieng chu leh kithawihnate leh thillat te chuh hihtawp in a. Mun thiengtho ah, Thil kihdak-um, Luoksuok-um tak kawih in um intin, zie chuh a kawihpa ngêi tawpna dinga Pathien in a guotsa chuh a hungtun macheng chuh zie tak achun um zing in a,” ti’n.