DANIEL 6 - PATHIEN LEKHABU THIENGTHO (BSI)

Sakeibaknei Kul a Daniel

¹ Chun, Darius chun a gam pumpi paw dingin gam awptu za leh sawmnih teldawk chuh pha a sa ta a.

² Chun, amau chung achun lawiupa thum a guot kit a, a lak u a khat chuh Daniel ahi a; zie gam awptute hin a kawmah thute a tun zel uh ahi, ti a chu Darius chun haksatna a neih lohna dingin.

³ Chun, Daniel hin lungthim pha chungchuong a neih ziekin lawiupa dangte leh thuneite dang sang chun a hung challang pai ta a. Zieziekchun, leng chun a lalgam pumpi chunga kawih chuh pha a sa ta a.

⁴ Tichun, lawiupa dangte leh thuneitu dangte chun Daniel chunga thiem lohna ding chu a hawl tau a. Himahleh a thiemlohna ding himhim a mu thei puou a, a diklohna le a mu thei diek puou ui. A ginum mah mah ziekin amah achun sukkhelh ahim, diklohna ahim muh ding a um puoh ngâl a.

⁵ Tichun, zie mite chun, “A Pathien dân thu tih loh achun a thiemmawhna ding Daniel chunga hin mu lo ding I hiu ui,” a kitiu a.

⁶ Tichun, lawiupate leh thuneite chu leng kawm achun a kikhawm u a, hiti hin a gen u a, “Leng Darius, kumkhuo’n dam in.

⁷ Lenggam lawiupate, vaipawte leh thuneite, lemguotte leh gam pawte chengcheng chuh ni sawmthum sunga, aw lengpa, nangmah kawm tih loh achun pathien ahim, mihing ahim, kawma ngetna nei taphawt chuh sakeibaknei kul a paih ding ahi tin leng hin dân siem in khap chak kêi hen, ti’n a gen u a.

⁸ Chuleh, aw lengpa, thupiek chuh sudet inla. Media leh Persia dân danglam ngeilo bang zelin, thu zik chuh kitheng kit lo hiel dingin na min zik khum in,” a tiu a.

⁹ Khutichun leng Darius chun thu zik leh thupiek achun a min a zik ta a.

¹⁰ Khapna lehkha achun leng Darius chun a min a zik tai tih a Daniel in a het phet chun In ah a lut a. (A pindan tukvan chuh Jerusalem lam nga a kihawng ahi a) A hihdan ngeina guolin, khupdin in, ni khatin thum vei a paucham a. Pathien kawmah kipahthu a gen a.

¹¹ Tichun, amau haw chuh a chieh khawm u a, Daniel in a Pathien kawmah ngetna leh pauchamna a nei sek hi tih a mudawk tau a,

¹² Chun, lengpa chuh a va naih u a, a ma achun lengpa thupiek thu kha a gen u a, “Aw lengpa, ni sawmthum sung nang kawm mai tih loh pathien dang ahim, mihingte kawma him a ngetna nei taphawt chuh sakeibaknei kul a paih lut hi’nau tin khapna lehkha a khan na min na zik hilo ahim?” a tiu a. Leng chun a dâwng a, “Hi, zie dân chuh a det zing hi. Media-Persia dân danglam ngeilo bang mah chun a det zing hi,” a ti a.

¹³ Ziephet chun leng chuh a dâwng u a, “Aw lengpa, Juda saltâng chate laka mi Daniel khan, a hun khawksa puoh a, khapna lehkha a na min zik khale a khawksa diek puoh a: ni khatin thumvei zel pauchamna a nei zawi,” a tiu a.

¹⁴ Chun, leng chun zie thu haw chuh a zak in khawk a sa mah mah a, Daniel chuh hukdawk a guo hâm ta a, hukdawk guo chun ni tum chanin a buoipih ta a.

¹⁵ Zie mite chuh leng kawm achun a hungkit u a, a kawmah, “Aw lengpa. Media leh Persia dân in thupiekte, leng in a namdetsa chuh a kitheng ngêi puoi tih na hetding ahi,” a tiu a.

¹⁶ Ziephet chun leng chun thu a pie ta a, Daniel chuh a hun pui u a, sakeibaknei kul achun a paih lut tau a. Leng chun Daniel kawmah, “Na Pathien, a na nasep zing sek pa chun hun hukdawk hen,” ti’n a gen a.

¹⁷ Tichun, suong a lau a, a kawtkhak achun a kawih u a, Daniel chuh kuoma’n a hukdawk lohna dingin leng chun a tiemtehna leh a milopite tiemtehna ngêi chun a chung chuh a tiemteh tau a.

¹⁸ Khutichun leng chuh a In achun a chieh kit ta a, zan khuo’n an a ngawl a, ipmu lo in, lungthim sukipak ding thil githei lam himhim a hih puoh a.

¹⁹ Tichun, a zingkal matak in leng chuh a tho dawk a, sakeibaknei kul lam achun kin takin a chieh ta a.

²⁰ Chun, Daniel umna kul a tun phet chun kahpau kawmin a vak sama, “Aw Daniel, Pathien hing suokpa, na Pathien a na nasep zing chun sakeibaknei kul apat chun a hun hukdawk thei nam?” a ti a.

²¹ Daniel chun a dâwng a, “Aw lengpa, kumlekhuo’n dam in,

²² ka Pathien chun a vânsâwlchâk a hun sawl a; sakeibaknei kamte chuh a suchih a, bangmah ei lawh puou hi. A mitmuh achun mawhna neilo leh nang chunga le, Aw lengpa, bangmah hihkhelh ka nei puoi, tih a he a ahi,” a ti a.

²³ Ziephet chun leng chuh a kipâk ta mah mah a, Daniel chuh sakeikul apat a lâkdawk ding thu a pie ta a. Tichun Daniel chuh sakeikul apat chun a ladawk u a; Pathien a taksan ziekin suknat in a um puoi tih a mu tau a.

²⁴ Ziephet chun, leng chun Daniel hekte cheng chuh mat dingin thu a pie a, tichun amau haw leh a ziteu tawh, a chateu tawh sakeibaknei a dim, kul achun a paih lut tau a. Tuol a tun mau chun sakeibakneite chun a na mantan u a, a thing tâwp tâwp u a, a guh hawu chuh a sugawp dimdem u a, a kul taw le a tung man puou hi.

²⁵ Tichun, leng Darius chun mitin te, namtin te, pautin te, lei chung pumpi a chêngte kawm achun lehkha a zik a: “Na chung u ah lungmuonna um hen.

²⁶ Ka gam awpna sunga mite chengcheng hin Daniel Pathien chuh lau in kilîng u hen, ti’n thupiek ka bawl ahi. “Amah chuh Pathien hing ahi a, kumlekhuo’n vaihawm intin. A lenggam chuh suksiet hi ngêi ta puo’n tin, a thilhih theihna chun tâwp nei ta puo’n a.

²⁷ Amah chun a humbit a, a hukdawk a; lei leh van a hin melchiknate leh thilmakte a hih a; amah hi sakeibaknei thilhih theihna apat a Daniel hukdawkpa chuh ahi,” ti’n.

²⁸ Khutichun, Daniel chuh Darius vaihawm lai leh Persia mi Kura vaihawm sung cheng chuh lamzang takin a um zel tai.