DANIEL 5 - PATHIEN LEKHABU THIENGTHO (BSI)

Belshazar Guolvakna

¹ Zan khat chuh, leng Belshazar chun a mi lopite sangkhat chuh guolvakna nasa taka dingin a chiel a, ziete chu tawh uain a dâwn khawm tau a.

² Belshazar chun uain a dâwn kham phet chun, sana leh dangkaguo umlebelte, a pa Nebuknezar in Jerusalem Ho-In apat a a lâkdawk chuh hun la dingin thu a pie a. Zie chuh leng leh a miliente leh, a ziteu leh a meiteu in uain dawnna a a mat ding u a va la dingin a sawl ahi.

³ Tichun, sana ûmlebel, Jerusalem a Pathien Ho-In apat a lâkdawkte chuh a hun chawi u a; tichun leng leh a milopite leh a ziteu leh a meiteu chun uain dâwn na’n a mang tau hi.

⁴ Uain chuh a dâwn u a, sana te, dangkaguote, sum-engte, thik te, thing leh suongte a siem pathiente chuh a pakcha ta dul dul mai u a.

Banga Khutzik

⁵ Zielai tak chun mihing khutbawm hi a hung kilang a, leng in bang kizut, thaumei kawihna zawn chunglam achun a hung kizik ta a; leng chun a zikpa khut chuh a mu a.

⁶ Ziephet chun leng chuh a mel a hung duptha ta a, a lunggil chuh a buoi zo ta a, a keng guh kisuktuohna te chuh a zawi zo ta a, a khûpte chuh a kitattuoh lun lun mai ta a.

⁷ Leng chun, “Phunsân thiem te, Babulon mite, aksi lam chanchin hete hun pui un,” ti’n ngeih tak in a kiko a. A hung phet un leng chun Babulon miching te kawm achun, “Kuole, zie lehkhazik hi sim a, a hilhchetna ei etsak chuh puonsandup silh sak hi’n tin, a ngâwng ah limbawlna sana khi awh sak hi’n a, chuleh, lenggam a vaihawm thum te laka khatin pang in a,” ti’n a gen a.

⁸ Tichun leng miching te cheng chuh a hung lut u a; himahleh a kizik chuh a sim thei puou a, a umzie chuh a hetsak thei diek puou ui.

⁹ Ziephet chun leng Belshazar chuh a lungkham mah mah ta a, a mel chuh a duptha zieng ta a, a mipilte chuh le a lungzîng tau a.

¹⁰ Chun, leng leh a milopite kiko thawm chuh lengnu chun a hun za ta a, tichun guolvakna in sung achun a lut ta a: lengnu chun, “Aw lengpa, kumlekhuo’n dam in, na ngaihtuohna chuh buoi kihen la, na mel le dângtha diek kihen.

¹¹ Na gama hin mi khat, amah a pathiente thagau umna a um a, na pa hun lai haw khan le pilnate, hetthiemnate, chitnate, pathiente chitna bang mai amah achun a um hi tih het ahi a; aw lengpa, leng Nebuknezar na pa ngêi chun mitvaidawi thiemte, aisânthiemte, Babulon mi, aksi lam thiemte lawiupa’n a siem a;

¹² Amah achun lunggil pha diekte, dawi sut thiemnate a um hi. Tichun, Daniel kiti, leng in Belteshazar a vawhpa chuh sap hi hen la, a hilhchetna chuh hun etsak mai in a,” tin a gen a.

Daniel in Lehkhazik a Hilhchetna

¹³ Tichun, Daniel chuh leng masang achun a hun puilut u a, leng chun Daniel kawmah, “Daniel, Juda saltâng chate laka mi ka pa leng in Juda gam apat a a hun puih chuh na him?

¹⁴ Nangmah achun pathiente thagau chuh a um a, pilnate, hetthiemnate, chitna pha diekte nangmah achun a um hi tih het ahi, tih na chanchin ka na he a.

¹⁵ Tichun, zie lehkha kizik hi sim ding leh a umzie te ei hetsak dingin miching te, phunsân thiemte, ka masangah a hun puilut tau a; himahlele a umzie mudawk thei a um puou hi.

¹⁶ Nang chun thil kiselte umzie na he a, thil kiselte na hilhchien thei hi tih ka na zai,” a ti a.

¹⁷ Chun, Daniel chun a dâwng a, “Na thilpiek chuh nanga ding hi hen la, na kipahman chuh mi dangte kawma piek hi zaw hen; himahlele lengpa, lehkhazik chuh hun sim sak ing ka ting, a umzie chu le hun hetsak ing ka.

¹⁸ “Aw lengpa, Pathien Chungnung pên pa chun na pa Nebuknezar chuh gamte, letnate, lopinate, leh lalnate a pie a.

¹⁹ Letnate a kawma a piek ziek chun mitin a mite, namtin a mite, pau tina mite, chun a kihchau a, a masang achun a kithing u a. Mi, thah a nawp taphawt chuh a that a, a nawp taphawt chuh a hinghawih a, a nawp taphawtte chuh a limbawl a a nawp taphawt chuh a hihniem sek hi.

²⁰ Himahleh, a lungthim a hung chapo a, a lungthim a hung kichunglap a, chapo takin a tawi ta a; zieziekchun a lalchutphah chuh hihniem in a um ta a, a lopina chuh lâksak a hi ta a.

²¹ Tichun, mihingte lak apat in nawhdawk in a um a; a lungthim chuh gamsate a banga siem in a um a, a chênna chuh gam sabiltungte lak a hi ta a; bâwngchal guolin hampa a pet a, tichun gamlak achun a taksa lieh ding um lo in dâitui lak achun a kuol ta a. A tâwp chun, Pathien Chungnung pên pa chun mihingte lalna gam ahin vai a hawm a, a deihsak taphawt a luoh sak sek hi tih a hun he dawk ta a.

²² “Himahlele nang a chapa, Belshazar hin, ziehaw cheng chuh na he ta na a, na lunggil na khieniem puoh a.

²³ Van Lalpa chung achun na kikawihsang zaw ta a; a Ho-In a umlebelte chuh na masangah a hun chawi u a, zie chuh nang leh na miliente leh na ziteu leh na meiteu tawh uain dawnna’n na mang u a, dangkaguote, sanate, sumeng te, thikte, thingte, leh suonghaw a siem pathien, mu theilo, za theilo leh ngaitha thei lote chuh na limbawl zaw tau a. Pathien, na hin leh thih ding hun guonggalh sakpa leh na thilhih chengchenga hun enkawlpa chuh na zah ta puoh a.

²⁴ Zieziekchun, Pathien in a kawm apat in khut chuh hun sawl in, zie khutzik hi a hun zik ahi.

²⁵ “Chun, ziehi thu kizik chuh ahi: MENE, MENE, TEKEL, UPHARSIN.

²⁶ Ziehi a hilhchetna chuh ahi: MENE: Pathien in na lalgam nite chuh a sim zo ta a, a tâwp a tung tai.

²⁷ TEKEL: Bûkna a bûk in na um a, na ting ta puoi.

²⁸ PERES: Na gam chuh hawpzak in a um ta a. Media leh Persia te kawma piek a hi tai,” a ti a.

²⁹ Ziephet chun Belshazar chun thu a pie a, Daniel chuh puonsandup a silh sak u a, a ngâwng kimvel ah limbawlna sana khi a awh sak u a, tichun gamsung achun vaihawm thum te laka pang ding a hi ti a phuon in a um ta a.

³⁰ Zie zan mah mah chun Babulon leng Belshazar chuh thah ahi ta a.

³¹ Tichun Darius, Media mi chun gam chuh a chang ta a, amah chuh kum sawm gup leh kum nih a upa ahi.