DANIEL 4 - PATHIEN LEKHABU THIENGTHO (BSI)

Nebuknezar Mang Nihna

¹ Leng Nebuknezar chun mi tinte, nam tinte, pau tinte leh lei chunga chêngte cheng kawm achun, “Na chungu ah lungmuonna um hen,” ti’n a thak a.

² Chungnung pên Pathien in ka kawma tiemtehna leh thilmak a bawl hi ngaithau in.

³ “Pathien in thilmak ei etsak te chuh a nasa na e! A lalgam chuh kumkhawtuong lalgam ahi a; Kumlekhuo’n Pathien chuh leng in chu’n tin; kumsawt in vaihawm in a.

⁴ “Kei, Nebuknezar hi ka In ah nuom sa tak leh lopi takin ka leng In ah ka um a.

⁵ Himahleh mang lauh-um tak ka nei a; zâlkhun chunga ka kuol lai chun ka mang chun ei subuoi ta a.

⁶ Tichun, Babulon miching chengcheng te chu mang umzie ei hilh dinga ka masanga hung khawm dingin thu ka pie a.

⁷ Khutichun, mitvaidawi thiemte, aisânthiem te, leh Babulon mi, aksi lam chanchin hethiemte chu a hung u a; ka mang chuh ka gen a, himahlele a umzie chuh ei hilh thei puou hi.

⁸ Himahleh a tawppen achun Daniel, (ka pathien Belteshazar min pu) amah a Pathien thiengthote thagau umpa chuh ka masangah a hung a, tichun ka mang chuh ka hilh a,

⁹ Aw Belteshazar, mitvaidawi thiemte lawiupa, namgmah achun Pathien thiengthote thagau a um tih leh, thu gûk mawngmawng nanga dinga haksa a um puoi tih ka het ziekin, ka manga ka muh kilâkna leh a hilhchetna chuh ei hilh tie.

¹⁰ “Ka zâlkhun a ka kuol laia ka kienga kilâknate chuh hitibang hi ahi: Ka vak dâk dawk leh, lei lailung lai tak ah thing lien tak mai hi ka mu a, a sang mah mah maia.

¹¹ Thing chuh a hung khanga, a hung lien a, a sânlam chun van a su a, tichun kâwlmawng tin apat in a muh theih vek ta a.

¹² A nahte chuh a hawih in, a gah tam mah mah a; amah achun hinna nei chengcheng nek khawp dingin nek ding a um a: gamsate chun a lim a bel u a, chung leng vachate chuh a bawk lak haw achun a cheng u a, phehlevo nei chengcheng chun a gah chuh a neu a.

¹³ “Ka zâlkhun a ka kuol laia ka kilâkna muh achun ka vak en a, ngaitie, van apat in vânsâwlchâk hi kigingsa leh kiguo zo sa’n a hung kum suk a,

¹⁴ Aw ngeih tak in, ‘Thing chuh phuk inla, a bâkte chuh heuh inla, a nahte chuh theuhtha’n la, a gahte chuh thehzak ah: a nuoi apat in gamsate chuh chiehmang u hen la, a bâk apat in chung leng vachate chuh leng mang u hen.

¹⁵ Amahvang chuh, a bulsum bulbâl vang chuh lei nuoi achun um den sak un; thik khau leh sumeng guia kan in, gamlaka hampa hing dip dep lak achun taihsan un. “ ‘Tichun, van daitui in chap chek zing hen la, a chan ding chuh ganhingte tawh hampa laka chen khawm chu hi hen,

¹⁶ a lungthim chuh mihingte lungthim apat a sukzatchuom hi hen la, a kawmah gamsa lungthim piek hi hen la: a chung ah hun sagih chieh hen.

¹⁷ Ziehi vânsâwlchâk, kigingsa leh kiguozo sa a hungsuk pa thutanna chuh ahi. Chungnung pên pa chun mihingte lalna gam chungah thu a nei a, a deihsak taphawt a pie a, mi nuoinung pente le gam chuh a luoh sak sek hi tih mihingte’n a hetna dinguh ahi,’ ti’n a kiko a.

¹⁸ “Ziehi ka mang neih chuh ahi,” ti’n leng Nebuknezar chun a gen a. “Aw nang Belteshazar, a umzie chuh ei hilh in. Ka miliente chengcheng in ei hilh thei puou a, himahleh nangmah achun Pathien thiengthote thagau chuh a um ngâla,” a ti a.

Daniel in Mang a Hilhchetna

¹⁹ Tichun, amin Daniel, Belteshazar le kiti sek pa chuh chawmkhat tak chuh a lau mah mah a, bangmah a gen thei ta puoh a. Ziephet chun leng chun a kawmah, “Belteshazar, mang ahim, a umzie ahim chun hun sulau kihen,” a ti a. Belteshazar chun a kawmah, “Ka lalpa, mang chuh a hun mudahte chunga tung ding hi hen la, a hilhchetna chu le na melmate chunga ding hi hen.

²⁰ Thing na muh hung khang a, hung lien a, vante hung su a, kâwlmawng apat a muh theih suok leh,

²¹ a nahte hawih a, a gahte tam mah mah a, hinna nei chengcheng te dinga nek ding um leh, a nuoia gamsate bawk leh a bâka chung leng vachate chênna hung hi chuh:

²² “Aw lengpa, nang hi na hi a; na hung khang a, na hung hât a, na lopina chuh a hung khang a, van a su hiel a, na thuneihna chuh kâwlmawng chan ahi ngâla.

²³ Chun, van apat a vânsâwlchâk thiengtho hung suk a, ‘Thing chuh phuk inla, sumangthai ah; amahvang chuh a bulsum, a bulbâl zung chuh lei nuoi ah um den sak in, thikkhau leh sumeng guia kân san gamlaka hampa hing dip dep lak achun taihsan in; tichun, van dâitui in chapchêk hen la, a chanvo chuh gamsa te tawh umkhawm hi henla; a chungah hun sagih a beih chanin,’ ti a hung kigen chuh lengpa chun a mu a.

²⁴ “A hilhchetna chuh ziehi ahi; aw lengpa, Chungnung pên pa thuphuon, leng ka lalpa chunga hungtung ding chuh ahi.

²⁵ Chungnung pên pa chun mihingte lalna gam ah thu a nei a, a deihsak taphawtte a pie sek hi tih na het ma chengin, mihingte lak apat nawhdawkin um in na tin, gamsate lak ah um inla. Tichun, kum sagih sung bâwngchal banga hampa peh sak in um na tin, van daitui in hun chap chek ding ahi.

²⁶ Chuleh, vânsâwlchâk in thingbulsum hawih dinga thu a piek kha a umzie ziehi ahi: Pathien in khawvel pumpi chungah thu a nei hi tih na het tieng leh leng hihna hung chang kit inla.

²⁷ Zieziekchun, aw lengpa, ka thu hun hilh hi zawp inla, ngai inla, na gitlohnate haihsan inla, mi gimtheite chungah lungsietna latsak inla, tichun hinkhuo kiphathei takin um zing inla,” ti’n a dâwng a.

²⁸ Tichun, ziehaw cheng hi leng Nebuknezar chunga chun a hungtung ta a.

²⁹ Zie nung tha sawm leh tha nih chun leng Nebuknezar chuh Babulon leng In chung achun a vak viel a,

³⁰ a mah chun, “Zie Babulon khuo lopi tak hi keimah hatna ngêi leh, thilhih theihna a ka chênna ding leh, ka lopina leh ka thupi na suklatna dinga ka siem hilo ahim?” ti’n a gen a.

³¹ Zie thu chuh leng kam apat a a pawt lai tak chun van apat in aw a hung gi suk a, “Aw leng Nebuknezar, na kawmah thu a hungtung hi: lalgam thilhih theihna chuh nang apat a lâkmang ahi tai.

³² Mihing lak apat a nawhdawk hin na tin, gamsate lak ah um in na tin, bâwngchal guolin hampa pet ding na hi a, na chungah hun sagih bei ina. Chungnung pên pa chun mihingte lalna gam ah vai a hawm a, a deihsak taphawtte kawmah a pie sek ahi tih na het ma cheng chun,” ti’n.

³³ Zie pet tak chun zie thil haw chuh Nebuknezar chungah a hungtung zieng ta a; mihing lak apat in nawhdawkin a um ta a, bâwngchal guolin hampa a pet a, a taksa chuh van daitui a chapchêk in a um ta a; a samte chuh mupi mul bang leh a tinte chuh vacha tin bang hiela sau in a um ta a.

Nebuknezar in Pathien a Pahchakna

³⁴ Chun, zie nite chuh a hung tawp phet chun, kei Nebuknezar in van lam ka vak en to a, tichun ka lungthim ngeina chuh ka hun pu kit ta a. Chungnung pên Pathien chuh ka pakcha a, limbawlna leh lopina chuh kumlekhuo a Hing zing pa kawm achun ka pie ta a. “Amah chun kumlekhuo’n vaihawm intin, a gam in tâwp tik ni nei puo’n a.

³⁵ Chun, leichung luoh cheng chengte hi bangmahlo a ngaih ahiu a; Vana vânsâwlchâkte leh lei chunga mi chengcheng hi, a thuneihna nuoia um vek ahi ngâl a. A thilhihte kuoma’n a nang thei puoh a, bangmah a gen thei diek puou hi.

³⁶ “Ka lungthim ngeina chuh ka kawma piekkit ahih phet chun, ka lenggam lopinate, ka lopina leh ka hawihna chuh ka kawma piek kit a hi ta a. Chun, ka lemguotpihte leh ka mi lopite chun ei hun zuon kit u a, ka gam achun sukdet in ka um a, limbawlna nasa tak mai chuh ka chungah behlap in a um ta a.

³⁷ “Tichun, kei Nebuknezar hin van Lengpa chuh ka pakcha ta a, ka chawisâng a, ka limbawl a; a thilhih chengte chuh a dik in a lampite chuh a kitûp ngâl a: kuole chapo taka thilhihte chuh a suniem thei ahi,” ka ti a!