DANIEL 3 - PATHIEN LEKHABU THIENGTHO (BSI)

Sana Milim Ho dinga Thupiek

¹ Leng Nebuknezar chun sana milim, a san lam tawng sawmgup, a vai lam tawng gup a lien a siem a, Babulon gamsung a Dura phaizawl ah a kawih a.

² Leng Nebuknezar chun thuneite, vaipawte, gam vaihawmte, vaihawmte, sum enkawlte, lemguotte, dân he mite leh gambung tina vaihawmte chengcheng chu a milim tundawk latna neihna a chuh hung tel dingin a sam khawm a.

³ Tichun, thuneite, vaipawte, gamsung pawte, sum enkawlte, lemguotte, dân he mite leh gambung tina vaihawm chengcheng chuh a hung kikhawm u a, leng Nebuknezar milim tundawk masang achun a hung ding u a,

⁴ Chun, ngeih tak in tângsam ahung kiko a, “Aw, mitinte haw, namtinte haw, pau tinte haw;

⁵ pengkunte, châmngaite, kingkangte, gawsemte, pekgitte, bajate, leh thil githei chitin cheng git na zak tieng u leh, leng Nebuknezar sana milim tundawk hi bawkkhup a chibai bûk dingin thupiek na hiu ui:

⁶ Tichun kuole bawkkhup a chibai bûk lo chuh, zie hun sung ngeia chuh hâltuina meipi a paih lut ding hi’n au,” ti’n.

⁷ Khutichun zie a mipi chengcheng chun pengkunte, châmngaite, kingkangte, gawsemte, pekgitte, bajate leh thil githei chitin chengte git a vak zak u chun, mitin te, namtin te, pau tinte chun leng Nebuknezar milim tundawk chuh bawkkhup in chibai a bûk chiet tau a.

Daniel Guolte Thum Mawhchansakna

⁸ Zie lai chun Babulon mi khenkhatte chuh a hung dingdawk u a, Juda mite chuh a hun hêk tau a.

⁹ Leng Nebuknezar kawm achun, “Aw lengpa, kumlekhuo’n dam zingin.

¹⁰ Nangin aw lengpa, mi kuole pengkun te, châmngaite, kingkangte, gawsemte, pekgitte, Bajate leh thil githei za taphawt in bawkkhup in sana milim chibai a bûk dinguh ahi;

¹¹ tichun kuole bawkkhup a chibai bûk lo taphawt chuh hâltuina meia paih lut hi’n au, ti’n thupiek na bawl a.

¹² Juda mi khenkhat, Babulon gambung haw a lawiupa a na siem Shadrak te, Meshak te, Abednego te kha a um u a, ziete chun aw lengpa, a hun khawksa puou a: na pathiente na le a sem puou a; sana milim na tundawk khale chibai a bûk diek puou ui,” ti’n a gen u a.

¹³ Tichun, Nebuknezar lungna leh lauh-um tak mai chun Shadrak, Meshak leh Abednego te chuh a masanga hun puih dingin thu a pie a. Zie mite chuh leng masang achun a hun pui u a.

¹⁴ Nebuknezar chun a kawm u ah, “Shadrak, Meshak, Abednego te, ka pathien na sem lo a, ka sana milim tundawk hi chibai a bûk puou hi tih hi adik ahim?

¹⁵ Tuhin, pengkunte, châmngaite, kingkangte, gawsemte, bajate, pekgitte, leh thil githei tincheng na zak tiengu leh bawkkhup a ka milim siem chibai na bûk u chun phan tin: chibai na bûk loh uh le vang chuh zie hun mah mah chun hâltuina meipi a paih lut hi’n lau: ka khut apat nang haw hun hukdawk thei ding pathien dang um dingin na gingchau em?” a ti a.

¹⁶ Tichun, Shadrak, Meshak leh Abednego te chun leng chuh a dawng u a, a kawmah, “Aw Nebuknezar, zie thu a hin ka hun dâwn u le a ngai puoi.

¹⁷ Ka Pathien uh, a na ka sep sek u chun hâltuina meipi apat in ei hukdawk thei ngâla, na khut apat inle, Aw lengpa, ei hukdawk mai ina. hâltuina mei apat in le ei hukdawk tei in a.

¹⁸ Khutichu hi kimawng lele na pathien na chuh sem puo’ng ka ting un, chibai bûk diek puo’ng kau tih hi he’n,” a tiu a.

Daniel Guolte Thum Thi dinga Thutankhum na

¹⁹ Ziephet chun, Nebuknezar chuh a lungna mah mah ta a, Shadrak, Meshak leh Abednego te chung achun a mel latdan chuh a duptha zo ta a: a mite chuh hâltuina mei a leh sagih a tih sat beh dingin thu a pie a.

²⁰ Chun, a sepaih hawn laka mihat khenkhatte chu Shadrak, Meshak leh Abednego te chuh kantawm ding leh hâltuina meia paih lut ding chun thu a pie ta a.

²¹ Tichun, zie mite chuh a puonâk chuolteu, a puon-aknuoiteu, a dielteu leh a silhlechen dangteu puma kân tawm san hâltuina meipi a chun a paih lut tau a.

²² Tichun, leng thupiek khauh taka hâltuina mei tih sat beh a um sat bêk ziek chun Shadrak, Meshak leh Abednego te dawm kâng a meipi a paih lutte chuh meikuong chun a hailum ta a.

²³ Tichun, zie mi thum te, Shadrak, Meshak leh Abednego te chuh kantawm sa chun meipi a chun a puklut tau a.

²⁴ Ziephet chun, leng Nebuknezar chuh maksa tak mai in thakhat in a hung tho dawk a, a lemguotpihte kawm achun, “Mi thum te kha kantawm san meipi a kha I paih lut uh hilo ahim?” ti’n a gen a. Leng chuh a dâwng u a, a kawmah, “Aw lengpa, a dik hi,” a tiu a.

²⁵ Leng chun, “En tiem u, mi li kikantawm lo a mei laka vak vielviel, na sa lo hielin ka mu a; a lina pên kilat dân chuh Pathiente Chapa lim tawbang mai in ka mui,” a ti a.

Mi Thum te Kaihsan sakna

²⁶ Tichun, Nebuknezar chuh hâltuina meipi kawtkhak achun a chieh to a, “Shadrak, Meshak leh Abednego te haw, nanguh Chungnung pên Pathien suokte haw, hung pawt unla, zie hin hung un,” ti’n a vak hopih a. Tichun, Shadrak, Meshak leh Abednego te chuh mei lak apat chun a hung pawt tau a.

²⁷ Khutichun, thuneite, vaipawte, gampawte leh leng lemguotpihte chengcheng chuh a hung khawm u a, tichun zie mite taksa chung achun mei in thilhih theihna a nei puoh a, a luchang u a samzangte chu le a kachawn diek puoh a, a puonâk chuolteu le a zatchuom diek puoh a, mei gim himhim le a nam puou hi tih a mu tau a.

²⁸ Chun, leng Nebuknezar chun thu a gen a, “Shadrak, Meshak leh Abednego te Pathien chuh pahchak in um hen: Amah chun a vânsâwlchâk a hun sawl a, a suokte, amah taksang leh nasemte chu a hukdawk a; zie mite hin a Pathien uh tihloh chuh pathien dang mawngmawng na a sep loh u a, chibai a bûk lohna dingun leng thupiek nasan le khawksa lo in amau hinna a pie ngam uh ahi.

²⁹ “Zieziekchun mitin, namtin, pau tin in, Shadrak, Meshak leh Abednego te Pathien chunga thu phalo gen taphawt chuh sat nêl hiu intin, a inteu chuh thilsie kawihkhâwm tawbanga siem in um un au tin thupiek ka siem ahi: zie tawbanga hukdawk thei pathien dang mawng mawng a um puoh ngâl a,” a ti a.

³⁰ Tichun, leng chun Shadrak, Meshak leh Abednego te chuh Babulon gambungte achun dinmun sangzaw ah a kaihsan sak chiet tai.