DANIEL 10 - PATHIEN LEKHABU THIENGTHO (BSI)

Tigris Lui panga Kilâkna

¹ Persia leng Kura lal kum thumna achun Daniel, a min Belteshazar vawh a umpa kawm achun thil a hung kilang a. Zie thil chuh a dik ngêi ahi a, zie chuh kidona lopi tak ahi; tichun, thil chuh a hethiem a, kilâkna hetthiemna a nei hi.

² Zie hun sung chun kei Daniel chuh lusûn bangin hapta khat pumlum ka um ta a.

³ An lim mawngmawng ka ne puoh a, sa ahim, uain ahim le ka kam ah a lut diek puoi, hapta thum pumlum a tin macheng chun sathau le ka kinuh puoi.

⁴ Zie kum mah, tha khatna, ni sawmnih leh ni li ni chun lui lopi tak Tigris lui panga chun ka ding a.

⁵ Tichun, ka vak dâk to a, mi khat, patngat puon silh a, a kâwng sana thieng taka kigak hi ka mu a.

⁶ A taksa chuh beril suong tawbang ahi a; A mai chuh kawlphe tawbang in a vak a, a mit chuh meikuong tawbang ahi. A bante leh a kengte chuh sumeng nawtval tawbang ahi a, a aw chuh mipi tamtak thawmgi tawbang ahi.

⁷ Zie kilâkna chuh kei Daniel chauh in ka mu a. Ka kawma umte chun bangmah a mu puou a, himahleh, hahpi’n a kithing u a, a kisel mang zo tau a.

⁸ Khutichun keimah mai ka um ta a, kilâkna mak tak chuh ka en zing ta a, tha himhim ka nei ta puoh a, ka pienpih mel latdan chuh a kitheng ta a, kuoma’n ei he thei ta puou hi.

⁹ A aw ka vak zak tak chun khuo he lo in tuol ah ka puktha ta a, maichang a lei si’n ka kuol ta a.

¹⁰ Chun, ngaitie, khut in ei hun khawih a, tichun ka khut leh keng kithing pum chun ei bawkvak saka.

¹¹ Chun, Vânsâwlchâk chun ka kawmah, “Aw Daniel, Pathien in a hun lungsiet hi. Khutichun ding dawk inla, ka thugen ding hi hawih takin ngaitha’n. Na kawma sawl a um ka hi,” ti’n. Zie thu a hun gen phet chun, kithing zing pum chun ka ding dawk ta a.

¹² Tichun, ka kawmah, “Daniel, lau hiel ki’n, Pathien masanga kingainiem ding leh hethiem dinga na lunggil na piek tung ni apat khan na pauchamna zak ahi tai. Na pauchamna dawna a umna zieka chuh hung ka hi.

¹³ Persia lalgam a lal chun ni sawmnih leh ni khat ei nang a.Ziephet chun, kei chauh a Persia gama nutsieh a um ka hih ziekin vânsâwlchâkte laka lawiupa khat, Mikael chuh ei panpih dingin a hung ta a. tichun, zie tak achun Persia lalgam a lal chuh tawh ka um zing ta a.

¹⁴ Tunung a na mite chunga thil hungtung ding hun hetsak dinga hung ka hi. Tunung a thil hung tung ding thu a kilâkna chuh ziehi ahi,” tin.

¹⁵ Zie thute chuh ka kawma a gen phet chun, pau thei lo in tuol lam ah ka khuntha ta a.

¹⁶ Chun, ngaitie, mi khat, mihing chapate mel tawbang pu hin ka mûk ahun khawih a; tichun, ka kam ka ka ta a, ka ma a hung ding pa kawm achun, “Hepu, Kilâkna ka muh te ziek chun ka lungkhamna te chun ei delhphah a, tha himhim ka nei puoh a.

¹⁷ Suok a pute masanga ding bang mai in ka um ta a, Bangti’n ahim ka hun hopih theih ding? Ka tha hatna a bei ta a, hatsam in ka um ta ngâl a,” ka ti a.

¹⁸ Tichun, mihing bang taka kilang chun khatvei ei hun tu kit a, ziephet chun ka hung hât deuh ta a.

¹⁹ Tichun, ka kawmah, “Pathien in a hun lungsiet hi, bangmah lungkham ki’n la, lauh le lau diek ki’n,” a ti a. Zie chuh ka kawma a hun gen lai chun ka hung hatzaw deuh ta a, a kawmah, “Hepu, na gen nawp chuh gen in. Nei suhat deuh deuh ta ngâl a,” ka ti a.

²⁰ Ziephet chun amah chun ka kawmah, “Na kawma ka hungna ziek hi na he’m? Tuhin chuh Persia gam lal kidopih dinga vaikit ding ka hi: chun, amah chuh ka taihsan zawh leh ngaitie, Grik lalgam hung ina.

²¹ Mahleh, thudik zikna a kizik chuh hun hilh ing ka; zie tak ahin na lalpau Mikael chauh lo chuh ei panpih ding kuomah a um puou hi” ti’n.