AMOS 9 - PATHIEN LEKHABU THIENGTHO (BSI)

Lalpa Vaihawmna

¹ Lalpa chuh maichâm sika dingin ka mu a, amah chun, “Kawtkhak bul haw chuh a kilin theihna dingin, maichâm ning zumte chuh zêp in la, a bawn u a lu chung ah sugawp dimdem in: A thi bangkhaite chuh chemzâm in that ing ka ting; khatchale tai dawk puou un tin, khat cha’n le pumpelh diek puo’n au!

² Sheol tiengin lai vang mahleu le, zie apat chun ka khut in ladawk ing ka ting, van ah kal leu le, zie apat chun zuk tha’ng ka.

³ Karmel tângsip ah kisel mahleu le, hawl ka ting, zie apat chun amau haw ladawk ka ting, chun, Tuisuohgiet lituong ah ka mitmuh loh dingin kisel mahleu le, zie taka gûl chuh thu pie’ng ka ting, amau haw chuh a na chu’na.

⁴ A melmateu ma ah salin chieh mahleu, zie a chemzâm chuh thu pie’ng ka ting, amau haw sat lum intin, a phatna dinguh hilo in, a sietna dingun a chunguh ah ka mit hak ing ka ting.”

⁵ Leisiet khawih a, hihlingpa chuh, Lalpa, sepaihte haw Pathien chuh ahi ngâl a! zie a um chengte chuh lungkham un tin, Nile Luipi bangin hung lien intin, Aigupta Luipi bangin hung kiem kit ina.

⁶ Amah chun van a khun indan a siem a, lei chunga a sepaihte mudawk amah ahi, tuisuohgiet tuite sama, lei chunga sungtha pa, a min chuh Lalpa ahi.

⁷ Lalpa chun, “Aw Israel chate haw, ka chungah Ethiopia chate bangin na um puou a ahim? Aigupta gama pat in Israel chuh ka puidawk a, Kaphtor gam apat in mite leh Kir gam apat in Suria te ka puidawk puoh a ahim?” a tii.

⁸ “Ngaitiem u! Lalpa Pathien mit chuh lal gam gilote chungah a chu a, chun, lei chung apat in sumangthai ka ting, amahvang chuh, Jakob inkawte chu susie vek puo’ng ka,” a tii.

⁹ “Ngaitiem u! thu pie’ng ka, Israel inkawte chuh a mantheihloh cheng lâkdawk na dingin, nam cheng lak ah gawdala buh a ngelh bangun ngelh ing ka.

¹⁰ ‘Ka mite laka gilo chengcheng, phatlohna chun ei delhpha puo’n tin, dal le ei dal diek puo’n a,’ tite chuh chemzâm in thi zo vek un au,” a ti a.

Israel Dindawk kitna din

¹¹ Lalpa, zie thil hihpa hin hiti hin a tii, “Zie ni chuleh, David lalgam chimsa chuh tungding ka ting, a sietna te chuh thuop pha’ng ka ting; a siete chuh lemto ka ting, malaia a um bang mah khan sapha kit ing ka.

¹² Edom te laka suokchate leh, ka min a sap, nam chengcheng te chu a neih theihna dingun,” a ti a.

¹³ “Ngaitiem u! nite chuh hungtung ding ahi, tih hi Lalpa kamsuok ahi, lei lehkit hun tiengin buh ât untin, a phuh kit hun tiengin grep thawk untin, tâng haw apat chun uain thum tak luong dawk intin, tâng chung haw a chun luong zuoh zuoh in a.

¹⁴ Chun, ka mi Israel te chuh sal apat puidawk ka ting; khuo hawmsa chuh siempha kit un tin; luoh un tin, tichun, grep huon siem un tin, uain chuh dâwn un tin, huonte le siem un tin, a gah chuh ne ta’n au.

¹⁵ Chun, a gam ngêi uh achun amau haw phut ing ka ting, a kawm uh a ka piek, a gam uh apat chun bawhdawk in um kit ta puo’n au,” Lalpa Pathien chun a tii.