AMOS 8 - PATHIEN LEKHABU THIENGTHO (BSI)

Nipi Theigah Muhna

¹ Hitibang hin Lalpa Pathien chun ei etsak a: ngaitiem u, nipi theigah bawm ana hi a.

² Lalpa chun ka kawmah, “Amos, banga na muh?” ei ti a. Chun, kei chun, “Nipi theigah bawm,” ka ti a. Chun, Lalpa chun ka kawmah, “Ka mi Israel te chungah tawpna a hungtung tai, amau haw chiehpel kit ta puo’ng ka!” a ti a.

³ Lalpa Pathien chun, “Zie ni chuleh, Ho-In late chuh sûnna la hung hi’n tin; muntin ah mithi luong um intin; mun chengah thipkêi in paih dawk un au,” a ti a.

Israel Sietna hungtung ding

⁴ Ziehi ngaithau in, Aw tasamte tawhden a, gama gimtheite sumang nuomte haw!

⁵ “Buh ka zawk theihna dingun tha thak chuh bangtik leh a mang die, chângthâk ka zawk theihna dingun, Chawlhni chuh bangtik leh a bei dem? ti’n ephah chuh suneu in, sekel sulien a, diklo taka tehna mang a;

⁶ dangkaguo a mi gimtheite chaw a, mi tasamte chuh kengtawbek tuok khata chaw a, phuol nên a buhsi ka zawk theihna dingun tite haw!”

⁷ Lalpa chuh, Jakob lopina salin a kipautiem a, “Matheilo in, a thilbawl mawng mawng uh hengilh puo’ng ka tin.

⁸ Zieziek hin gam chuh kilîng in, a sunga cheng taphawtte chuh lungkham lo ding ahiu em? Ahi, lui bangin hung lien vek intin; Aigupta gama Nile luipi bangin hung lien in, hung kiem ina.

⁹ Chun, Zie ni chuleh nisa chuh sun lai takin tum sak ing ka ting, sun khawvak lai tak in lei chuh suthim ing ka, Lalpa’n a tii.

¹⁰ Na guolvaknateu chuh lungkhamna suoh sak ing ka ting, na la teu chuh kahna suok hen; kawlladip puon hun chen sak chiet ka ting, luchang met kawlh in, chapa neihsun sun a lungkham bang leh, a tawpna chuh khatna ni bangin siem ing ka,” ti’n.

¹¹ Lalpa Pathien chun, “Ngaitiem u, nite chuh hungtung pai ding ahi! zie nihaw a chun gam chunga chun kiel sawl ing ka ting, an duh a kielna hilo in, dangchâk na, tui duh a dangchâk na hilo in, Lalpa thu hetna lama kielna hi zaw’na.

¹² Tuisuohgiet apat in Tuisuohgiet dangah; sim leh mal a le vak un tin; Lalpa thu hawl dingin ning tin ah tai un tin; himahleh mu diek puo’n au.

¹³ Zie ni chuleh, nungak hawih lai leh tangval hatlaite nasan chuh dangchâk in thidang un tin,

¹⁴ Samari gitlohna sama kipautiem a, ‘Aw Dan, na pathien a hin zing bangin leh, Beerseba hindan dungzui in,’ tite haw! zie mite chule puk un tin, tho kit ta puo’n au,” ti’n.