AMOS 7 - PATHIEN LEKHABU THIENGTHO (BSI)

Khaupe hawn Muhna

¹ Hiti bang hin Lalpa Pathien chun ei etsak a: Entiem u! hamhing hung kek dawk nunung zaw a hung dâwn tung na achun khaupe hawn a siem a: ngaitiem u, lengpa buh sunkhawm nunga a hung kek nunung zaw chuh ahi.

² Chun, hiti hi a hung hi a, zie gama hampa chuh a nek zawh hun un, “Aw Lalpa Pathien, ngaidam in, ka hun ngên hi, Jakob chuh bangti’n ahim a din theih ding, amah a neu ngâl a?” ka ti a.

³ Zie thu ahin Pathien chuh a kisik a, “Na thilmuh hi hungtung puo’n a,” a ti a.

Vaulam a Mei Muhna

⁴ Hitibang hin Lalpa Pathien chun ei etsak a: chun, en tiem u! Lalpa Pathien chun mei, a do dingin a sama; mei chun tui thuk lientak chuh a katum vek a, gam chule a kâng pan ta a.

⁵ Chun, ken, “Aw Lalpa Pathien, hai ah, ka hun ngên hi: Jakob chuh bangti’n ahim a din theih ding, amah a neu ngâl a?” ka ti a.

⁶ Zie thu ahin Lalpa chuh a kisik a, Lalpa Pathien chun, “Zie hile hung tung lo ding ahi,” a ti a.

Etlemna Muhna

⁷ Hitibang hin ei etsak a: chun, ngaitiem u! Lalpa chuh etlemna manga kilem, bâng zang tak kieng ah a dinga, a khut in etdikna a chawi a.

⁸ Chun, ka kawmah Lalpa chun, “Amos, banga na muh?” a ti a. Chun, ken, “Etdikna,” ka ti a. Lalpa chun, “Ngaitie, ka mi Israel te lak ah etdikna kawih ka ting; amau ngaidam kit ta puo’ng ka ting;

⁹ Chun, Isak munsangte chuh hung hawm intin, Israel mun thiengthote chuh suksiet hung hi’n tin; chun, Jeroboam inkawte chuh chemzâm in do ing ka,” a ti a.

Amos leh Amaziah

¹⁰ Chun, Bethel khuo thiempu, Amaziah chun Israel Leng Jeroboam kawmah, “Amos chun Israel inkawte lak ah a hun phiel a, gam chun amah thugen chengcheng chuh a thuok thei puoi!

¹¹ Amos chun hiti hin a ti ngâl a, ‘Jeroboam chuh chemzâm in that intin; matheilo in, a gam apat in Israel chuh salin puidawk intin,’” ti’n thu a thak a.

¹² Chun, Amos kawmah Amaziah chun, “Aw nang thiemgau, chieh inla, Juda gam ah taimang inla, zie chun an ne’n la, thu va gen ah!

¹³ Himahlele, Bethel khuo ah genlawk ta kih: leng mun thiengtho leh leng In ahih ziekin,” a ti a.

¹⁴ Amos chun Amaziah kawmah, “Thiemgau ka hi puoh a, thiemgau chapa le ka hi diek puoi; himahleh, ganguol vengpa leh theipi kung enkawla pang ka hi zawi:

¹⁵ Chun, Lalpa chun ka belam venna muna chun ei sama, Lalpa chun ka kawmah, ‘Chieh in la, ka mi Israel te kawmah hilhlawk ah,’ ei ti a.

¹⁶ Khutichun, tuhin, Lalpa thu hi ngaiin, ‘Nangin Israel te kalh in thugen ki’n la, Isak inkawte kalh in thu gen diek ki’n,’ na ti a.

¹⁷ Zieziekchun, Lalpa chun hiti hin a tii: ‘Na zi chuh khawpi a nawhchizuok hi’n tin; na chapate leh na chanute chuh chemzâm in puk un tin; na gam chuh tehna gui in hawm un tin; chun, nangmah ngêi le gam thienglo sunga chun thi ding na hi a, matheilo in, Israel chuh a gam u apat in sala puih mang in um un au,’ a tii,” ti’n a dâwng a.