AMOS 6 - PATHIEN LEKHABU THIENGTHO (BSI)

Israel Suksieta a Umna

¹ Zion tânga nuomsa taka um heuh heuh te leh, Samari tânga bit taka umte leh, nam lienpen leh lopite, a kawm u a Israel inkawte a chiehna teu chung chuh a gik hi!

² Kalneh khawpi a chun chieh suk unla, en un! Chun, zie a kipat chun Hamath khawpite a chun chieh suk un la; chun, Philistia khawpi Gath achun chieh suk un. Juda lalgam leh Israel lalgam sangin a phazaw diek em! A gam u chuh nanghaw a sangin a lienzaw chuom em?

³ Nanguh, ni phalo gamla taka kawih a, pawngbawlte chutna hun paw naite haw!

⁴ Saiha zâlkhun a kuol a, a chutna sau chung a guolvakna siem a, belam guol laka belamno te leh, bâwng umna laka bâwng tuoi sate ne a,

⁵ kingkang a thatdahna lasate, David banga la phuok a, kingkang tumte haw,

⁶ belhbu lien a uain dâwn a, sathau phapen kinuhte haw, Joseph te chunga sietna zieka lusûn diek lote haw!

⁷ Khutichun, sala puih masapen hiu in na tin uh. Guolvak a na lawpna thawm gi vengvung hawu chuh thip ina.

⁸ Lalpa sepaihte haw Pathien chun, Lalpa Pathien chun, amah leh amah kiminsâl in a kipautiem a; Jakob uonna chuh ka kihdak a, a leng-In teu chuh ka haw a, zieziekchun, kuole, a khawpi sunga um chengcheng te chuh mi matsak ding ka hi.

⁹ Chun, hiti hi hung hi’n tin, In khata mi sawm nutsiehna te chu thiu un tin;

¹⁰ Mithi te inkawte, kivuihna a mawhpuo pa chun, a In apat in mithi guh chuh ladawk intin. A inkawte chun, nutsieh a um taphawtte chuh sun un tin uh, “Na kawmah mi dang a um nalai hi?” ti’n. Aw chun dâwng intin, “A um ta puoi,” ti’n dâwng ina. Chun, a inkawte chun, “Thipkêi in um ah, Lalpa min chuh I suoh loh dinguh ahi ngâla,” ti’n au.

¹¹ Ngaitiem u, Lalpa chun thu a pie ngâl a; In lien tak tak haw chuh chim gei gui intin, In neute chule sie vek in a.

¹² Sakawlte chuh suongpi chungah a tai ngei a ahim? Zie tak a chun mi’n bâwngchal in lo a kalh dem? Khutisa chun le, diktatna gah chuh thihna gu na chansak u a, thil dik chuh thil diklo na chansak tei tei ngâl u a!

¹³ Nang haw, Lodebar khawpi laa, kisuongte haw, “Karnaim khuo la dingin I hât tawk ui,” ti a kisuongte haw!

¹⁴ “Entiem u! Aw Israel inkawte haw, nanguh do dingin nam dindawk sak ka ting, Hamath khuo lutna apat in thalek a luipi tiengin hun sugimthei un au,” Lalpa, sepaihte haw Pathien chun a ti ngâl a.