AMOS 5 - PATHIEN LEKHABU THIENGTHO (BSI)

Israel Chunga Pathien Kah La

¹ Aw Israel insung mite haw, zie nanguh dodalna thu ka gen, sûnna thu hi ngai un.

² Israel, nungak thiengtho a puk tai; dingdawk kit ta puon a: a gam chungah paih thak ahi tai; amah tungdawk dingin kuomah a um puou hi.

³ Lalpa Pathien in hiti hin a ti ngâl a; Israel insung mite kawmah chun, sepaih sangkhat pawtna khawpi achun zakhat nusieh intin, zakhat pawtna ah sawmkhat nusieh in a.

⁴ Lalpa chun Israel insung mite kawma chun hiti hin a ti ngâl a, “Ei hawl unla, hing unlau:

⁵ Himahleh, Bethel khuo hawl kiu unla, Gilgal ale lut diek kiu un, Beerseba khuo galkai kiu un: Gilgal khuo chuh thâwn lo in sala man ding ahi ngâl u a, Bethel khuo chuh bangmahlo hung hi’n a.”

⁶ Lalpa chuh hawl unla, chun, hing unlau; khutilochun Joseph In ah mei guolin pawt intin, kangtum intin, Bethel achun a sumit ding umlo khawp in meikuong ina.

⁷ Vaihawmna dik gamsai suoh saka, diktatna leia paihte haw,

⁸ Bawmbiel leh sihzucho siempa leh thihna dailîm zingkal suoh sak pa: Sun lai zan thim suoh saka tuisuoh giet a tuite sam a, lei chunga guoh a zuksakpa chuh hawl un, A min chuh Lalpa ahi.

⁹ Kulh sunga manthaina tung hiel khawpa mihatte chunga sietna tunsakpa chuh.

¹⁰ Kulh kawtkhak a hilhgaihpa chuh a hawu a, thudik tak gen pa chuh a kihdak u a.

¹¹ Zieziekchun, mi gimtheite tawhden in a buh teu na lâksak u a: suong kisêk in In haw na sau a, himahleh, a sung ah cheng puo’n lau; grep huon nuom takin na bawl u a, himahleh, uain vang dâwn puo’n lau.

¹² Na bawhsietna hawu tam dân leh, na gitlohnau a nasat dân ka he ngâl a: mi diktatte na sugimthei u a, gawlhgukna na lau a, kulhkawtkhak a mi gimtheite chanvo ngêi le pie phal lo te haw.

¹³ Khutichun, mipil vang chuh zie tawbang hun ah chun thip hiet hiet in a; hun phalo ahih ziek in.

¹⁴ Na hin theihna dingun, phatlohna hawl lo in, thilpha hawl unla, tichun, na gen bangun, Lalpa sepaihte haw Pathien chuh na kawm u ah um ina.

¹⁵ Gitlohna chuh hawu unla, phatna ngainau unla, kulh kawt ah dikna chuh tung dingun: Joseph te inkuon a mi, a na damsunte chunga chun Lalpa Sepaihte haw Pathien chun lungsietna nei ding ahi ngâl a.

¹⁶ Zieziekchun, Lalpa, Sepaihte Pathien, Lalpa chun hiti hin a tii: “Khawlai mun âwng chengcheng ah kah vengvung na um intin; kawtthêl chengah, A khawk na e! tiu intin; lungkham dingin lo nei mite leh, kap dingin kahla sa thiemte sam un au.

¹⁷ Chun, grep huon chengah kahlemau na um in tin, na lak uh hawhpai ding ka hi ngâl a,” Lalpa’n a tii.

¹⁸ Lalpa ni utchate haw, na chung uh a gik hi! Bangati a, Lalpa ni utcha? vak hilo in thim ahi zaw ngâl a.

¹⁹ Sakeibaknei lau a taimang a, savawm kituokpih mi bang leh, ina lut a, bang chunga khut nga a, gul in a chuk bang chuh ahi.

²⁰ Lalpa ni chuh vak hilo in, thim hilo ding ahim? Thim sah tak leh vak himhim umlohna chuh?

²¹ Na kut hawu chuh ka kihdak a, guntak a na kikhawppi na hawu a chun le kipahna ka nei diek puoi!

²² Ahi, na hâlmang thillat teu leh, na an thillat teu ei pie leu chin le, a na pawm puo’ng ka ting; na kichamna gan thau thillat teu chule ngaihsak diek puo’ng ka.

²³ Na kingkang gihawihteu chuh ngaitha puo’ng ka ting, zieziekchun, ka kawm apat na lasak thawm uh, navek um tak chuh la mang un!

²⁴ Himahlele, thudik a vaihawmna chuh tui bangin luong hen la, diktatna chuh tuilien bangin luong hen!

²⁵ Aw Israel inkawte haw! Kum sawmli sungin thaleka khan kithawihnate leh thillat te ka kawmah na hun pieu a ahim?

²⁶ Ahi, na lengpau Sakkut lim leh, na Kaiwan milimteu, na aksi pathien uh, nang u a dinga na kisiem u chu na ho u a.

²⁷ Zieziekchun, “Damaska khuo khel lam ah sala hun ta’n sak ding ka hi,” Lalpa amin Sepaihte Lalpa chun a tii.