AMOS 4 - PATHIEN LEKHABU THIENGTHO (BSI)

¹ Nanguh, Bashan muna bâwngpi vak thau tawbangte haw! Samari tâng chunga um a, chagah nuoisieh a, tasamte tawhden a, a pasalteu kawma, Hun lau inla, dâwn hitiu tite haw, zie thu hi heu in:

² Lalpa Pathien chuh, amah thienthona salin a kipautiem a: “Ngaitiem u! ngakuoi khau a a hun kaih u a, na lak u a umsunte ngakuoia nga âwk guola a hun lak mang ni hungtung ina.

³ Chun, kulhbâng âwng nai pên ah hun kaidawk untin, hun paih dawk un au! Hermon ah hun hawikhawm un au,” Lalpa chun a tii.

Israel te Lawhsapna

⁴ “Bethel achun hung unla, thil gilo bawl un! Gilgal achun hung unla, bawhsietna supung un! Na kithawihnateu chuh zing chengin hun chawi unla, na sawma-khatteu chuh ni thum hal cheng leh hun chawi khawm un.

⁵ Chun, kipah thugenna kithawihnate chuh lân unla, nawp thu a thillat te chuh gen unla, phuong un: Aw Israel chate haw, ziehi na bawl nuom ngâl u a,” Lalpa Pathien chun a tii.

⁶ “Chun, Ken le na khawpiteu chengah kiel ka tun sak a, na mun chengcheng u ah tâksapna ka tunsak a, khutisa chun le ka kawmah na hung vaikit puou hi,” Lalpa chun a tii.

⁷ “Chun, buh âtna ding tha thum a um lai in, na chung u a guoh zu ding le ka tutâng a: khawpi khat chunga zuk sak in, khawpi dang chungah ka zuk sak puoh a, mun khenkhat ah a zu sek a, a zuk lohna munte chuh a gaw sek a.

⁸ Khutichun, khawpi nih ahim thum ahim chuh, khawpi dangah tui dâwn dingin a vak u a, a khawp diek puou a, khutisa chun le ka kawm lam ah na hung vaikit nuom puou ui,” tih hi Lalpa kamsuok ahi.

⁹ “Gawtna leh apna’n nanguh ka hun gawt a, na huonteu, na grep huonteu, na theipi kungteu, na olive thingteu cheng chuh thingnget lung chun a ne zo vek ta a: khutisa chun le ka kawmah na hung vaikit nuom puou hi,” Lalpa’n chun a tii.

¹⁰ “Aigupta gam bangin, na laku ah hipi ka hun sawl a, chemzâm in na tangvalteu chuh ka that ta a, na sakawlteu ka puimang ta a: chun, na sepaihteu giehmun namsie chuh, na nâk uh a nam khawp hielin ka umsak a: khutisa chun le ka kawmah na hung vaikit puou,” Lalpa chun a tii.

¹¹ “Sodom leh Gomorra khuo Pathien in a sukchip lai bang khan, na lak uh a khenkhat ka suchim a, meikuong laka thingkhuoh lâkdawk bang na hiu a: khutisa chun le ka kawmah na hung vaikit puou ui,” Lalpa chun a tii.

¹² “Zieziekchun, Aw Israel, na chungah hitibang hin hih ing ka: na chunga ziehi ka hih ding ziekin, Aw Israel na Pathien tuok dingin kisazo in!”

¹³ Ngaitiem u! tângte siem a, huih siem a, mihingte a ngaihtuohna hetsak a, zingkal chuh zan suoh sak a, lei mun sangte a chieh pa chuh, Amin chuh Lalpa, Sepaihte Pathien chuh ahi ngâla.