AMOS 1 - PATHIEN LEKHABU THIENGTHO (BSI)1 Juda Leng Uzia vaihawm lai leh, Israel Leng Joash chapa Jeroboam vaihawm laia, leiling um ma kum nihna a chun, Tekoa muna ganguol vengte laka Amos in Israel te chungchâng thu a muh chuh: 2 Amos chun, “Lalpa chuh Zion tâng apat chun kiko intin, Jerusalem apat in a aw chu gi dawk intin; gancha tatna munte chuh gaw zo intin, tichun, Karmel tânga hampa haw chuh vuoi zo ina,” a ti a. A kimvel uh gamte chunga Vaihawmna Suria 3 Lalpa chun hiti hin a tii; “Damaska khuo bawhsietna thum te ziekin ahi, li ziekin, a gawtna chuh suhai puo’ng ka; Gilead gam chuh buh gawihna thik haw a chuh a gawt ziekin. 4 Khutichun, Leng Hazael in leng-In a sak chunga chun mei sawl ing ka ting, Benhadad kulhte chuh hâl chim ing ka. 5 Damaska khawpi kawtkhak chuh khen gawp ka ting, Aven luiphai a chêngte leh, Beth-eden vaihawmte chuh ladawk ing ka. Tichun, Suria mite chuh Kir gam ah sala puih mang in um un au,” a ti a. Philistia 6 Lalpa chun hiti hin a tii, “Gaza khuo a mite chuh, a bawhsietnau thum ziekin ahi, li ziekin ka gawtna chuh suhai puo’ng ka; Nam pumpi chuh suok banga Edom mite kawma a zuok ziekun. 7 Khutichun, Gaza khawpi kulh bâng chunga chun mei sawl ing ka ting, tichun, a kulhte chuh katum zo ina. 8 Ashdod khawpi vaihawmte leh Ashkelon vaihawmte chuh sumangthai ing ka. Ekron khawpi chuh gawt ing ka ting, Philistia mi, nutsieh a umte chuh thi vek un au,” a ti a. Tura 9 Lalpa chun hiti hin a tii, “Tura khuo bawhsietna thum ziekin ahi, li ziekin ka gawtna chuh suhai puo’ng ka. Nam pumpi chuh Edom gama sala a puih ziek un leh, chamna thutiem a siem uh a nit loh ziek un. 10 Zieziekchun, Tura khawpi kulh bâng chunga chun mei sawl ing ka ting, a kulhte chuh katum vek ina,” a ti a. Edom te 11 Lalpa chun hiti hin a tii, “Edom mite bawhsietna thum ziekin, ahi, li ziekin ka gawtna chuh suhai puo’ng ka. A suohpihteu Israel te chuh delh zinga, a chung u a zahngaihna himhim a suklat loh ziek un. A lungnatnau chun tâwp a nei puoh a, a thihsan ngeiloh ziekun. 12 Khutichun, Teman khawpi chunga chun mei sawl ing ka ting, Bozrah khuo kulh chengcheng chuh katum vek ina,” a ti a. Ammon te 13 Lalpa chun hiti hin a tii, “Ammon chate bawhsietna thum ziekin ahi, li ziekin, ka gawtna chuh suhai puo’ng ka. Gam deih beh zieka a gâl bawlnau a, Gilead numeite nauvawp lai haw nasan a phil zak ziekun. 14 Khutichun, Rabbah khawpi kulh bâng chunga chun mei sawl ing ka ting, a kulhte chuh katum vek ina. Tichun, kido ni chun kiko thawm um intin; kidona chuh huihpi bang mai in um ina. 15 A lengteu leh a milienteu chuh sala puih in um vek un au,” a ti a. |
Gangte Holy Bible - PATHIEN LEKHABU THIENGTHO
Copyright © Bible Society of India, 2010.
Used by permission. All rights reserved worldwide.
Bible Society of India