2 SAMUEL 9 - PATHIEN LEKHABU THIENGTHO (BSI)

David leh Mephiboseth

¹ Chun, David chun, “Jonathan zieka lungsietna ka suklat theihna dingin Saul inkuote laka mi a um nalai um?” a ti a.

² Chun, Saul inkuote suok khat a min Ziba a um a, David kawma chieh dingin a sam u a, chun, leng chun a kawmah, “Ziba kha na him?” a ti a. Chun, amah chun, “Ka hi, kei na suokpa hi,” a ti a.

³ Chun, leng chun, “Pathien lungsietna ka suklat theihna dingin Saul inkawte laka mi umlo ahiu em?” a ti a. Chun, Ziba chun leng kawmah, “Jonathan chun chapa khat a nei na lai a, a kêngbâi ahi,” a ti a.

⁴ Chun, leng chun a kawmah, “Khawitaka um ahi?” a ti a. Chun, Ziba chun leng kawmah, “Ngaitie, Lodebar apat Amiel chapa Makir In ah a um hi,” a ti a.

⁵ Khutichun leng David chun mi a sawl a, Lo-debar apat Amiel chapa Makir In a um chu a va puih sak a.

⁶ Chun, Saul chapa Jonathan cha Mephiboseth chu David kawmah a hung a, a maia lei si’n chibai a bûk a. Chun, David chun, “Mephiboseth,” a ti a. Amah chun, “Entie, na suok hih,” a ti a a dâwng a.

⁷ Chun, David chun a kawmah, “Lau ki’n: na pa Jonathan ziekin na chungah lungsiet sulang ngêi ngêi ing ka ting, na pu Saul gam chengcheng hun neih sak kit ing ka ting, ka dawhkhâng ah an ne zing ta’n la,” a ti a.

⁸ Chun, chibai a bûk a, “Kei uicha thi sanga le phachuom lo na suok hi bang ahi a na ngaihsak ahim?” a ti a.

⁹ Khutichun leng chun Saul suokpa Ziba chu a sama, a kawmah, “Saul thil neih chengte leh a inkawte thil neih chu na pu chapa hi ka pie suok kêi hi.

¹⁰ Khutichun amah dingin lo bawlsak in na tin, nang leh na chapate leh na suokte tawh; chun, na pu chapa chun nek dingte a neih theihna dingin na sepdawk haw chu hun chawiin na tin; na pu chapa Mephiboseth hin chuh ka dawhkhâng a hin an ne zing ina,” a ti a. Ziba chun chapa sawmlenga leh suok sawmnih a nei a.

¹¹ Khutichun Ziba chun leng kawmah, “Zahum tak, ka pu’n na suok thu a piek bang zelin na suok hin hih ina,” a ti a. Leng chun, “Mephiboseth hin vang ka dawhkhâng ah leng chapa mah bangin an ne’na,” a ti a.

¹² Mephiboseth chun chapa naupang a nei a, a min chuh Mika ahi. Chun, Ziba ina um chengcheng chu Mephiboseth suok ahi tau a.

¹³ Khutichun Mephiboseth, a keng langnih a baipa chu Jerusalem achun a cheng ta a, leng dawhkhâng a chun an a ne zing tai.