2 SAMUEL 8 - PATHIEN LEKHABU THIENGTHO (BSI)

David Gal Zawhna

¹ Chun, zie nung chawmkhat hal chun, David in Philistia te chu a do a, a zo a, gam chunga a thuneihnau chu a sukbei sak ta a.

² Chun, Moab mite a do kit a, amau haw chu tuol ah a kuol sak a, a guol tuok diem a; tien nih chu thah dingin a guola, tien khat chu a hinga hawih dingin a guol a. Tichun Moab mite chu David khuoletui a hung hi tau a, sieh a pie sek tau a.

³ David chu Euphrates luia a gam la kit dinga a chieh kawmin Zobah leng Rehob chapa Hadadezer le a zo a.

⁴ Tichun David chun a sakawl chung chu mi sangkhat leh zasagih leh sepaih singnih a lâksak a: chun David chun kangtalai kai sakawl chengcheng chu a zagui uh a sattan sak a, kangtalai zakhat kai ding vang chu a hing hawih a.

⁵ Chun, Damaska a Suria mite Zobah leng Hadadezer panpih dinga chiehte chu David in a do a, mi singnih leh sangnih a that a.

⁶ Khutichun David chun Suria gama Damaska achun sepaih a kawih a; tichun Suria mite chu David khuoletui a hung hi tau a, sieh a pie sek u a. Chun, Lalpa’n David chu a chiehna tak ah a zawh sak zel a.

⁷ Chun, David chun Hadadezer miliente sana phaw haw chu a lâksak a, Jerusalem ah a puoh a.

⁸ Chun, Hadadezer khuo Betah apat, Berothai apat, David chun sumeng tamtak a la a.

⁹ Chun, Hamath leng Toi chun Hadadezer sepaih chengcheng David in a zo suok tai tih a na za a,

¹⁰ Hadadezer chu a do a a zawh zieka chibai bûk ding leh kipahpih dingin Toi chun a chapa Joram chu David kawmah a sawl a: Hadadezer chun Toi hi a na do sek ngâl a; Chun, Joram chun dangkaguo bel, sana bel leh sumeng bel haw a hun puoh a.

¹¹ Ziehaw chu gamdangte a lâkna chengcheng apat a dangkaguo leh sana a piekte chu tawh leng David chun Lalpa kawma le a pie a:

¹² Suria te a, Moab te a, Amon te a, Philistia te a, Amalek te a, Zobah leng Rehob chapa Hadadezer apat a a gâllâkte chengcheng chu tawh.

¹³ Chun, David chun Chi Guom kiti muna Suria mi singkhat leh sanggiet a thah zawh a a hungkit chun a min a hung thang ta a.

¹⁴ Chun, Edom-achun sepaih a kawih a; Edom mun gam chengah sepaih a kawih sausau a, tichun Edom mite chengcheng chu David khuoletui a hung hi tau a. Tichun Lalpa’n David chu a chiehna chengah a zawh sak zel ta a.

David miliente

¹⁵ Khutichun David chun Israel mi chengcheng chungah vai a hawm a; a mipite chungah kitûp tak leh dik takin vai a hawm a.

¹⁶ Chun, Zeruiah chapa Joab chuh sepaih lawiupa pên ahi a, chun, Ahilud chapa Jehoshaphat chu chanchin zikin a pang a;

¹⁷ chun, Ahitub chapa Zadok leh Abiathar chapa Ahimelek chu thiempu ahiu a; Seraiah chu lehkhazik ahi a;

¹⁸ chun, Jehoiada chapa Benaiah chu Kereth mi leh Peleth mite lawiupa a hiu a; chun, David chapate chu thiempu ahiu hi.