2 SAMUEL 7 - PATHIEN LEKHABU THIENGTHO (BSI)

David in Temple Sak a lunggulh

¹ Chun, hiti hi ahi a, leng David chu a In ah a um a, Lalpa’n a kieng vel a melma chengcheng lak apat chun gâlmuong in a um sak ta a.

² Chun, leng chun thiemgau Nathan kawmah, “Entie, kei chu sidar thinga kisa In ah ka cheng a, himahlele Pathien Thuthunna bawm chu puon-In sung ah a um a,” a ti a.

³ Chun, Nathan chun David kawmah, “Na lunggil a um bang tak chun va hih in, Lalpa na kawmah a um a puo,” a ti a.

David Thugawlh

⁴ Chun, hiti hi ahi a, zie zan mah chun Nathan kawmah,

⁵ “Ka suok David chu va hilh in, Lalpa chun hiti hin a tii, ‘Ka umna ding nangin nei sak sak dinga ahim?

⁶ Israel chate Aigupta gam apat ka puihdawk apat tuni tieng hin In ah ka um puoh a, puon-In leh hobuk ah ka um zaw sek a.

⁷ Israel chate chengcheng laka ka chieh na cheng ale, ka mite Israel te vak dinga ka guot vaihawmte kawm ale, Bangati a sidar thinga In nei sak sak loh uh,’ ti’n ka gena ahim?

⁸ “Zieziekchun ka suok David kawmah, Sepaihte Lalpa chun hiti hin a tii, ‘Belam tatna muna na belam chin lai chun ka mi Israel mite chunga lawiupa dingin ka hun la a:

⁹ Chun, na chiehna tak ah na kawmah ka um zel a, na masang achun na melmate ka hih mangthai zel a; leia mi lopi takte min bang min lopi tak hun putsak ing ka.

¹⁰ Chun, ka mi Israel te dingin mun guot ing ka ting, zie tak achun cheng untin, a chênnau achun sukgimtheih in um ta puo’n au. Zie gam a lut u a pat hin mi thagum suoh hatte sukgimtheih in a um u a, mahleh zie tawbang chu um kit ta puo’n a.

¹¹ Na melmateu lak apat a hun veng ding leh suonlepak hun nei dingin thu ka hun tiem ngâl a.

¹² Na thihni ahung tun a; na pute kawma vuiha na um tieng leh, na nunga na suon, na gil a gah ding chuh tungding ing ka ting, a gam chu hihdet ing ka.

¹³ Amah chun keia dingin Ho-In sa’n tin, a lalchutphah chu kumlekhuo a dingin hih det ing ka.

¹⁴ A pa hi’ng ka ting; amah chu ka chapa hi’n tin: thil a hihkhelh chun, pa’n cha a zêp guolin zêp ing ka ting, thunun ing ka;

¹⁵ himahlele Saul kawm apat a ka lungsietna ka lâkmang bang khan amah vang chu nusieh puo’n a.

¹⁶ Chun, na inkuon leh na gam chu kumlekhuo a hihdet hi’n tin, na lalchutphah chule kumlekhuo a hihdet hiding ahi,’ a tii,” ti’n Lalpa thu ahung tung a.

¹⁷ Zie thu haw chengcheng bang chuleh zie kilâkna bang tak chun Nathan chun David kawmah a gen a.

David Pauchamna

¹⁸ Khutichun leng David chu a lut a, Lalpa masang achun a chu a; “Aw Lalpa Pathien, kuo ka hi a, ka insung mite hile kuo ahiu a, hiti chan chan hi nei puih a?

¹⁹ Aw Lalpa Pathien, ziehaw chu nang mitmuh chun thil neucha vang ahi na’n; himahlele na suok inkuon hung umdan ding chu kum tamtak sunga dingin na na gen ta a; Aw Lalpa Pathien, ziehaw hile mihingte hihdan ngeina mah ahi a.

²⁰ David hin na kawmah bang gen beh chuom ding a nei em? Na suok hi na he suok kei ngâla, Aw Lalpa Pathien.

²¹ Na suok hetsakna dingin na thu ziekin leh nangmah lunggil bang zelin zie thil lopi tak hi na hih ta a.

²² Zieziekchun Aw Lalpa Pathien, nang chu na lopi a, ka bil u a ka zak dân un nang tawbang himhim a um puou a, Nangmah lo ngâl Pathien dang himhim le a um puou hi.

²³ Aigupta gam apat leh namtin leh a pathienteu lak apat nang ding a na teldawk, na mite masanga nang dinga thil lopi tak leh na gama dinga thil lauh-um tak hih ding leh, amah min lopi tak siem dinga Pathien in amah,” mite dinga a hun teldawk, na mi Israel te bang hi khawvel ahin nam dang kuo a um?

²⁴ Khutichun na mi Israel te chu kumlekhuo a na mi a hung hihtheihna dingun nanga dingin na hihdet ta a; chun, Lalpa, nang chu a Pathien uh na hung hita a.

²⁵ “Tichun aw Lalpa Pathien, na suok chungchâng thu leh a inkawte chungchâng thu na gen chu kumlekhuo a dingin hihdet inla, na gen tâksa bang khan hih in.

²⁶ Chun, ‘Sepaihte haw Lalpa chu Israel te Pathien ahi a,’ ti’n na min chu kumlekhuo a limbawl in um hen; tichun na suok David inkawte chu na masangah hihdet in um in au.

²⁷ Aw, Sepaihte haw Lalpa, Israel Pathien, na suok kawmah, ‘Inkuon chu hun tundawk sak ing ka’ ti’n na phuong ta ngâla: zieziekchun na suok hin zie pauchamna chu na kawmah a tun ngam ahi.

²⁸ “Aw Lalpa Pathien, Nang chu Pathien na hi a, na thu chu thutak ahi a, zie thilpha hi na suok kawmah na tiem ta a;

²⁹ zieziekchun na suok inkawte chuh na masanga kumlekhuo a a um zing theihna dingun vang hun pien; Aw Lalpa Pathien, nang chun na na gen ta ngâl a; na vangsakna’n na suok inkawte chu kumlekhuo a vangsak in um u hen,” a ti a.