2 SAMUEL 6 - PATHIEN LEKHABU THIENGTHO (BSI)

Thuthun Bawm Jerusalem a Lâklut kitna

¹ Chun, David chun Israel mite laka sepaih pha chiet kiteldawk sangthum a samkhawm kit a,

² Tichun David chu a kipan a, Juda gama Baale khuo apat in Cherub te chunga chu sepaihte Lalpa min a put sak uh Pathien bawm chu la to kit ding in a kawma mi um chengcheng te chu tawh a kuon tau a.

³ Tichun, Pathien bawm chu tânga Gibeah a Abinadab In apat chun a ladawk u a, kangtalai thak chungah a kawih u a, Uzzah, Ahio leh Abinadab chapate chun kangtalai chu a tawl u a;

⁴ Ahio chu Pathien bawm masang achun a chieh a.

⁵ Chun, David leh Israel mi chengcheng chun Lalpa masang achun thil gi thei chichuom chuom, châk thinga siemte leh kingkangte, pekgitte, khuongneu te, pengkun bi neite, dakkhutbet te tumin a lam u a la a sau a.

⁶ Chun, Nakon phuol a tun u chun, bâwngchal chu a kithin thin ziek chun Uzzah chun Pathien thuthunna bawm chu a vak bana, a tu ta a.

⁷ Tichun Lalpa lung chu Uzzah chung achun a na phut ta a, a thilhih dikloh ziek chun Pathien in zie tak achun a that ta a, Pathien bawm kawm achun a thi ta a.

⁸ Khutia Lalpa’n lung-awilo a a gawt ziek chun David chu a lungna a; zie mun chu Prez-Uzzah a sa ta a, tuni tieng hin a na hi zing tai.

⁹ Chun, zie ni chun David chun Lalpa chu a lau ta a, “Bangti’n Lalpa bawm chu ka kawmah ahung thei ta die aw?” a ti a.

¹⁰ Khutichun David chun Lalpa bawm chu David khuo a amah kawm achun a chawn nuom ta puoh a; David chun Git-mi Obed-edom In lam ah a kawih zaw ta a.

¹¹ Khutichun Lalpa bawm chu Git-mi Obed-edom In achun tha thum a um a; tichun Obed-edom leh a inkawte chengcheng chu Lalpa’n a vangsak a.

David in Pathien Bawm a Lâktohna

¹² Chun, leng David chu, “Thuthunna bawm ziekin Obed-edom inkawte leh a In a lo chengcheng Lalpa’n a vangsak ahi,” ti’n a hilh u a. Tichun David chun Thuthun bawm chu Obed-edom In apat chu, David khawpi achun kipâk takin a va la ta a.

¹³ Chun, hiti hi ahi a, Thuthun bawm zawnte chun kal gup a vak suon phet u chun bâwngchal leh gan vak thau in a kithawi u a.

¹⁴ Chun, David chu Lalpa masangah a theihtawp in a lam a, David chun patngatpuon thiempu puonâk a âk a.

¹⁵ Khutichun David leh Israel mi chengcheng chun kiko vengvung kawm leh pengkun mût hâm chuoi chuoi kawmin Thuthun bawm chu a la to tau a.

¹⁶ Chun, hiti hi ahi a, Thuthun bawm David khuo a a lut lai chun Saul chanu Mikal chun tukvan apat in a na en a, Lalpa masanga David chawm leh lam chu a vak mu a, a lunggil in a na musit ta a.

¹⁷ Tichun Thuthun bawm chu a la lut u a, a kawihna dinga David in a zak, puon-In sunga amun ding achun a kawih tau a: David chun hâlmang thilpiekte leh chamna thilpiekte Lalpa masang achun a pie a.

¹⁸ Chun, David in hâlmang thilpiekte leh chamna thilpiekte a piek zawh chun sepaihte Lalpa min in mipite chu a vangsak a.

¹⁹ Chun, mipi chengcheng, Israel mipite chu a mei a pa’n mitin chângthâk tang khat leh sa pheh khat leh grep phogawt bawk khat a hawm chiet a.

²⁰ Khutichun mi chengcheng chu amau haw In lam chietah a chieh tau a. Khutichun David chule a inkawte vangsak dingin a kilehkit ta a. Chun, Saul chanu Mikal chuh David muok dingin a hung pawt a, “Tuni a Israel leng chu a nasa na e, mimawl, zahchâkna helo sangawn a um bang mai in tuni a a suok nungakte mitmuha a um mai chuh,” a na ti a.

²¹ Chun, David chun Mikal kawm achun, “Na pa leh a inkuo te chengcheng sanga ei tel a, Lalpa mi Israel te chunga lenga ei guotpa Lalpa limbawl in apuo ka lam; Lalpa limbawl na’n lam ding mawng ka hi a puo.

²² Ziehaw sang hin zahpih um ing ka, keimah ngêi le hung kisit zawsem ding ka hi; amahvang chuh zie suok nungak na gente chawihsân hin um ing ka,” a ti a.

²³ Khutichun Saul chanu Mikal chu a thih tiengin cha nei lo in a um ta a.