2 SAMUEL 4 - PATHIEN LEKHABU THIENGTHO (BSI)

Ishboseth Tuolthihna

¹ Chun, Saul chapa Ishboseth chun Hebron ah Abner a thii tih a na het chun a bân tha a hung chau ta a, Israel mite chengcheng lungthim chule a buoi ta a.

² Chun, Saul chapa Ishboseth chun sepaih lawiupa nih a nei a; khat min chu Baanah ahi a, a khatzaw min chu Rekab ahi, Benjamin suon Beeroth-mi Rimmon chapate suon ahiu a: (Beeroth chu Benjamin gama ngaih ahi ngâl a:

³ Beeroth khuo a mite chu Gittaim ah a tai u a, tuni tieng hin zie tak achun a um tau hi).

⁴ Chun, Saul chapa Jonathan chun chapa kêngbâi a nei a. Jezreel apat a Saul leh Jonathan chanchin a na zak u chun kum nga mi ahi a; tichun a dawnpa chun a pawm a, a taihmangpih a, khutia a taihna lam achun a khetha a, tichun a keng a hung bai ta a. A min chu Mephiboseth ahi.

⁵ Chun, Beeroth-mi Rimmon chapate Rekab leh Baanah chu, Ishboseth in chu sun nisat lai tak in a va tung u a, amah chu zâlkhun ah ana sun ih a.

⁶ Tichun, buh la ding hi leu kilawm takin insung ah a lut u a, tichun a gil ah a sun u a, Rekab leh a suohpihpa chu a taimang tau hi.

⁷ Khutichun a kuolna indan lam achun a va lut u a, zalkhun a kuol lai chu a va sun u a, a that u a, a luchang a tan u a, a lu chu a lau a, Arabah hawhpai in zankhuo’n a chieh u a.

⁸ Chun, Ishboseth luchang chu Hebron ah David kawmah a hun puou a, leng kawm achun, “Ngaitie, zie hi nangmah hun thah guo, na melma Saul chapa Ishboseth luchang; Lalpa chun ka lalpa phuba chu tuni hin Saul leh a suonte apat a lâksak tai,” a tiu a.

⁹ Chun, David chun Beeroth-mi Rimmon chapa Rekab leh a suohpihpa chu a dâwng a, a kawm u ah, “Lalpa ka lungkhamna chengcheng apat ei hukdawkpa hinna sâlin ka gen ahi,

¹⁰ Chanchin pha hun puo a kingai in, ‘Ngaitie Saul chu a thi tai’ ti’n mi khatin ei hung hilh a, amah chu ka man a, Ziklag ah ka that a; zie chu a chanchin pha hun tut mana ka piek chu ahi.

¹¹ Mi kitûp, amah insung lum a a zâlkhun chunga mi nunsiete’n thah uh thisan man chu na chung u ah ka hah ngek zaw diek in lei chunga pat in ka hun hah sukmang na ding e,” a ti a.

¹² Khutichun David chun a tangvalte chu thu a pie a, amau chun Rekab leh Baanah chu a that u a, a khut leh a keng uh a tan sak u a Hebron a dîl chung achun a khâi u a. Ishboseth luchang vang chu a lau a, Hebron a Abner thân achun a vui tau a.