2 SAMUEL 3 - PATHIEN LEKHABU THIENGTHO (BSI)

¹ Saul inkawte leh David inkawte chu sawttak a kido u a; David chu a hung hât deuh deuh a, Saul inkawte chu a hung hatlo deuh tau a.

Hebron a David Inkawte

² Chun, David chun Hebron khuo achun chapate a nei a; a cha masapen chu, Amnon, Jezreel mi, Ahinoam mi apat ahi a;

³ a bân a chu Kileab, Karmel mi Nabal zi Abigail apat ahi a; a thumna chu Absalom, Geshur leng Talmai chanu Maakah chapa a hi a;

⁴ chun, a lina chu Adonijah, a nu Hagith ahi a; a ngana chu Shephatia, a nu Abital ahi a;

⁵ chun, a gupna chu Ithream, a zi Eklah apat ahi a. Ziehaw hi David cha Hebron a piengte chu ahiu hi.

⁶ Chun, hiti hi ahi a, Saul inkawte leh David inkawte a kido sung u chun Abner chu Saul nungzuite lak achun a hât deuh deuh ta a.

David kawma Abner a Taihna

⁷ Saul chun mei a nei a, a min chu Rizpah ahi a, Aiah chanu ahi. Chun, Ishboseth chun Abner kawmah, “Bangati a ka pa meinu kuolpih na him?” a ti a.

⁸ Khutichun, Ishboseth thugen chun Abner chu a sulungna mah mah ta a, “Uicha luchang mai ka hi a ahim? Tuni tieng hin na pa Saul inkuote leh a unaute leh a guolte chungah nunnemna ka sulang a, David khut ah ka hun pie puoh a; himahlele, nangin zie numei chunga gilo hin nei ngawh ta mai a.

⁹ Saul inkawte a gam chu lâksak a, Israel leh Judate chunga,

¹⁰ Dan apat a Beer-sheba tienga David lalchutphah tungding dingin Lalpa’n David kawma a kipautiem banga ka hih loh chun Pathien in a lawh nawp nawp ei lawh hen, zie sanga nasa chun le,” a ti a.

¹¹ Tichun Abner chu a lauh ziekin a dâwng ngam himhim ta puoh a.

¹² Chun, Abner chun amah thasang in David kawmah palai a sawl a, a kawmah, “Zie gam hi kuo a ahi? Kei kawmah thugawlh siem inla, tichun Israel mite chengcheng chu nang lama pang dinga thuzawh dingin hun panpih ing ka,” a ti a.

¹³ Chun, David chun, “Aw le na kawm ahin thu gawlh ing ka; amahvang chuh nang apat thil khat hun ngek ing ka, zie chu ziehi ahi, ei kimuhpih dinga na hung tieng leh Saul chanu Mikal na hun puih masak loh chun ka mel mu thei puo’n la,” a ti a.

¹⁴ Chun, David chun Saul chapa Ishboseth kawm achun, “Philistia te zek vun zakhat a ka châwk ka zi Mikal chu ei hun pien,” ti’n palai a sawl a.

¹⁵ Chun, Ishboseth chun mi a sawl a, a pasal Laish chapa Paltiel ngêi kawm apat chun a pui tau a.

¹⁶ A pasal chun kap kawmin a zui a, Bahurim tiengin a zui a. Khutichun Abner in a kawmah, “Chieh in, vaikit in,” a ti a; chun, a vaikit ta a.

¹⁷ Khutichun Abner chun Israel mite upahaw chu a hopih a, “Tuma khan David chu na leng dingun na deih sek u a;

¹⁸ Tuhin siem tau in; Lalpa’n David chungchâng thu a chun, ‘Ka suok David khut in ka mi Israel te chu Philistia mite khut apat leh a melmateu chengcheng khut apat hukdawk ing ka,’ ti’n a gen hi,” ti’n.

¹⁹ Chun, Abner chun Benjamin mite zak ale a gen a: chun Abner chu Israel mite leh Benjamin inkuo cheng cheng ten pha a sak bang bang uh David zaka va gen dingin le a chieh a.

²⁰ Khutichun Abner chu Hebron a David kawmah mi sawmnih tawh a chieh u a. Chun, David chun Abner leh a tawnpih mi sawmnih te dingin guolvakna a siem a.

²¹ Abner chun David kawmah, “Kipan ing ka ting, na kawma thu a gawlh theihna dingun leh na duhthusam bang taka vai na hawm theihna dingin Israel mite chengcheng ka lalpa kawma kaikhawm dingin chieh ing ka,” a ti a. Chun, David chun Abner chu a chieh sak ta a: tichun thamuong takin a chieh ta a.

Abner Thahna

²² Chun, David mite leh Joab gamvak chu a hungkit u a, gâllâk sum tamtak a hun puou a; himahlele Abner chu Hebron a David kawm achun a na um ta puoh a; a na sawlmang ta ngâl a, amah le thamuong takin a chieh tai.

²³ Joab leh a kitawnpih te chengcheng chu a hung tun phet u chun, “Ner chapa Abner chu leng kawmah a hung a, amah chun a chieh sak kit ta a, thamuong takin a chieh kit tai,” ti’n Joab chu a hilh u a.

²⁴ Khutichun Joab chu leng kawmah a chieh a, “Na thilhih hi bangti dân ahi ta’m? ngaitie, Abner chu na kawmah a hung a, bang a ti a na chieh mang sak a, na sawl mang mai ahim?

²⁵ Ner chapa Abner chu na he a, nangmah hun thêm dingin, na pawt lam leh na lut lam leh na thilhih taphawt het guon a hung ahi,” a ti a.

²⁶ Chun, David kawm apat Joab a hung pawt pawt chun Abner delhzui ding in palai a sawl a, Sirah tuisutdawk apat in a hun puikit u a; himahlele David chun a he puoi.

²⁷ Chun, Abner Hebron a hung tun chun Joab chun kulh kawtkhak a hoguk dingin a puichuom a, a suohpihpa Asahel thisan phuba lâkna ding chun a nakguh ngana nuoi tak chuh a sut saka, a thi tai. Khutichun Abner chu Joab suohpihpa Asahel a thah ziek chun thah in a um tai.

²⁸ Chun, zie chu David in a hun het phet chun, “Ner chapa Abner thisan apat hin kei leh ka gam chu Lalpa mit muhin ka thieng ui:

²⁹ Joab lu chung ah kie henla, a pa leh a inkuote chengcheng chunga tawh; Joab inkawte lak achun thiput ahim, phâk ahim, mawlh manga chieh ahim, chemzâm a thi ahim, kiel ahim kikiengkawih kha kihen,” a ti a.

³⁰ Khutichun a suohpihpau Asahel chu Gibeon a kidona a a thah ziek u chun Joab leh a suohpihpa Abishai chun Abner chu a that tau a.

Abner Vuihna

³¹ Chun, David chun Joab leh a kawma mipi um chengcheng te kawm achun, “Na puonhawu bawtthêk unla, kawlladip silh unla, Abner thih chu sun un,” a ti a. Chun, David chun thikuong chu a zui ta a.

³² Chun, Abner chu Hebron achun a vui u a: leng chu aw suoh zet in Abner thân achun a kap ta a; mipi chengcheng le a kap u a.

³³ Chun, leng chun Abner chu a kah a: “Abner chu mingawl thih in a thi dinga ahim?

³⁴ Na khut chu kân ahi puoh a, na keng chu le kawlbuh ahi diek puoi, Minunsie chate masanga mi a puk banga na puk tâk mai chu!” a ti a. Chun, mi chengcheng chun a kah kit u a.

³⁵ Tichun sun a hung hih phet chun David an nek sak guon mi chengcheng chu a hung u a; himahlele David chun, “Ni tum ma a an ahim, thil dang ahim le ka nek chun Pathien in a nawp nawp ei lawh hen: zie sanga nasa chun le,” ti’n a kipautiem a.

³⁶ Zie chu mi chengcheng in a het un a kipâk mah mah u a: leng thilhih taphawt chun mipite chu a sukipak zel a.

³⁷ Khutichun mipi chengcheng leh Israel mi chengcheng chun zie ni chun Abner thih chu leng thu ahi puoi tih a hun he tau a.

³⁸ Chun, leng chun a mite kawm achun, “Tuni hin Israel milien mi lopi tak a thii tih helo na hiu hi?

³⁹ Lenga thau nuh himahleng, tuni hin thahatna ka neilo ahi; zie mi haw, Zeruiah chapate hi kei dingin thuok a haksa taluou hi: Lalpa’n thil phalo hihte chu a gitloh dân bang zel un dinthuk hen,” a ti a.