2 SAMUEL 23 - PATHIEN LEKHABU THIENGTHO (BSI)

David Thugen Nunung haw

¹ Jessai chapa David chu Pathien in mi thupi takin a siem a; Jakob Pathien chun leng dingin a tel a, Israel chate dingin la hawihtak tak a phuok a. Ziehaw hi David thugen nunung pên te chu ahi.

² Lalpa thagau chun keimah ei mang in a gen a, A thu chu ka lei ah a um a.

³ Israel Pathien chun a gen a; Israel te suongpi chun: “Mi chunga diktaka vaihawm sek, Pathien kihcha kawma vaihawm sek chu dik ngêi ina.

⁴ Zingkal a meibuol kailo hiela nino hung suok bang leh, Guohzuk zawh a van hung thieng a, leia hampa hung dâwn dâwng ngikngiek tawbang hi hi’n a.”

⁵ “Ka inkuon u chu Pathien kawma kipat hilo ahim? Kumlekhuo thugawlh ka kawmah a gawlh a, Bangkim kitûp leh hihdet kêi in; ka hukdamna kim leh duhthusam kim, seldawk sak lo ding ahi a ahim?

⁶ Himahleh, minunsiete vang chu ling tawbanga paihmang hiu intin, Khutngawn a khawih theih ahi ngâl puou a:

⁷ A va khawih ding chun thik tawn leh tiengcha lung mat ahi; Tichun a mun u ah hâltum vek hiding ahiu hi, ti’n ei hopih a,” a ti a.

David Sepaih Hangsante

⁸ Ziehaw hi David sepaih hangsante min chu ahi: Takemonmi Josheb-bashebeth chu sepaih lawiupate laka a lienpen ahi a; amah chu tum khata mi zagiet thatpa Eznite mi Adino a tih pau mah kha ahi.

⁹ Chun, a bana chu Ahomi chapa Dodo chapa Eleazar ahi a; zie pa chu Philistia mite kido dinga a kikhawp khawm lai u a a cho uh, Israel mite a chiehmang suok kêi nung u a David kawma sepaih hangsan thum te laka khat khah ahi:

¹⁰ Chun, amah chu a kipan a, a khut a kham a, a chemzâm chuh tu thei lo hiel khawp in Philistia te a that a: zie ni chun Lalpa’n nasa takin a zawh sak a; chun, mipite chu a nung ah gâllâk thil la ding chauh in a hung vaikit u a.

¹¹ Chun, a bân kit a chu Hara-mi Agee chapa Shamah ahi a. Chun, havai umna mun ah Philistia mite chu zawh guon a kisamkhawm u a; chun, mipite chun Philistia mite chu a taihsiet san u a.

¹² Himahlele, Shamah chu zie tak mun achun a ding a, a veng chak kêi a, Philistia mite chu a that a: Lalpa’n nasa takin a guolzawh sak ta a.

¹³ Chun, sepaih hangsan sawmthum laka thum te chu a kuon dawk u a, buh ât lai takin David kawmah Adullam kâwlhâwm ah a chieh u a; chun, Philistia mite chun Rephaim kawn ah panmun a guonggalh u a.

¹⁴ Chun, khutih lai chun David chu kulh sung ah a um a, zie hun lai mah chun Philistia sepaih haw chu Bethlehem ah a um u a.

¹⁵ Chun, David chun tui a utcha mah mah mai ta a, “Bethlehem a tuisutdawk tui, kulh kawtkhak kawma kha dâwn dinga ei va lak sak um leh aw,” a ti a.

¹⁶ Khutichun sepaih hangsan thum te chun Philistia te sepaih umna chu a vak hawhpai u a, kulh kawtkhak kienga Bethlehem a tuilaihdawk chu a va khâi u a, a hun chawi u a, David kawmah a hun chawi u a: Himahlele a na dâwn nuom puoh a, Lalpa dingin a sungtha zaw ta a.

¹⁷ “Aw Lalpa, ziehi ka hih loh ding zie mai chu; thih ngama chiehte thisan chu ka dâwn dinga ahim?” a ti a, tichun a dâwn nuom ta puoh a. Zie thil haw chu sepaih hangsan thum te chun a hih uh ahi.

¹⁸ Zeruiah chapa Joab suohpih Abishai chuh a thum lak uh achun lawiupa pên ahi a. A tiengcha’n mi zathumte chu a do a, a that a, thum te lak achun minphat a lawh a.

¹⁹ Thum te lak achun limbawl tak pên hilo ahim? Zieziekchun a lawiupa dingun a siem u a: himahlele a minthang pên thum te lak ah simtel in a pang puoi.

²⁰ Chun, Kabzeel mi hangsan chapa Jehoida chapa Benaia, thil nasatak hihpa chun Moab-mi Ariel chapate nih chu a that a: chun, a va chieh suk a, vuk kiek hun lai in kawkhuk ah sakeibaknei le a vak that a:

²¹ chun, Aigupta mi, mi lien tak a that a: Aigupta mi chun tiengcha a chawi a himahlele amah chun mawlh chawiin a vak zuon a, Aigupta mi tiengcha chawih chu a lâksak a, zie tiengcha chun a sunlum ta a.

²² Jehoiada chapa Benaiah chun khutibang thil chu a hih ziekin sepaih hangsan thum te lak achun minphat a lawh a.

²³ Mi sawmthumte sang chun limbawl tâk ahi a; himahlele chungnung pên thum te lak ah simtel ahi puoi. Chun, David chun amah vengte lawiupa ding chun a kawih a.

²⁴ Joab suohpih Asahel chuh sawmthum laka khat chu ahi a; Bethlehem khuo a Dodo chapa Elhanan te;

²⁵ Harod mi Shammah te, Harod mi Elika te;

²⁶ Pal mi Helez te, Tekoa mi Ikesh chapa Ira te;

²⁷ Anathat mi Abiezar te, Hushat mi Mebunnai te;

²⁸ Aho mi Zalmon te, Netophah mi Maharai te;

²⁹ Netophah mi Banah chapa Heleb te, Benjamin suon, Gebeah khuo a Ribai chapa Itai te;

³⁰ Pirathon mi Benai te, Gaash a luicha dunga um Hiddai te;

³¹ Arbath mi Abi-albon te, Barhum mi Azmaveth te;

³² Saalbon mi Eliab te, Jeshen chapate laka Jonathan te;

³³ Harar mi Shammah te, Arar mi Sarar chapa Ahiam te;

³⁴ Maakah mi Ahasbai chapa Eliphelet te, Gilon mi Ahithophel chapa Eliam te;

³⁵ Karmel mi Hezrai te, Arba mi Paarai te;

³⁶ Zoban khuo a Nathan chapa Igal te, Gad mi Bani te;

³⁷ Zeruiah chapa Joab gâlvan puopa Amon mi Zelek te, Beeroth mi Nahari te;

³⁸ Ith mi Ira te, Ith mi Gareban te;

³⁹ Hit mi Uria te ahiu hi; a bawn u chun sawmthum leh sagih ahiu hi.