2 SAMUEL 22 - PATHIEN LEKHABU THIENGTHO (BSI)

David Gâl zawhna La

¹ Chun, David chun a melmate chengcheng khuta pat leh Saul khut apat Lalpa’n a hukdawk ni chun zie la hi Lalpa kawmah a sa a:

² Tichun David chun, Lalpa chu ka suongpi leh ka kulhpi leh ei hukbitpa ahi a, keia mawng ahi;

³ Ka suongpi Pathien, amah chu gingcha’ng ka; ka phaw leh ka hukdamna ki, ka insang leh ka kihumbitna ahi; ka hukdampa, nangin kipawngnawhna lak apat nei hukdawk sek a.

⁴ Pahchak tâk Pathien chu sam ing ka ting: Khutichun ei dote haw apat hukbit in um ing ka.

⁵ Thihna kinawk chun ei ûmkimvel a, Pathien neilote chun tuilien guolin ei sulau u a.

⁶ Sheol khauhuolte chun ei zem kimvel a: Thihna thâng haw chun ei dal a.

⁷ Ka lungzîn in Lalpa chu ka sam sek a, ahi ka Pathien chu ka uou sek: Chun, amah chun a Ho-In apat chun ka aw a za a, Chun, ka uou thawm chu a bil ah a lut ta a.

⁸ Ziephet chun lei hi a kilîng a, a kithing ta a. A lungnat ziekin van kingakna te na tiengin a kilîng in a kithing ta a.

⁹ A nak apat chun meikhu a chieh to nguoh nguoh a, A kama pawt mei chun a ka luoh luoh a: Zie chun meihawl le a hih âm luoh luoh ta a.

¹⁰ Chun, amah chun vante le a luoi khun a, a chieh suk ta a. A keng nuoi haw achun meipi thim mepmup hi a um a.

¹¹ Cherub chungah a chuong a, a leng ta a: Ahi, huih tha chunglam haw chun a leng a.

¹² Chun, thim chu amah leh amah ki-umkimvelna bukcha’n a siem a; mei sah tak, tuia dim chun a ki-ûmkimvel a.

¹³ A masanga vakna ziek chun, Meihawlte chu a âm a.

¹⁴ Lalpa chun van apat a hâl gi dul dul a, Chungnung pên pa chun a aw a suoh a.

¹⁵ Chun, thal haw chu a kap dawk a, a melmate chu a hihzak a; Kawlte a phet sak a, a hihbuoi zo ta a.

¹⁶ Ziephet chun Lalpa hilhgaihna zieka a nak u a hu pawt in hah mût a a mût ziek chun lei kingakna haw chu suklat in a um ta a; chun, Tuisuohgiet lituong chu a kang a, Leisiet kingaknahaw chu suklatin a um ta a.

¹⁷ Amah chun chunglam apat in a hun bân a, ei tu a; Tui thuk tak apat ei zuk dawk a;

¹⁸ Ei dote hattak lak apat chun ei hukdawk a, Ei mudahte laka le: keia ding chun a hât taluo ngâl u a.

¹⁹ Amau haw chun ka vangsiet lai tak chun ei do u a, Himahlele Lalpa chu ka kingakna pên ahi.

²⁰ Amah chun mun awngthawl tak ah ei puidawk a; Ka chunga a kipah ziekin ei na hukhing ta ahi.

²¹ Lalpa chun ka diktatna bang zelin ka chungah ahih a; Ka khuthaw a thien tho zie bang zelin ei dinthuk ahi.

²² Lalpa lampite chu ka zui a, Ka Pathien kawm apat chun gilo takin ka chiehmang kha puoh ngâl a.

²³ A vaihawmna chengcheng ka ma ah a um sek a: A thupiek haw chula ka zui lo kha puoh ngâl a.

²⁴ A masang achun diktakin ka um ngâl a, Ka dukdak lohna apat in keimah leh keimah ka kihedawk ta ngâla.

²⁵ Zieziekchun Lalpa chun ka kitûp dân bang zelin ei na din ta a; A mitmuha ka thientho dân bang zelin.

²⁶ Mi lungsiet thei kawm achun lungsiet thei takin kihihlang in in. Mi pha bukim kawm achun pha bukim in kihihlang in na tin;

²⁷ Mi thiengthote kawm achun thiengtho in kihih lang in na tin; Chun, mi lochal kawm achun lochal in kihihlang inla.

²⁸ Gimtheih thuokte chu hukdam in na tin: Mi chapote vang na hihniem theih na dingin a chung u ah na mit chu hak zing ina.

²⁹ Aw Lalpa, ka thaumei na hi a: chun, Lalpa chun ka thimnate hi salhvak ina.

³⁰ Ka melmate do na dingin hatna nei pie a; A kulhteu suksietna dingin thil hihtheihna nei pie ngâla.

³¹ Pathien vang a lampi chu a phabukim a: Lalpa thu chu etchet ahi tai; Amah gingchate chengcheng dingin amah chu phaw ahi.

³² Lalpa hilo Pathien chu kuo ahim? I Pathien uh lo chu kuo a Suongpi um?

³³ Pathien chu ka kulhpi dettak a hi a: Mi pha bukim chu a lampi ah a pui sek hi.

³⁴ Ka kênghaw chu sazukpi keng tawbang in a siem a: Tang sang chunghaw achun le bit takin ei veng sek hi.

³⁵ Ka khuthaw hi gâl kap dingin a sinsak sek a; Khutichun ka bân haw hin thalpi khauh haw chu a luoi bawng zo sek hi.

³⁶ Nangin na hukdamna phaw chule nei pie a: Na kingaihniemna’n nei siem lien tai.

³⁷ Ka nuoia ka kal suonna chu na hihlien a, Tichun ka kalsuon haw hi a teu puoi.

³⁸ Ka melmate chu ka delhphah a, ka sumangthai a; Hihmangthai keia a um macheng un ka vaikit puoi.

³⁹ A thawhdawk kit theih lohna dingun ka sumangthai kei a, ka hihliem a: Ahi, ka keng nuoi ah a puk tau ahi.

⁴⁰ Nangin kidona a dingin hatna’n ka kâwng ah nei gâk a: Ka melmate chunga zawhna tawh.

⁴¹ Ei haw te chu ka sukmang theihna dingin, Nangin ka melmate chu na taihsiet sak ta a.

⁴² A dâk viel u a, himahlele hukdam ding kuomah a um puoh a; Lalpa chu a vak sam u a, himahlele a dâwng puoh ngâl a.

⁴³ Ziephet chun leia leivui bang mai in ka khen nêl a, Khawlai buonthuok bang mai in ka tawh zuon a, ka theh zak vek a.

⁴⁴ Nangin ka mite helna laka le nei hukdawk ta a; Namtin luchang hi dingin nei vawppha a: Ka het khâkloh namte chun ka na sem ta’n au.

⁴⁵ Nam dangte chu ka kawmah kipieu intin: Ka chanchin a het tieng u leh ka thu zawp in au.

⁴⁶ Nam dangte chu hung buoi untin, A kulhpiu haw apat chun kilîng kawmin hung pawtdawk un au.

⁴⁷ Lalpa chu a hing zing hi; ka suongpi chu pahchak in um hen, Ka hukdamna suongpi, Pathien chu chawih-at in um hen:

⁴⁸ Phuba ei lâksakpa leh, Namtin ka nuoia puklut sak Pathien ngêi chu!

⁴⁹ Ka melmate lak apat a ei ladawkpa: Ahi, nangin ei dote chunglam achun nei dawm kâng a: Mi pawngbawl hatte lak apat chun nei hukdawk sek a.

⁵⁰ Zieziekchun aw Lalpa, namtin lak achun na chungah kipahthu gen sek ing ka ting, Na min pakcha’n le la sang ka.

⁵¹ Amah chu lengpa a dingin hukdamna In sang ahi a: A thau nuh chungah, David leh a suonte chung ngêi achun, kumlekhuo’n a lungsietna hihlang ina, a ti a.