2 SAMUEL 21 - PATHIEN LEKHABU THIENGTHO (BSI)

Saul Suonte Thihna

¹ Chun, David dam lai in a kum kizawm in kum thum kiel a kie a; chun, David chun Lalpa chu a dawng a. Chun, Lalpa chun, “Saul ziek leh a inkawte, thisan suohte ziekin leh Gibeon mite a thah ziek kha ahi,” a ti a.

² Chun, leng chun Gibeon mite chu a sama, a kawm u ah; (Gibeon mite chu Israel suonte ahi puou a. Amor mi a um nalaite kha ahi zawu a; Israel chate chun a kawm u ah a na kipautiem tau a: Saul chun Israel chate leh Juda suonte a-dinga a phatchuomngaih ziekin thah a guot sek him ahi),

³ “Banga ka hun hih sak dinguh? Lalpa gochan chu na vangsak theihna dingun bangti banga kichamna ahim ka bawl ding?” a ti a.

⁴ Chun, Gibeon mite chun a kawmah, “Saul leh a inkawte tawh ka chung thuu ahin dangka leh sana a sukcham theih ding ahi puoh a; Israel laka hin mi suklup utna ka nei diek puou hi,” a tiu a. Chun, amah chun, “Na gen bang u chun hun hih sak ing ka,” a ti a.

⁵ Chun, leng kawm achun, “Kei uh ei sukmangthai guo leh Israel gamsung himhim a um lo a sukmangthai dinga ei guo chuh,

⁶ a chapa sagihte chu ei pieu inla, Lalpa mi tel Saul umna Gibeah khuo achun Lalpa masangah khaikang ing kau,” a tiu a. Chun, leng chun, “Hun pie’ng ka,” a ti a.

⁷ Himahlele leng chun, David leh Saul chapa Jonathan kal a Lalpa kawma kipautiemna a neih ziek chun Saul tupa Jonathan chapa Mephiboseth chu a hinghawih a.

⁸ Leng chun Aiah chanu Rizpan in Saul chapa nih a hinsak Armoni leh Mephiboseth vang chu a pui a; chun, Meholath-mi Barzillai chapa Adriel, Saul chanu Mikal in chapa nga a hinsak te tawh:

⁹ chun, Gibeon mite khut achun a pie a, amau chun Lalpa masangah tângah a khâi u a, tichun a sagih u chun mun khat ah a thi khawm u a: buh ât phat, buhmanpawl tun tûng lai vel ahi.

¹⁰ Aiah chanu Rizpah chun saidippuon a la a, buh ât tûng apat chun guoh tui in ahun chap macheng chu suongpi chungah a kizakkhum a: a chung u ah chun vachate leh zan a gamsate um le a phal puoh a.

¹¹ Chun, Aiah chanu Saul meinu Rizpah thilhih chuh David a hilh u a.

¹² Chun, David chu a chieh a, Philistia ten Gilboa a Saul a thah niu a Philistia ten Beth-shan khawlai a a khaih uh guh, Jabesh-gilead mite kawm apat Saul guh leh a chapa Jonathan guhhaw chu a la a;

¹³ Zie taka Saul guhte leh a chapa Jonathan guhte chu a la to a; zie tawbang mah chun a khaihteu guh chule a lakhawm u a.

¹⁴ Chun, Saul guhte leh a chapa Jonathan guhte chu Benjamin gama Zeiah khuo achun a pa Kish thân ah a vui u a; chun, leng thupiek bang zel chun a hih u a. Chun, zie nung chun zie gam chunga dinga mite pauchamna chu Pathien in a dâwng ta a.

Philistia te tawh Kidona

¹⁵ Chun, Philistia te chun Israel mite chu a do kit u a; chun, David chu a mite tawh a chieh suk u a, Philistia mite chu a va do u a: David chu a gim mah mah ta a.

¹⁶ Chun, Ishbibenob, milien chapate laka khat, a tiengcha gik dân sumeng sekel zathum, chemzâm thak chawi chun David chu thah a guo a.

¹⁷ Himahlele Zeruiah chapa Abishai in a panpih a, Philistia mi chu a do a, a that ta a. Chun, David mite chun, “Israel te thaumei na hihmit lohna dingin kido dingin ka kawm u ah chiehdawk ta puo’n la,” ti’n a chungah a kipautiem u a.

¹⁸ Chun, hiti hi ahi a, zie nung chun Philistia mite tawh Gob khuo ah kidona a um kit a: khutichun Hushat-mi Sibbekai chun milien chapate laka Saph chu a that a.

¹⁹ Chun, Philistia mite tawh Gob khuo ah kidona a um kit a, chun, Bethlehem mi Jaare-oregim chapa Elhanan in Git mi Goliath suohpih a that a; a tiengcha lung chu kawlka banga sah ahi.

²⁰ Chun, Gath khuo ah kidona a um kit a, zie tak achun mi sangtak mai, a khut langtuok a khutzung gup, a keng langtuok a kengzung gup, a bawna sawmnih leh li nei hih a um a; amah chu milien suon apat a pieng ahi.

²¹ Chun, Israel mite chu a va cho a, David suohpih Shimei chapa Jonathan chun a na that a.

²² Chun, zie mi lite chu Gath khuo a milien apat pieng ahiu a, ziehaw chu David leh a mite khut ah a thiu a.