2 SAMUEL 20 - PATHIEN LEKHABU THIENGTHO (BSI)

Sheba Helna

¹ Chun, zie tak achun Benjamin mi, Bikri chapa a min Sheba, Belial mi khat a na um kha a: pengkun a mût a, “David ahin chanvo ka nei puou a, Jessai chapa ahin go luoh ding le ka nei diek puou hi: aw Israel mite haw, na puon-In lam chiet u ah chieh tau in,” a ti a.

² Khutichun Israel mite chengcheng in David a zuih u chu a haihsan u a, Bikri chapa Sheba chu a zui tau a; Juda mite chu vang Jordan apat in Jerusalem tiengin a leng u chu a zui tau a.

³ Khutichun David chun Jerusalem a a In chu a tung a; chun, leng chun numei sawm a in ngak dinga a kawihte chu a puikhawm a, a nek dinguh a pie a, himahlele amau haw chu a kuolpih puoi. Tichun, a thih niu tienga khum det a um in, meithai in a um tau hi.

Joab in Amasa a Thahna

⁴ Khutichun, leng chun Amasa kawmah, “Ni thum sungin Juda mite ei sapkhawm sak inla, chun, nang le a na um in,” a ti a.

⁵ Khutichun Amasa chu Juda mite samkhawm dingin a chieh ta a; amahvang chuh leng in a hun tiem sak sangin a va tham sawt zaw ta a.

⁶ Tichun David chun Abishai kawmah, “Bikri chapa Sheba in Absalom sangin I sietna diu khawih ding ahi hi la: na pu mihaw hi pui inla, delh tiem u; khutilochun khuo kulh nei haw achun lut man khan tin, I muh phakloh u ah thahsuok khâi tiu,” a ti a.

⁷ Tichun Joab lawite, Kereth mite, Peleth mite leh a mihat chengcheng teu chun amah a zui dawk tau a: Jerusalem apat chun Bikri chapa Sheba delh ding chun a pawt tau a.

⁸ Gibeon a suongpi lien a va tun u chun, Amasa chu ana chieh masa a. Chun, Joab chuh kidona van in a kivan a, chun, a chung achun chemzâm apai pum in kâwnggak ah a vawp a, chun a vak chieh leh a kie ta a.

⁹ Chun, Joab chun Amasa kawm achun, “Unaupa, na pha na maw?” a ti a. Chun, Joab chun Amasa chu châwp guon a khabemul chu a khut changlam in a tu a.

¹⁰ Himahlele Amasa chun Joab in chemzâm a ken chu a mu puoh a; tichun, a gil ah a sun a, a gilzang chu a kie zeng zung a, a sun kit ta puoh a; tichun a thi ta a. Tichun, Joab leh a suohpihpa Abishai chun Bikri chapa Sheba chu a delh tau a.

¹¹ Chun, a kawmah Joab lawite laka tangval khat chu a ding a, “Joab lama pang leh David lama pang taphawt chun Joab zui zel hen,” a ti a.

¹² Chun, Amasa chu lamlien lai tak ah thisan kai zengzung in a na kuol ta mai a. Chun, amah chun mi cheng chu ding zinga a muh ziek chun Amasa luong chu lamlien apat chu phul lak lam ah a chawn a, puon-In a khuh ta a.

¹³ Chun, lamlien apat kawih chawn a hih nung chun Bikri chapa Sheba delh dingin mi chengcheng in Joab chu a zui tau a.

¹⁴ Chun, Abel Beth-Maakah khawpi tiengin Israel nam cheng chengte leh Ber-mite chengcheng a tawh suok a; tichun, a kikhawm khawm u a, amah a zui tau a.

¹⁵ Chun. Beth-Maakah a Abel khuo achun a huol u a; a khuo kieng u a chun lei a sep pawng u a, kulh chin tak achun a ding u a: chun Joab kawma mi um cheng chengte chun hih chip guon kulh chu a khên hut hut u a.

¹⁶ Khutichun numei ching tak khat khuo apat chun a hung kiko a, “Khai khai, Joab kawmah, ‘Hung nai tie, na kawmah thu vak gen ing ka,’ a tii, vak ti tiem u,” a ti a.

¹⁷ Khutichun a kawm achun a va chieh nai a, chun, numei chun, “Joab na him?” a ti a. “Ka hii,” a ti a, a dâwng a. Ziephet chun a kawmah, “Na suoknu thugen hi ngaitha tie,” a ti a, Chun, amah chun a dawng a, “Ka ngaithâi,” a ti a.

¹⁸ Khutichun, “Malai chun ‘Abel khuo a mi mai kidawng ding ahi,’ ti’n a gen u a; khutibang chun bang thu hi taleh a na tan sek ui.

¹⁹ Kei hi Israel laka kicham nuom leh ginum lawi a mi ka hi a: nang chun Israel khuo, a khuo bulpi hi hihsiet na guot ahi a; Lalpa chanvo chu bangati a hihmang guo?” ti’n a gen a.

²⁰ Chun, Joab chun a dâwng a, “Khutibang chu a hi hiel puoi, hihmang ahim, hihsiet ahim ka guo hiel puoi.

²¹ Khutibang lam thu chu ahi puoi: Ephraim tâng gama mi Bikri chapa Sheba chun leng dodal in, David ngêi dodal in a khut a tha a; amah chu ei pie mai unla, khuo chu pawtsan ing kau,” a ti a. Chun, numei chun Joab kawmah, “Ngaitie, a lu chu kulh ah hun paih dawk sak ing kau,” a ti a.

²² Khutichun numei chu a thil guon chu tawh mipi chengcheng te lak achun a chieh a. Chun, Bikri chapa Sheba lu chu a tan u a, Joab kawm lam achun a vak paih dawk u a, chun, pengkun a mût a, amau puon-In lam chietah khuo apat chun a chieh tau a. Chun, Joab chu Jerusalem ah leng kawm achun a chieh ta a.

David Miliente

²³ Joab chu Israel sepaih chengcheng lawiupa ahi a; chun, Jehoiada chapa Benaiah chu Kereth mi leh Peleth mite lawiupa ahi a:

²⁴ chun, Adoram chu na sema pawngbawl a gawihte lawiupa ahi a; chun, Ahilud chapa Jehoshaphat chu chanchin zik ahi a;

²⁵ chun, Sheva chu lehkha zik ahi a; Zadok leh Abiathar chu thiempu ahiu hi:

²⁶ chun, Jair mi Irah chu David thiempu ahi.