2 SAMUEL 2 - PATHIEN LEKHABU THIENGTHO (BSI)

Juda Lal dinga David Thau Nuhna

¹ Chun, hiti hi ahi a, zie nung chun David chun, “Juda gama khawpi khawitak ahim ah ka va chieh in ka va la dem?” ti’n Lalpa a dawng a. Chun, Lalpa chun a kawmah, “Va chieh to in,” a ti a. David chun, “Khawitak ah ka va chieh die?” a ti a. Chun, amah chun, “Hebron ah” a ti a.

² Khutichun David chu zie tak achun a va chieh ta a, a zite nih Jezreel mi Ahinoam leh Karmel mi Nabal zi Abigail tawh.

³ Chun, David chun a kawma mi um chengcheng chu a puito a, mitin a inkuoteu chiet tawh, Hebron khuo haw achun a um tau a.

⁴ Chun, Juda gama umte Hebron a chun a va chieh u a, Juda mite chunga leng hi dingin David chu sathau a nuh tau a. Khutichun, “Saul vuite chu Jabesh-gilead mite ahiu hi,” ti’n David chu a hilh u a.

Jabesh-gilead Mite leh David

⁵ Tichun Jabesh-gilead mite kawm achun David chun mi a sawl a, a kawm u ah, “Na puu Saul chu na lungsiet dân uh sulang a na na vuih ziekun Lalpa chun hun vangsak hen.

⁶ Tichun Lalpa chun na chung u ah lungsietna leh thutak latsak hen la: zie thil na hih ziek u hin ken le na phatnau man chu hun din ing ka.

⁷ Khutichun, hât tak leh hangsan takin um un: na puu Saul chu a thi ta ngâl a, Juda namte chun a chung u a leng dingin thau ei nuh ta ngâl u a,” a ti a.

Ishboseth Israel te Chunga Lenga Siemna

⁸ Chun, Ner chapa Abner, Saul sepaihte lawiupa chun, Saul chapa Ishboseth chu Mahanaim ah a pui a;

⁹ Gilead chunghaw ah, Aser chunghaw ah, Jezreel chunghaw ah, Ephraim chunghaw ah leh Israel chengcheng te chunghaw ah leng in a siem ta a.

¹⁰ (Saul chapa Ishboseth chun Israel te chunga vai a hawm pat lai chun kum sawmli mi ahi a, kum nih vai a hawm hi). Himahleh, Judate namte chun David chu a zui vek u a.

¹¹ David in Hebron a Juda mite chunga vai a na hawmna chu kum sagih leh tha gup ahi ta a.

Israel leh Juda kal a Kidona

¹² Chun, Ner chapa Abner leh Saul chapa Ishboseth suokte chu Mahanaim apat in Gibeon ah a chieh u a.

¹³ Chun, Zeruiah chapa Joab leh David suokte chu a chiehdawk u a, Gibeon achun a kituok u a; tichun lawikhat chu dîl gâl langkhat ah a chuu a, lawikhat chu dîl gâl langkhat ah a chuu a.

¹⁴ Chun, Abner chun Joab kawmah, “Tangvalte chu hung pawt u henla, ka masang u ahin kisuol u hen,” a ti a. Chun, Joab chun, “Hung pawt u hen,” a ti a.

¹⁵ Khutichun a hung kipan u a, a zah ding guotsa’n a galkai phei u a, Benjamin chi, Saul chapa Ishboseth lama pang sawmlenih chun, David suokte sawmlenih chu a do u a.

¹⁶ A kilanpihteu chu a luchang chiet un a man u a, amau chan chiet chuh a nak u ah chemzâm in a kisun tuoh chiet u a, tichun a pukkhawm chiet tau a: zieziekchun zie mun min ding chun Helkath-hazurim a sa tau a, zie chu Gibeon a um ahi.

¹⁷ Tichun kidona nasatak a hung pawt ta a, Abner leh Israel mite chu David suokte chun a zo tau a.

¹⁸ Chun, zie tak achun Zeruiah chapa thum, Joab, Abishai leh Asahel a um u a: Asahel chu sazukpi bang hiela ngalhat ahi.

¹⁹ Khutichun Asahel chun Abner chu a delh zui a; Abner a delh zui chu changlam leh veilam a pet lo hielin a delh zui ta a.

²⁰ Khutichun, Abner chu a vak kilehhei a, “Nang na hi maw, Asahel?” a vak ti a. Chun, amah chun a dâwng a, “Hi, ka hi,” a ti a.

²¹ Chun, Abner chun a kawmah, “Na changlam ahim na veilam ahim akhan pet inla, tangval khat kha man inla, a kigâlvanna lâksak in,” a ti a. Himahlele Asahel chun amah a delh chu a petsan nuom diek puoh a.

²² Chun, Abner chun Asahel kawmah, “Ei delh ki’n; bang a ti a ahim ka hun sutpaih ding? Na suohpihpa Joab mel ka mu ngam dinga ahim?” a ti kit a.

²³ Himahlele a. haihsan nuom diek puoh a: ziephet chun Abner chun a tiengcha lehlam in a gil ah a sun a, tiengcha chu a nunglam ah a let pai a, zie tak achun a puktha ta a, zie mun achun a thi den ta a; chun, hiti hi ahi a, Asahel a puk a thihna mun pha taphawt chu zie mun achun thipkêi in a ding zel u a.

²⁴ Mahleh Joab leh Abishai chun Abner chu a delh zel u a; chun, Gibeon gamthip lampi a Giah kienga Ammah tâng a, tun u chun ni a tum ta a.

²⁵ Chun, Benjamin suonte chu Abner kawm achun a kikhawm u a, lawi khatin a kisiem u a, tângsip ah a va ding tau a.

²⁶ Khutichun Abner chun Joab a sama, “Kido zing zing ding I hiu em? a tâwp lam leh bangmahlo hung hi ding ahi tih leh, lungkham um mah mah ding ahi tih helo na him? Bang chan ahim mipite chu a unauteu delh chu haihsan ta dinga hilh lo a na um ding?” a ti a.

²⁷ Chun, Joab chun, “Pathien hing hinna sâlin ka gen hi, bangmah a na gen lo hi leh chin zingkal apat khan mipite chu chiehmang tau intin, a suohpih teu chu delh zing zing talo ding hiua,” a ti a.

²⁸ Khutichun Joab chun pengkun chu a vak mût a, mipite chu a ding zing ta mai u a, Israel mite chu a delh ta puou a, a do kit diek ta puou hi.

²⁹ Tichun Abner leh a mite chu Arabah hawhpai in zie zan chun zankhuo’n a chieh u a; Jordan a kân u a, Bithron a hawhpai u a, Mahanaim a tung tau a.

³⁰ Chun, Joab chun Abner a delh chu a vaikit ta a; chun, mipi chengcheng a vak sapkhawm suok phet chun a lawite sawmlekuo leh Asahel chu a na kim ta puou a.

³¹ David lawite chun Benjamin mite leh Abner mite chu zathum leh sawmgup a that u a.

³² Khutichun Asahel luong chu a lau a Bethlehem a a pa thân ah a vui u a. Chun, Joab leh a mite chu zankhuo’n a chieh u a, Hebron a tun u chun khuo a vak tai.