2 SAMUEL 19 - PATHIEN LEKHABU THIENGTHO (BSI)

Joab in David a Gaihna

¹ Khutichun Joab kawm achun, “Ngaitie, David chun Absalom chu a kah a, a sun ve,” a tiu a.

² Tichun, zie ni a a zawhnau chu mi chengcheng dingin Absalom sûnna a hung hi zaw ta a: “Leng chu a chapa ziek chun a lungkham mah mah mai hi,” tih chu mipite chun a he ta ngâl u a.

³ Chun, mipite chu kidona a mi a taihmang u a a zahchâk man u a a gûka a chiehmang bang mai un zie ni chun a gûkin khawpi ah a lut mai tau a.

⁴ Chun, leng chun a mai a khuh a, “Aw ka chapa Absalom, aw Absalom, ka chapa, ka chapa,” ti’n ngeih tak in a kap a.

⁵ Ziephet chun Joab chu In ah leng kawm achun a lut a, “Na hinna te, na chapate leh na chanute hinna leh na zite leh na meite hinna hûkbitte chu tuni hin zakcha takin na kawih ta ahi;

⁶ Nang hun mudahte chu na hehpih a, nang hun hehpihte chu na hawt tâk ziek hin. Lawi-upate leh sepaihte chu nanga dingin bangmah hilo bangin tuni hin na sulang ta a: Absalom chu dam na lai henla, kei haw chengcheng hi tuni hin thi vek zaw mai leng un, zie chu na kipahlam tak hileh kilawm in tuni hin ka hêi.

⁷ Zieziekchun kipan inla, na mipite hi thamuon in; na hih loh chun Lalpa min salin ka kipautiem ahi, mi khatchale tu zan hin na kawmah um puo’n au: zie chu nanga dingin na tanglak a pat tuni tienga na chunga thil phalo hung tung chengcheng sangin phalo zaw’n a,” a ti a.

⁸ Khutichun leng chu a kipan a, kulh kawtkhak achun a chu a. “Ngaitiem u, leng chu kulh kawtkhak achun a chûi,” ti’n mipi chengcheng chu a hilh u a: chun, mipi chengcheng chu leng masang achun a va chieh tau a.

David Jerusalem a a Chieh kitna

⁹ Israel te haw vang chu amau puon-In chietah a chieh kit tau a, “Leng chun I melmateu khut apat ei hukdawk uh a, Philistia te khut apat ei hukdawk ta a; chun, tuhin zie gama pat hin Absalom chu a taihdawk san a.

¹⁰ Chun, Absalom I leng ding u a sathau I nuhpau chu a thi ta ngâl a. Bangati a leng chu kam khatcha a-le sapkit na guot loh uh a?” ti’n Israel mite chengcheng chu a kiniel vengvung u a.

¹¹ Khutichun, leng David chun thiempu Zadok leh Abiathar kawm achun, Juda upate kawm achun, “Bangati a leng chu a In lama puih kitna ding thu a hi a chanchûm pena na pan uh a? Israel mite’n leng puihkit ding thu a gen u chu leng kawm a tung ta ngâl a.

¹² Ka unaute na hiu a, ka guh leh ka phehlevote na hi ngâl u a, bangati a a chanchûm pena na pan uh ahim?” ti’n gen un.

¹³ Chun, Amasa kawmah, “Ka guh leh ka phehlevo hilo na him? Joab thasanga sepaihte lawiupa a ka hun pansak loh chun Pathien in a nawp nawp ei lawh hen, zie sanga nasa zaw chun le, a tii, va tiu,” ti’n mi a sawl a.

¹⁴ Khutichun, amah chun mi khat bang mai in Judate lungthim chu a thuzawh ta a; tichun leng kawmah, “Na mite chengcheng kha tawh hung kit un,” ti dingin mi a sawl u a.

¹⁵ Khutichun leng chu a vaikit a, Jordan a va tung a. Chun, Judate chu leng na muok a, leng chu Jordan a na puikai dingin Gilgal ah a chieh u a.

¹⁶ Chun, Bahurim khuo a Benjamin mi Gera chapa Shimei chu kin takin leng David muok dingin Juda te haw tawh a chieh suk u a.

¹⁷ Chun, a kawmah Benjamin mi sangkhat tawh, Saul inkawte suok Ziba, a chapa sawmlenga leh a suok sawmnih tawh a tel u a; chun, leng tun masang chun Jordan a galkai u a.

¹⁸ Chun, leng inkawte puih kaihna dingin leh pha a sak bang banga mat dingin kuong a chieh galkaihpih u a. Chun, Jordan lui a va galkaih chun Gera chapa Shimei chu leng masang achun a khupbawk a.

¹⁹ Chun, leng kawm achun, “Ka pu hin gitlohna nei in ei ngai dah hâm hen la, lengpa ka pun Jerusalem a pawtsan ni a na suok in diklo taka a na hihsa haw chule hezing diek kihen la, leng chun lunggil ah vawp kihen.

²⁰ Na suok hin thil ka hihkhiel hi tih ka kihe a; zieziekchun, ngaitie, Joseph inkawte chengcheng te laka ka pu lengpa chu muok dingin tuni hin a hung pawt masapen ka hi,” a ti a.

²¹ Himahlele Zeruiah chapa Abishai chun a dâwng a, “Lalpa thau nuh chu hansie a buokkhum ziekin Shimei hi thah ding hilo ding ahim?” a ti a.

²² Chun, David chun, “Nang haw Zeruiah chapate haw, nanghaw’n nei na hetsak dinguh banga um? Tuni hin ei dote hilo na hiu hi? tuni hin Israel laka mi himhim thah ding ahim? Tuni hin Israel mite chunga leng ka hih hi he mawh a nei bawl uh ahim?” a ti a.

²³ Chun, leng chun Shimei kawm achun, “Thi hiel puo’n la,” a ti a. Leng chu a kawmah a kipautiem a.

²⁴ Chun, Saul chapa Mephiboseth chu leng muok dingin, a hung suk a; leng a pawtdawk ni apat gâlmuong a a hung vaihkit ni tieng chun a kengte chu a sil puoh a, a khabemul a met puoh a, a puonhaw le a sawp diek puoi.

²⁵ Chun, hiti hi ahi a, leng muok dinga Jerusalem a a chieh chu leng in a kawmah, “Mephiboseth, bangati a kei kawma hung lo na him?” a ti a.

²⁶ Chun, amah chun a dâwng a, “Hepu, na hetsa guolin na suokpa hi ka keng a bai a ahi. Ka suokpa kawma leng kawmah ka chieh theih na dingin Sabiltung guonggalh in ka ti a, mahleh ei thêm a ahi.

²⁷ Chun, lengpa ka pu kawma hin na suok hi a hêk a; himahlele lengpa ka pu chu Pathien vânsâwlchâk bang ahi a; zieziekchun pha na sak bang bangin hih in.

²⁸ A pa inkawte chengcheng chu lengpa ka pu ma achun thah vek dinga kilawm ahi him u a; mahleh na suok hi na ankuong umpihte lak ah na telsak a. Zieziekchun leng kawm ahin thil dang nget beh ngam ka hi na laia ahim?” a ti a.

²⁹ Chun, leng chun a kawmah, “Na chungchâng thu hi bangati a gen kit sek na him? Nang leh Ziba chun gam chu kihawm un ka tii,” a ti a.

³⁰ Chun, Mephiboseth chun leng kawmah, “E, amah chang vek hen, lengpa ka pu chu amah In ah gâlmuong in a tung ta ngâl a,” a ti a.

Barzillai chunga David Zahngaihna

³¹ Chun, Gilead mi Barzillai chu Rogelim apat in a hungsuk a leng chu Jordan a puikai dingin a kawmah Jordan lui chu a va kai a.

³² Barzillai chu têk tak ahi a, kum sawmgiet mi hiel ahi a, Mahanaim-a leng um sung khan nek dingte a na ngaihtuoh saka mi neizo tak le ahi.

³³ Chun, leng chun Barzillai kawm achun, “Ei hun zui inla, ka kawmah Jerusalem ah hun vak ing ka,” a ti a.

³⁴ Chun, Barzillai chun leng kawmah, “Bang chan dam nalai ding ka hi a, Jerusalem leng kawma ka va chieh toh ding chuh?

³⁵ Tuhin kum sawmgiet a upa ka hi a; a sie leh a pha le ka khendang theia ahim? Na suok hin ka thil nek leh dâwn haw hi a lim leh a lim loh le ka he thei na laia ahim? Pasal leh numeihaw lasak git le ka za khen thei ta puoh a. Zieziekchun na suok hi bang dingin em lengpa ka pu a dinga puokgik tak ka hih mai ding

³⁶ Na suok hin leng tawh Jordan galkaih tieng mai hi ka guot ahi; bangati a leng chun khutibanga chu ka phatna chu nei ditthuk khel khel guot a?

³⁷ Lungsiet takin na suok hi ei chieh kit sak mai inla, ka nu leh pa thân umna keimau haw khuo ngêi ah va thi zaw’ng ka, Amahvang chuh entie, na suok Chimham hi; lengpa ka pu kawmah hung kai henla, a chungah pha na sak bang bangin hih mai in,” a ti a.

³⁸ Chun, leng chun a dâwng a, “Chimham chu kei kawmah Jordan hung kai intin, pha na sak bang takin a chungah hih ing ka: chun, thil bang hileh nei nget tâk chu hih sak zel ing ka,” a ti a.

³⁹ Chun, mipi chengcheng chu Jordan gâl a kai u a, chun, leng chule a galkai a: leng chun Barzillai chu a châwp a, vangsaka; chun amah mun lam ah a chieh kit ta a.

⁴⁰ Khutichun leng chu Gilgal ah a kai a, Chimham chule a kawm achun a va galkai a; Juda mi chengcheng chun leng chu a puikai u a, Israel mi le a kimkhat a tel u a.

Juda leh Israel te Kinielna

⁴¹ Chun, ngaitie, Israel mi chengcheng chu leng kawmah a hung u a, leng kawm achun, “Bangati a ka unauteu Juda mite hin a hun gûk mang u a, leng leh a inkawte leh David mi chengcheng le Jordan gala a puihkaih khawm vek uh ahim?” a tiu a.

⁴² Chun, Juda mi chengcheng chun Israel mite chu a dâwng u a, “Leng chu keihaw inkuonpih a hih ziek ahi: bangati a zie thu a hi lungna mai na hiu hi? Leng neih sen a um ka hiu a ahim? thilpiek bang ahim piek ei nei a ahim?” a tiu a.

⁴³ Chun, Israel mite chun Juda mite chu a dâwng u a, “Leng ahin chanvo sawm ka nei u a, David achun nang haw sangin simtel theih ka hi zawu apuo; bangati a ei ngaidau maimai, leng puihkit thu ahin a pun masa ka hi puou a ahim?” a tiu a. Khutichun, Juda mite thu chu Israel mite thu sang chun a hatzaw ta a.