2 SAMUEL 13 - PATHIEN LEKHABU THIENGTHO (BSI)

Amnon leh Tamar

¹ Chun, David chapa Absalom chun suohpih numei melhawih tak a nei a, a min chu Tamar ahi. Chun, David chapa Amnon chun amahnu chu a deihcha a.

² Tichun Amnon chun a suohpihnu Tamar chu hah deih mah mah a; a damloh lawh a a; amahnu chu nungak thiengtho ahi a, a chunga thil bang ahim vak hih chu amah a ding chun thil hithei lo ahi ngâl a.

³ Amahvang chuh Amnon chun zawl a nei a, a min chu Jonadab ahi, David suohpihpa Shammah chapa hi a: Jonadab chuh mi chitgukhah tak ahi a.

⁴ Chun, a kawmah, “Aw, nang leng chapa, bang zieka ani ni a gawng deuh deuh zieng na hi? Nei hilh nuom dem?” a ti a. Chun, Amnon chun a kawmah, “Ka suohpihpa Absalom suohpihnu Tamar hi ka deihcha bêka ahi,” a ti a.

⁵ Chun, Jonadab chun a kawmah, “Na zâlkhun ah kuol zing inla, kidamloh sak inla; chun, na pa’n a hung et tieng leh a kawmah, ‘Lungsiet takin ka suohpihnu Tamar chu ka kawmah hung henla, chun, ka mitmuh ngêi in nek ding ei hun pie henla, a khut apat ngêi in a na ne’ng ka,’ a na ti’n,” a ti a.

⁶ Khutichun Amnon chu a kuol a, a kidamloh sak ta a: chun, leng in a va et chun Amnon chun leng kawmah, “Lungsiet takin ka suohpihnu Tamar hung henla, ka mitmuh ngêi a hin chângthâk nih ei siem sak henla, amah khut ngeia chun a na ne’ng ka,” ti a.

⁷ Khutichun David chun Tamar kawmah, “Na suohpihpa Amnon In lam ah chieh inla, nek ding va bawl sak tie,” ti’n a In ah mi a sawl a.

⁸ Khutichun Tamar chu a suohpihpa Amnon In lam ah a chieh a; chun, amah chu a na kuol zing a. Chun, changbuong a la a, a mêk a, a mitmuh in chângthâk chu a siem a, a kang a.

⁹ Chun, a kanna khangbel chu a la a, a masang achun a sung tha a; himahlele a ne nuom puoh a. Chun, Amnon chun, “Mi chengcheng hin ei pawtsan vek u hen,” a ti a. Tichun a pawtsan vek tau a.

¹⁰ Chun, Amnon chun Tamar kawm achun, “Na khut ngêi a ka nek theihna dingin nek ding chu indan a hin hun chawi lut ta le,” a ti a. Chun, Tamar chun chângthâk a siem haw chu a la a, a suohpihpa kawmah indan achun a chawi lut ta a.

¹¹ Tichun nek sak guo a a kawm naih a a va chieh chu a na man a, a kawmah, “Ka suohpihnu, nang le hung kuol in,” a ti a.

¹² Chun, amah chun a dâwng a, “Hilo e, ka suohpihpa, ei pawngbawl ki’n, Israel te lak ah hiti bang thil hi hih ding ahi puoi; zie thil gilo ngawlhuoi tak hi hih ki’n.

¹³ Chun, kei hin ka muolphona chu bangti’n ahim ka puok zawh ding? Nang le Israel te lak ah mi ngawl a seh hung himai ding na hi. Zieziekchun leng hopih zaw’n, nei neih chu niel sam puo’n a,” a ti a.

¹⁴ Himahlele a thu gen chu a zawp nuom puoh a, amah sangin a hatzaw ngâl a, a pawngbawl a, a kuolpih ta a.

¹⁵ Khutichun, Amnon chun nasa takin a haw kit ta zel a; a muhdahna chu a maa a hehpih laia a hehpihna sang khan a nasa zaw ta a. Tichun Amnon chun a kawmah, “Kipan inla, chieh mang kêi in,” a ti a.

¹⁶ Chun, amah chun a kawmah, “Khuti ding chu ahi puoi, hitibang a diklo taka nei sawldawk hi ka chunga na hihsa cheng sang khan a phalo zawi,” a ti a. Himahlele, a zawp nuom diek puoh a.

¹⁷ Khutichun a nasempa a suok chu a sama, “Zie numei hi ka kawm apat pawt sak inla, kawt lehkam in,” a ti a.

¹⁸ Tamar chun puonâk chuol zie chuom chuom a pawl a âk a; zie tawbang puonâk chuol chu leng nungak thiengtho ten a âk sek uh ahi. Khutichun a suok chun a puidawk a kawt a lehkam khum ta a.

¹⁹ Chun, Tamar chun a luchang ah vut a sung a. a puonâk chuol zie chuom chuom a pawl chu a bawtthêk a, a sip ah a khut a kawih a, ngeihtak a kap kawmin a chieh ta a.

²⁰ Chun, a suohpihpa Absalom in a kawmah, “Na suohpihpa Amnon chu na kawma hung lut ahi maw? thip mai in, ka suohpihnu, na suohpihpa ahi a puo, zie thil hi ngaihtuoh ki’n,” a ti a. Khutichun Tamar chu a suohpihpa Absalom In ah lungkham tak leh ngui takin a kikhum chak ta a.

²¹ Himahlele leng David in zie thu haw chengcheng chu a zak phetin a lungna mah mah ta a.

²² Chun, Absalom chun Amnon chu a suohpihnu a kuolpih ziek chun a mudah mah mah ta a, ho le a hopih nuom ta puoh a.

Absalom Phuba Lâkna

²³ Chun, hiti hi ahi a, kum nih pumlum a bei nung chun Ephraim kienga Baal-hazor ah Absalom in belam mul a met sak a; chun, Absalom chun leng chapate chengcheng chu a chiel a.

²⁴ Chun, Absalom chu leng kawmah a chieh a, “Ngaitie, na suok in belam mul a met sak a, leng leh a suokte chu na suok ankuong luihna ahin hung tau u,” a ti a.

²⁵ Chun, leng chun Absalom kawmah, “Hilo e, ka chapa, ka bawn u chun hung lo e, hun subuoi taluo khang kau,” a ti a. Chun, amah chun a chiel hâmhâm a, himahlele a chieh nuom diek puoh a, vang a buok a, a sawl kit ta a.

²⁶ Ziephet chun Absalom in, “Ahihloh bêk leh ka suohpihpa Amnon bêk ka kawmah hung heh,” a ti a. Chun, leng chun a kawmah, “Bang dingin em a hung diek ding?” a ti a.

²⁷ Himahlele, Absalom chun Amnon leh leng chapate cheng bêk chu a kawma chieh dingin a ngek tei tei a.

²⁸ Chun, Absalom chun a suokte chu, “Ngaitiem u, Amnon chu uain dawna a lunggil a tai lai leh na kawm u ah, ‘Amnon chu that un,’ ka hun tih chun, that zieng unla, lau kiu in, thu ka hun piek uh hita lo ahim? Kihih hangsan unla, kipasalphat sak un,” ti’n thu a pie a.

²⁹ Khutichun, Absalom suokte chun Amnon chungah Absalom in thu a piek bang chun a hih tau a. Khutichun leng chapate chengcheng chu a kipan u a, a sabiltung chunghawu ah a chu chiet u a, a taimang tau a.

³⁰ Chun, hiti hi ahi a, lam kala a um lai un, “Absalom in leng chapate chengcheng a that suok kêi a, khatchale a hâwi puoi,” ti’n David kawmah chanchin a hung tung a.

³¹ Khutichun leng chu a tho a, a silhlechen haw a bawtthêk a, lei ah a kuol ta a; a suokte chengcheng chule a silhlechen hawu bawtthêk in a kawmah a ding u a.

³² Chun, David suohpih Shammah chapa Jonadab chun a dâwng a, “Ka pu chun leng chapa tangval chengcheng chu a that suok kêi ui tih thuthang hi gingcha kihen; Amnon mai ahi a thi chuh; a suohpihnu Tamar a pawngbawl apat khan Absalom chun hitibang a hih hi a guot him ahi.

³³ Zieziekchun, ka pu, lengpa chun leng chapate chengcheng chu a thi ahim tih gingcha’n ngaihtuoh kihen, Amnon mai ahi a thi chuh,” a ti a.

³⁴ Absalom chu vang a taimang ta a. Chun, a gâlvengpa tangval chun a mit a vak hak a, a vak en a, chun, ngaitie, a nunglam a tângpanga lampi achun mi tamtak a hung suk u a.

³⁵ Chun, Jonadab chun leng kawmah, “Ngaitie, leng chapate chu a hung ui, na suok in a gen bang phet khah ahi nai,” a ti a.

³⁶ Chun, hiti hi ahi a, a gen zawh phet chun. leng chapa te chu a hungtung u a, a awu suoh hiel in a kap u a: chun leng chule a suokte chu tawh hah kah in a kap tau a.

³⁷ Absalom chu a taimang a, Geshur leng Amihud chapa Talmai kawmah a chieh a. Chun, David chun ni chengin a chapa chu a sun a.

³⁸ Khutichun Absalom chu Geshur gam ah a taimang a, zie tak achun kum thum a va um ta a.

³⁹ Chun, leng David chu Absalom kawma chieh a ut mah mah a: Amnon chung chang thu chu kichien takin a he ta a, amah chu a thi ta ngâl a.