2 SAMUEL 12 - PATHIEN LEKHABU THIENGTHO (BSI)

Leng David Kisikna

¹ Chun, Lalpa chun David kawmah Nathan a sawl a. Nathan chu a kawm achun a chieh a, “Khuo khat a hin mi nih a um u a; khat chu mi hausa a hi a, khatzaw chu mi chagah ahi a.

² Mi hausa chun belam guol tamtak leh gan guol tamtak a nei a:

³ mi chagahpa chun chuh belamno anu neucha khat a châwk a vulh lai tihloh chu bangmah a nei puoh a: a In a a chate tawh khanglien khawm ahiu a; a kuong sawkpih leh a khawn kikawppih, a ângsung a um, a chanu bang taka a ngaih ahi.

⁴ Chun, mi hausa kawm achun khuolzin khat hi a va tung a; chun, a kawma malzin hung tung chuh amah belam leh a gan chu thah sak phal lo in mi chagahpa belam chu a lâksak a, a kawma hung pa chuh a thah ta a,” a ti a.

⁵ Tichun David chu zie mi chung achun a lungna mah mah ta a Nathan kawma chun, “Lalpa hinna sâlin ka gen hi, zie thil hihpa chuh suklup mai ding ahi chu;

⁶ Chun, zie bang thil chu a hih ziekin leh lungsietna a neih loh ziekin a belamno chu a leh li a a dit ding hi’n a,” a ti a.

⁷ Khutichun Nathan chun David kawmah, “Nang hi na hi a puo. Lalpa Israel te Pathien chun hiti hin a tii, ‘Israel te leng hi dingin thau ka hun nuh a, Saul khut apat ka hun hukdawk a;

⁸ Na pu go chu ka hun luoh sak a, na pu zite chu na ângsung ah ka kawih a, chun Israel inkawte leh Juda inkawte chu ka hun pie a; chun, ziehaw chu atawm takluot chun thil dang haw le ka hun piek beh puoh dem.

⁹ Bangati a Lalpa thu chu ngaidau a, a mitmuha thil phalo na hih tâk mai? Hit mi Uria chu chemzâm in na that a, a zi chu na zi dingin na lâksak a, amah chu Amon suonte chemzâm in na that a.

¹⁰ Zieziekchun, chemzâm in na insung chuh kikiengkawih san hiel puo’n a; nang chun nei ngaidau in Hit mi Uria zi chu na zi dingin na lâksak ta ngâla.

¹¹ Lalpa chun hiti hin a tii, Ngaitie, nangmah inkuon laka pat in na chungah thil phalo pawt sak ing ka ting, na mitmuh ngêi in na zite chu hun lâksak ing ka ting, na In vengte pie’ng ka ting, sun lai in na zite kuolpih in au.

¹² Nangin a gûkin na hih a, kei chun chuh Israel mite chengcheng mitmuh in sun khawvak ah hih ing ka,’” a ti a.

¹³ Chun, David chun Nathan kawmah, “Lalpa chungah thil ka hihkhiel tai,” a ti a. Chun, Nathan chun David kawmah, “Lalpa’n le na gitloh na chu a kawihmang tai; thi puo’n la.

¹⁴ Amahvang, chuh zie na thilhih hin Pathien gensietna lemchâng tak Lalpa melmate dinga na bawl ziekin naupang nang apat a hung pieng chu thi ngêi ngêi ina,” a ti a.

David Chapa Thihna

¹⁵ Tichun Nathan chun a In lam ah a taihsan ta a. Chun, Uria zin David a hinsak chung achun Lalpa’n a khut a tha a, tichun, gim takin ahung na ta a.

¹⁶ Khutichun David in zie naupang ding chun Pathien kawmah a ngên a; chun David chun an te ngâwl a, a luta, zankhuo’n tuol ah a kuol ta a.

¹⁷ Chun, a inkawte laka upate chu a kipan u a, tuola pat chun kaihthawh guon a kieng ah a ding u a; himahlele a tho nuom puoh a, a kawm u ah le an a ne nuom diek puoh a.

¹⁸ Chun, hiti hi ahi a, a ni sagih ni chun naupang chu a thi ta a. Chun, David suokte chun naupang chu a thi tai tih hetsak ding chu a lau u a, “Ngaitiem u, naupang a damlai khan a kawmah thu I gen u a, a ngaihsak nuom puoh a, naupang chu a thi tai tih bangti’n ahim I hilh ngam dinguh, bang ahim ti’n amah kisuna kha’na,” a tiu a.

¹⁹ Himahlele David chun khutia a suokte kihougu a muh chun David chun naupang chu a thi ahi tih a he ta a; Chun David chun a suokte kawm achun, “Naupang chu a thi ahi ta?” a ti a; chun, amau chun, “A thi tai,” a tiu a.

²⁰ Khutichun David chu tuol apat chun a tho dawk a, a kisil a, thau a kinuh a, a puonhaw a theng a; chun, Lalpa In ah a chieh a, Pathien chibai a bûk a; chun, a In lam ah a chieh kit a, an a ngên a, a masang achun a hun lui u a, a ne ta a.

²¹ Khutichun a suokte chun a kawmah, “Na thilhih dân hi bangti dân ahim? Naupang chu a damlai khan an te na ngawl a, na kap a, himahlele naupang chu a thih phetin na tho a, an na ne zaw ta a,” a tiu a.

²² Chun, amah chun, “Naupang chuh a damlai khan an ngawlin ka kap ngut a; ‘Naupang chu a dam theihna’n Lalpa chun ei lungsiet kha mawh dem tih kuo a he thei?’ ka ti a ahi.

²³ Himahlele tuhin chu a thi ta ngâl a, bang dingin em an ka ngawlh tâk ding? Ka sam kit thei dinga ahim? a kawmah keimah hi va chieh ing ka ting, himahlele, amah vang kei kawmah hung vaikit ta puo’n a,” a ti a.

Solomon Pienna

²⁴ Tichun David chun a zi Bathsheba chuh a lungmuon a, a kawmah a lut a, a kuolpih a, tichun chapa a hing a, a min dingin Solomon a sa a. Chun, amah chu Lalpa’n a hehpih a;

²⁵ thiemgau Nathan chu a thuthak a, amah chun Lalpa min pu’n a min dingin Jedidiah a sa a.

David leh Joab in Rabbah a Lâknau

²⁶ Khutichun Joab chun Amon suonte khawpi Rabbah a do a, khawpi chu a la a.

²⁷ Chun, Joab chun David kawmah mi a sawl a, “Rabbah chu ka do a, tuinak haw chu ka la ta a puo!

²⁸ Khutichun mi a um nalai chengcheng chu samkhawm inla, khawpi do inla vak zo in: ken khawpi chu ka lak chun ka min pu mai khâna,” a ti a.

²⁹ Khutichun David chun mi chengcheng chu a samkhawm a, Rabbah achun a chieh u a, a va, do u a, a la tau a.

³⁰ Chun, a lengpau lukhuk khuklai chu a lâksak u a, a gik dân chu sana talent khat tawh kibang ahi a, suongmantam haw le a tel a; Chun, David a khuk sak u a. Chun, khawpi apat gâllâk sum tamtak a lau a.

³¹ Chun, mipite chu a puidawk a, thing-âtna te, lei lehna thikzum te, thik heicha te, mang in na a sep sak a, cheklei te a siem sak u a: Amon suonte khawpi chengcheng chu khutibang chun a hih u a. Chun, David leh mi chengcheng chu Jerusalem ah a chieh kit tau a.